(vovworld) - ວັນທີ 03/06, ຄະນະປະຕິບັດງານຂອງຄະນະກຳມະການຊົນເຜົ່າຈີນ ໂດຍທ່ານ ລີຈາວ, ຮອງລັດຖະມົນຕີ, ຮອງຫົວໜ້າຄະນະກຳມະການຊົນເຜົ່າ ເປັນຫົວໜ້າຄະນະໄດ້ມາຢ້ຽມຢາມ ແລະ ຊອກຮູ້ວຽກງານຊົນເຜົ່າກັບບັນດາອົງການປະຈຳການຄະນະຊີ້ນຳເຂດ ໄຕບັ໋ກ (ໝາຍເຖິງທິດຕາເວັນຕົກສຽງເໜືອ). ທີ່ການເຮັດວຽກ, ທ່ານນາງ ຮ່ວາງທິແຮ້ງ, ຮອງລັດຖະມົນຕີ, ຮອງຫົວໜ້າຄະນະຊີ້ນຳເຂດໄຕບັ໋ກ, ເນັ້ນໜັກວ່າ: ໃນຊຸມປີຜ່ານມາ, ຫວຽດນາມ ໄດ້ມີບັນດານະໂຍບາຍເພື່ອໜູນຊ່ວຍການພັດທະນາເສດຖະກິດສັງຄົມໃຫ້ເຂດຊົນເຜົ່າສ່ວນໜ້ອຍ ໃນທົ່ວປະເທດເວົ້າລວມ ແລະ ປະຊາຊົນເຜົ່າສ່ວນໜ້ອຍເຂດໄຕບັ໋ກ ເວົ້າສະເພາະ. ຢູ່ເຂດໄຕບັ໋ກ, ປະຊາຊົນເຜົ່າສ່ວນໜ້ອຍໃນເຂດໄດ້ຮັບການປັບປຸງນັບທັງທາງດ້ານວັດຖຸ ແລະ ຈິດໃຈຢ່າງເຫັນໄດ້ຊັດ. ທ່ານນາງ ຮ່ວາງທິແຮ້ງ ຢືນຢັນວ່າ: ເລື່ອງຄະນະປະຕິບັດງານຂອງຄະນະກຳມະການຊົນເຜົ່າຈີນ ມາຊອກຮູ້, ແລກປ່ຽນຂໍ້ມູນ, ແບ່ງປັນບົດຮຽນ ແລະ ຮ່ວມມືຈະເພີ່ມທະວີການພົວພັນມິດຕະພາບລະຫວ່າງ 2 ປະເທດ, ກໍຄືການຮ່ວມມືລະຫວ່າງບັນດາເຂດຕິດກັບຊາຍແດນຫວຽດນາມ ແລະ ຈີນ. ພ້ອມທັງແມ່ນໂອກາດເພື່ອໃຫ້ 2 ຝ່າຍຮ່ຳຮຽນເອົາບົດຮຽນເຊິ່ງກັນ ແລະ ກັນ ເພື່ອຍົກສູງປະສິດທິຜົນໃນການລົງທຶນ, ພັດທະນາເສດຖະກິດສັງຄົມໃນເຂດຊົນເຜົ່າສ່ວນໜ້ອຍຂອງແຕ່ລະປະເທດ.