(vovworld)- ຕອນບ່າຍວັນທີ 25/2, ໃນການປະຊຸມຂ່າວສາກົນ ຊື່ງດຳເນີນໃນຕອນບ່າຍວັນທີ 25/2 ຢູ່ ຮ່າໂນ້ຍ, ໂຄສົກກະຊວງການຕ່າງປະເທດຫວຽດນາມ ເລຫາຍບີງ ເນັ້ນຫນັກບັນດາການກະທຳມໍ່ໆມານີ້ຂອງຈີນ ຢູ່ ທະເລຕາເວັນອອກ. ການກະທຳດັ່ງກ່າວຂອງຈີນ ພວມນາບຂູ່ເຖິງສັນຕິພາບ, ສະຖຽນລະພາບ, ລ່ວງລະເມີດເຖິງອະທິປະໄຕຂອງຫວຽດນາມ. ເມື່ອຕອບຄຳຖາມຂອງນັກຂ່າວກ່ຽວກັບປະຕິກິລີຍາຂອງຫວຽດນາມ ຕໍ່ຫນ້າເລື່ອງຈີນ ນຳອາວຸດເຖິງເກາະ ຟູເລີມ ຂຶ້ນກັບເກາະຮ່ວາງຊາ ຂອງຫວຽດນາມ ກໍຄືພວມມີແຜນການຕິດຕັ້ງລະບົບ radar ຢູ່ເກາະຈຳນວນຫນຶ່ງໃນບໍລິເວນໝູ່ເກາະເຈື່ອງຊາ, ໂຄສົກກະຊວງການຕ່າງປະເທດຫວຽດນາມ ເລຫາຍບີງ ຢືນຢັນວ່າ:
“ອະທິປະໄຕຂອງຫວຽດນາມ ຢູ່ ໝູ່ເກາະ ຮວ່າງຊາ ແລະ ເຈື່ອງຊາ ບໍ່ອາດປະຕິເສດໄດ້. ໂດຍບໍ່ຫົວຊາຕໍ່ການຄັດຄ້ານ ແລະ ຄວາມວິຕົກກັງວົນຂອງຫວຽດນາມ ກໍຄືຂອງປະຊາຄົມສາກົນ, ຈີນຍັງຄົງສືບຕໍ່ມີບັນດາການກະທຳ ບໍ່ພຽງແຕ່ລ່ວງລະເມີດອະທິປະໄຕຂອງຫວຽດນາມ, ຊຸກຍູ້ການນຳໃຊ້ທະຫານຢູ່ ທະເລຕາເວັນອອກ ເທົ່ານັ້ນ ຫາກຍັງນາບຂູ່ເຖິງສັນຕິພາບ, ສະຖຽນລະພາບຢູ່ພາກພື້ນ ກໍຄືຄວາມໝັ້ນຄົງ, ຄວາມປອດໄພໃນການເດີນທະເລ ແລະ ການບິນຢູ່ທະເລຕາເວັນອອກ. ພວກຂ້າພະເຈົ້າເດັດດ່ຽວຄັດຄ້ານບັນດາການກະທຳລ່ວງລະເມີດອະທິປະໄຕຂອງຫວຽດນາມ ແລະ ຮຽກຮ້ອງຈີນ ຕ້ອງມີຄຳເວົ້າ, ການກະທຳທີ່ມີຄວາມຮັບຜິດຊອບ ແລະ ມີລັກສະນະສ້າງສັນໃນການຮັກສາສັນຕິພາບ, ສະຖຽນລະພາບຢູ່ພາກພື້ນ ກໍຄືໃນໂລກ ບົນພື້ນຖານເຄົາລົບກົດໝາຍສາກົນ.”
ກ່ຽວຂ້ອງເຖິງບັນດາການເຄື່ອນໄຫວລາດຕະເວັນຢູ່ທະເລຕາເວັນອອກຂອງບັນດາກຳລັງ ອາເມລິກາ ກໍຄືຖະແຫລງການມໍ່ໆມານີ້ຂອງ ອາເມລິກາ ກ່ຽວກັບເລື່ອງອາດຈະຜັນຂະຫຍາຍລະບົບປືນໃຫຍ່ເຄື່ອນທີ່ຢູ່ທະເລຕາເວັນອອກ, ໂຄສົກກະຊວງການຕ່າງປະເທດ ຫວຽດນາມ ເລຫາຍບີງ ເນັ້ນຫນັກວ່າ:
“ພວກຂ້າພະເຈົ້າຊີ້ແຈ້ງທັດສະນະຂອງຕົນເປັນຫລາຍເທື່ອແລ້ວ ຫວຽດນາມ ເຄົາລົບການໄປມາທີ່ບໍ່ສົ່ງຜົນສະທ້ອນໃດໆໃນເຂດນ່ານທະເລ ທີ່ເໝາະສົມກັບບັນດາຂໍ້ກຳນົດກ່ຽວຂ້ອງເຖິງກົດໝາຍສາກົນ. ພ້ອມທັງ ສະເຫນີທຸກປະເທດມີການປະກອບສ່ວນຕັ້ງຫນ້າ ແລະ ແທດຈິງເຂົ້າໃນການຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ, ເຄົາລົບກົດໝາຍສາກົນ.”