ທ່ານ ຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີວ່າການກະຊວງການຕ່າງປະເທດ ຫວຽດນາມ ແລະ ທ່ານ ຫວາງອີ້, ລັດຖະມົນຕີວ່າການກະຊວງການຕ່າງປະເທດ ຈີນ
ພາບ:dantri.com
|
(vovworld)-ຢູ່ນອກກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 48(AMM 48) ຢູ່ ກົວລາລຳເປີ ປະເທດມາເລເຊຍ, ວັນທີ 4/8, ທ່ານ ຟ້າມບີງມີງ, ຮອງນາຍົກລັດຖະມົນຕີ, ທັງເປັນລັດຖະມົນຕີວ່າການກະຊວງການຕ່າງປະເທດ ຫວຽດນາມ ໄດ້ພົບປະກັບ ທ່ານ ຫວາງອີ້, ລັດຖະມົນຕີວ່າການກະຊວງການຕ່າງປະເທດ ຈີນ. ທີ່ການພົບປະ, ສອງຝ່າຍໄດ້ແລກປ່ຽນກ່ຽວກັບການຊຸກຍູ້ ແລະ ກະກຽມໃຫ້ບັນດາການຢ້ຽມຢາມຂອງການນຳຂັ້ນສູງສອງປະເທດໃນໄລຍະຈະມາເຖິງເປັນຢ່າງດີ. ສອງຝ່າຍກໍເຫັນດີ ເພີ່ມທະວີການຮ່ວມມືລະຫວ່າງກະຊວງການຕ່າງປະເທດຂອງສອງປະເທດ, ເສີມຂະຫຍາຍບົດບາດແມ່ນອົງການປະສານງານຂອງຄະນະກຳມະການຊີ້ນຳການຮ່ວມມືສອງຝ່າຍ, ເພີ່ມທະວີການຮ່ວມມືຢ່າງແທດຈິງໃນບັນດາຂົງເຂດ, ເປັນຕົ້ນແມ່ນເສດຖະກິດ, ການຄ້າ, ການລົງທຶນ ແລະ ການກໍ່ສ້າງພື້ນຖານໂຄງລ່າງ. ສອງຝ່າຍໄດ້ແລກປ່ຽນຢ່າງກົງໄປກົງມາກ່ຽວກັບບັນຫາທະເລຕາເວັນອອກ. ທ່ານຮອງນາຍົກລັດຖະມົນຕີ ຟ້າມບີງມີງ ຢືນຢັນ: ຫວຽດນາມ ມີຄວາມວິຕົກກັງວົນທີ່ສຸດຕໍ່ບັນດາການເຄື່ອນໄຫວເປີດກວ້າງ, ບູລະນະ, ກໍ່ສ້າງເກາະຫີນ, ເຮັດໃຫ້ສະພາບເດີມຢູ່ທະເລຕາເວັນອອກປ່ຽນແປງ ແລະ ເນັ້ນຫນັກວ່າ ນີ້ກໍແມ່ນຄວາມສົນໃຈຢ່າງເລິກເຊິ່ງຂອງບັນດາປະເທດ ອາຊຽນ ເພາະບັນຫານີ້ສົ່ງຜົນສະທ້ອນໂດຍກົງເຖິງການຮັກສາສັນຕິພາບ, ສະຖຽນລະພາບ ແລະ ຢືນຢັນວ່າ: ຈີນ ແມ່ນຄູ່ຮ່ວມມືສຳຄັນທີ່ສຸດຂອງ ອາຊຽນ, ບັນດາປະເທດ ອາຊຽນ ປາດຖະຫນາວ່າການພົວພັນລະຫວ່າງ ອາຊຽນ ແລະ ຈີນ ຈະພັດທະນາຢ່າງປອດໃສ. ການແກ້ໄຂບັນຫາທະເລຕາເວັນອອກເປັນຢ່າງດີ ຈະປະກອບສ່ວນເພີ່ມທະວີການພົວພັນ ລະຫວ່າງ ອາຊຽນ ແລະ ຈີນ. ທ່ານ ຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນ ໄດ້ຢືນຢັນວ່າ: ຈີນ ພ້ອມແລ້ວທີ່ຈະສືບຕໍ່ເພີ່ມທະວີການພົບປະແລກປ່ຽນຂັ້ນສູງລະຫວ່າງສອງພັກ, ສອງລັດ, ເພີ່ມທະວີການແລກປ່ຽນຍຸດທະສາດລະຫວ່າງສອງຝ່າຍ, ເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງຢ່າງເລິກເຊິ່ງຂຶ້ນຕື່ມ, ການແກ້ໄຂຄວາມບໍ່ລົງລອຍກັນຢ່າງສົມເຫດສົມຜົນ, ຊຸກຍູ້ການພົວພັນແລກປ່ຽນການຮ່ວມມືໃນບັນດາຂົງເຂດໃຫ້ບັນລຸຄວາມຄືບຫນ້າໃຫມ່ ແລະ ປາດຖະຫນາຢາກເສີມຂະຫຍາຍບັນດາກົນໄກຮ່ວມມື ອາຊຽນ - ຈີນ ໃນການແກ້ໄຂບັນດາຄວາມຂັດແຍ້ງຢູ່ ທະເລຕາເວັນອອກ, ໃນນັ້ນ ມີຂໍ້ສະເຫນີຄຸ້ມຄອງຄວາມສ່ຽງຢູ່ທະເລ.