(ພາບປະກອບ)
(vovworld) - ຫວຽດນາມ ແລະ ຈີເລ ເພີ່ມທະວີການພົບປະແລກປ່ຽນປະຊາຊົນ, ສະຖານທູດ ຫວຽດນາມ ສົມທົບກັບສະຖາບັນວັດທະນະທຳ ຈີເລ - ຫວຽດນາມ ຫາກໍຈັດຕັ້ງການພົບປະສັງສັນມິດຕະພາບກັບບັນດານັກຂ່າວ ຈີເລ ເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນສ້າງຕັ້ງຂະແໜງການທູດ ຫວຽດນາມ (28/8/1945). ທີ່ການພົບປະ, ທ່ານນາງ Patricia Abarzua, ປະທານສະຖາບັນວັດທະນະທຳ ຈີເລ - ຫວຽດນາມ, ສະໜອງຂ່າວກ່ຽວກັບສະພາບການ ອາຊີຕາເວັນອອກສຽງໃຕ້, ການພົວພັນຂອງບັນດາປະເທດ ສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ) ກັບ ຈີເລ. ທ່ານນາງ Patricia Abarzua ເນັ້ນໜັກພິເສດວ່າ: ບັນດາການຂັດແຍ້ງອະທິປະໄຕໃນປະຈຸບັນຢູ່ທະເລຕາເວັນອອກ ກໍຄືຜົນສະທ້ອນຕ່າງໆຂອງບັນຫານີ້ ເຖິງພາກພື້ນ ອາເມລິກາລາຕິນ ເວົ້າລວມ ແລະ ຈີເລ ເວົ້າສະເພາະ. ເມື່ອຕອບສຳພາດຕໍ່ບັນດານັກຂ່າວ ຈີເລ ກ່ຽວກັບບັນຫາທະເລຕາເວັນອອກ, ທ່ານເອກອັກຄະລັດຖະທູດ ຫວຽດນາມ ປະຈຳ ຈີເລ ໂງດືກທັງ ຢືນຢັນວ່າ: ຫຼັກໝັ້ນຂອງ ຫວຽດນາມ ແມ່ນແກ້ໄຂບັນຫາບໍ່ລົງລອຍກັນດ້ວຍສັນຕິວິທີ, ບົນພື້ນຖານກົດໝາຍສາກົນ. ພ້ອມທັງຮັກສາສະພາບໄວ້ຄືເກົ່າ ແລະ ບໍ່ປະຕິບັດບັນດາການກະທຳ ຊຶ່ງເຮັດໃຫ້ຄວາມເຄັ່ງຕຶງໃນພາກພື້ນເພີ່ມຂຶ້ນ ແລະ ສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ. ບັນດານັກຂ່າວ ຈີເລ ໄດ້ສະແດງຄວາມສົມໃຈຕໍ່ບັນຫາທະເລຕາເວັນອອກ ແລະ ສະໜັບສະໜູນຫຼັກໝັ້ນຂອງ ຫວຽດນາມ, ພ້ອມທັງວິຕົກກັງວົນຕໍ່ການຜັນແປທີ່ເຄັ່ງຕຶງຢູ່ທະເລຕາເວັນອອກ ຈະມີຜົນກະທົບຢ່າງຫຍໍ້ທໍ້ເຖິງການພົວພັນດ້ານການຄ້າຂອງ ຈີເລ ທີ່ມີຕໍ່ ອາຊີຕາເວັນອອກສຽງໃຕ້ ແລະ ທາງຂົນສົ່ງສິນຄ້າສາກົນທີ່ຜ່ານເຂດທະເລນີ້.