ໂຄສົກກະຊວງການຕ່າງປະເທດຫວຽດນາມ ເລຫາຍບີງກ່າວຄຳເຫັນໄຂ ການປະຊຸມຂ່າວ (ພາບ : bongoaigiao) |
(vovworld)- ຕອນບ່າຍວັນທີ 17/5 ຢູ່ຮ່າໂນ້ຍ, ກະຊວງການຕ່າງປະເທດຫວຽດນາມໄດ້ຈັດການປະຊຸມຂ່າວສາກົນເພື່ອແຈ້ງຂ່າວເຖິງຫາງສຽງພາຍໃນປະເທດ ແລະ ສາກົນກ່ຽວກັບບັນດາກໍລະນີກໍ່ຄວາມວຸ່ນວາຍ, ທຳລາຍຄວາມເປັນລະບຽບຮຽບຮ້ອຍຢູ່ບາງເຂດອຸດສາຫະກຳຢູ່ແຂວງ ບີງເຢືອງ, ດົງນາຍ, ຮ່າຕິ້ງ, ນະຄອນໂຮ່ຈິມິນ. ເຂົ້າຮ່ວມມີບັນດາຜູ້ຕາງໜ້າກະຊວງຕຳຫຼວດ, ກະຊວງແຜນການ ແລະ ລົງທຶນ, ກະຊວງການຕ່າງປະເທດ.... ບັນດາຜູ້ໃຫ້ຄຳຕອບໃນການປະຊຸມຂ່າວລ້ວນແຕ່ຢືນຢັນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນເດັດດຽວປັບໄໝລົງໂທດຕາມລະບຽບກົດໝາຍສຳລັບບັນດາເປົ້າໝາຍກໍ່ຄວາມວຸ່ນວາຍ, ທຳລາຍຄວາມເປັນລະບຽບຮຽບຮ້ອຍ ຮັບປະກັນຄວາມສະຫງົບປອດໄພກ່ຽວກັບຊີວິດອິນຊີ ແລະ ຊັບສິນຂອງບັນດາອົງການຈັດຕັ້ງ, ວິສາຫະກິດຂອງຕ່າງປະເທດພວມເຄື່ອນໄຫວຢູ່ຫວຽດນາມ, ໃນນັ້ນມີບັນດາວິສາຫະກິດຂອງຈີນ.
ທີ່ການປະຊຸມຂ່າວ, ທ່ານພົນຕີ ຮ່ວາງກົງຕື ຫົວໜ້າຕຳຫຼວດສືບສວນ ປ້ອງກັນຄວາມສະຫງົບ- ກະຊວງຕຳຫຼວດຫວຽດນາມໃຫ້ຮູ້ວ່າ : ບັນດາກໍລະນີກໍ່ຄວາມວຸ່ນວາຍ, ທຳລາຍຄວາມເປັນລະບຽບຮຽບຮ້ອຍຢູ່ບາງທ້ອງຖິ່ນຂອງຫວຽດນາມໃນເວລາທີ່ຜ່ານມາ ແມ່ນເປັນໜ້າເສຍດາຍທີ່ສຸດ. ມາຮອດປະຈຸບັນ, ນາຍົກລັດຖະມົນຕີຫວຽດນາມໄດ້ອອກຄຳສັ່ງ 4 ສະບັບສະເໜີໃຫ້ທຸກພາກສ່ວນ, ທ້ອງຖິ່ນຕ່າງໆທີ່ມີສ່ວນກ່ຽວຂ້ອງຈົ່ງແກ້ໄຂຢ່າງຂ້ຽວຂາດ. ການນຳບັນດາກະຊວງ, ຂະແໜງການຕ່າງໆ ທີ່ມີສ່ວນກ່ຽວຂ້ອງໄດ້ລົງ ຢ້ຽມຢາມຖາມຂ່າວບັນດາວິສາຫະກິດ, ພາລະກອນຊາວ ຕ່າງປະເທດ ແລະ ຫວຽດນາມຖືກເສຍຫາຍກໍຄືແລກປ່ຽນມາດຕະການເພືອ່ແກ້ໄຂ.
ສ່ວນທ່ານດັ້ງມິນຄອຍ ຜູ້ຊ່ວຍວຽກກະຊວງການຕ່າງປະເທດຫວຽດນາມໃຫ້ຮູ້ວ່າ : ດ້ວຍຄວາມຕັດສິນໃຈຢ່າງສູງຂອງລັດຖະບານ, ບັນດາກະຊວງ, ຂະແໜງການຕ່າງໆທີ່ມີສ່ວນກ່ຽວຂ້ອງນັ້ນ, ມາຮອດປະຈຸບັນສະພາບການຢູ່ບັນດາທ້ອງຖິ່ນເກີດຄວາມວຸ່ນວາຍ ໄດ້ກັບຄືນສູ່ປົກກະຕິ. ຄວາມສະຫງົບປອດໄພກ່ຽວກັບຊີວິດອິນຊີ ແລະ ຊັບສິນຂອງຊາວຕ່າງປະເທດຢູ່ຫວຽດນາມໄດ້ຮັບການຮັບປະກັນ. ບັນດາວິສາຫະກິດຂອງຫວຽດນາມ ແລະ ຕ່າງປະເທດເກືອບທັງໝົດໄດ້ຟື້ນຟູການເຄື່ອນໄຫວຜະລິດ, ດຳເນີນທຸລະກິດ;ຂອງຕົນເປັນປົກກະຕິ.