(vovworld) – ຕອນບ່າຍວັນທີ 17/9, ຢູ່ນະຄອນຫຼວງໂຕກຽວ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ມີການໂອ້ລົມ ແລະ ພົບປະກັບຜູ້ຕາງໜ້າປະຊາຊົນຍີ່ປຸ່ນ ທຸກຊັ້ນວັນນະ. ດ້ວຍຫົວຂໍ້ “ວິໄສທັດກ່ຽວກັບການພັດທະນາການພົວພັນຫວຽດນາມ - ຍີ່ປຸ່ນ ເພື່ອສັນຕິພາບ ແລະ ຄວາມວັດທະນາຖາວອນຂອງອາຊີ“ ໃນນັ້ນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ຢືນຢັນປະຫວັດແຫ່ງການພົວພັນລະຫວ່າງສອງປະເທດ, ກໍ່ຄືໄຈ້ແຍກກ່ຽວກັບການຜັນແປຢູ່ພາກພື້ນ ແລະ ໂລກໃນປະຈຸບັນ, ດ້ວຍການທ້າທາຍ ແລະ ກາລະໂອກາດໃນການພັດທະນາເສດຖະກິດ, ຄວາມເຄັ່ງຕຶງຍ້ອນການຂັດແຍ້ງຜືນແຜ່ນດິນ, ທະເລເກາະ, ໃນນັ້ນມີສະພາບການຢູ່ທະເລຕາເວັນອອກໃນໄລຍະຜ່ານມາ.
“ພວກຂ້າພະເຈົ້າເຊື່ອໝັ້ນວ່າ ເພື່ອໃຫ້ອາຊີ ປາຊີຟິກມີສັນຕິພາບ, ສະຖຽນລະພາບ, ຮ່ວມມື ແລະ ວັດທະນາຖາວອນ, ຮຽກຮ້ອງໃຫ້ທຸກປະເທດໃນພາກພື້ນ, ພິເສດແມ່ນບັນດາປະເທດໃຫຍ່, ຕ້ອງມີການກະທຳຢ່າງໂປ່ງໃສ, ມີຄວາມຮັບຜິດຊອບໃນການພົວພັນນຳກັນ ກໍ່ຄືຜົນປະໂຫຍດລວມຂອງທັງພາກພື້ນ ແລະ ໂລກ. ພ້ອມກັນນັ້ນຕ້ອງມານະພະຍາຍາມ ເພື່ອບັນລຸໄດ້ບັນດາຂໍ້ຕົກລົງ ແລະ ກົນໄກທີ່ມີປະໂຫຍດ ເພື່ອຮັກສາສັນຕິພາບ, ສະຖຽນລະພາບ, ຮັບປະກັນຄວາມສະຫງົບປອດໄພລວມ, ສະກັດກັ້ນການປະທະກັນ ແລະ ສົງຄາມ, ເພີ່ມທະວີການຮ່ວມມື ເພື່ອຮັບມືກັບການທ້າທາຍດ້ານຄວາມສະຫງົບປອດໄພຢ່າງມີປະສິດທິຜົນ"
ທ່ານເລຂາທິການໃຫຍ່ ຫງວຽນຟຸຈ້ອງ ໄດ້ເນັ້ນໜັກເຖິງບັນດາເນື້ອໃນຕົ້ນຕໍ່ກ່ຽວກັບວິໄສທັດໃຫ້ແກ່ການພັດທະນາລະຫວ່າງຫວຽດນາມ - ຍີ່ປຸ່ນ ໃນໄລຍະຈະມາເຖິງ.
“ເພີ່ມທະວີການພົວພັນມິດຕະພາບ ແລະ ການຮ່ວມມືລະຫວ່າງ ຫວຽດນາມ - ຍ່ີ່ປຸ່ນ ແມ່ນເໝາະສົມກັບຜົນປະໂຫຍດຂອງປະຊາຊົນ 2 ປະເທດ, ຂອງພາກພື້ນ ແລະ ໂລກ. ສະນັ້ນ, ຫວຽດນາມ ໄດ້ກຳນົດ ຍີ່ປຸ່ນແມ່ນຄູ່ຮ່ວມມືສຳຄັນອັນດັບໜຶ່ງ ແລະ ຍາວນານຂອງຫວຽດນາມ. ໃນໄລຍະຈະມາເຖິງ, 2 ປະເທດຕ້ອງມານະພະຍາຍາມສືບຕໍ່ຊຸກຍູ້ຮອບດ້ານແລະ ເຮັດໃຫ້ການພົວພັນຄູ່ຮ່ວມມືຍຸດທະສາດເລິກເຊິ່ງ, ກວ້າງຂວາງລະຫວ່າງ 2 ປະເທດເລິກເຊິ່ງກວ່າອີກ, ຕາມທິດເພີ່ມທະວີຄວາມໄວ້ເນື້ອເຊື່ອໃຈ, ເຊື່ອມຕໍ່ດ້ານເສດຖະກິດ, ເປີດກ້ວາງການຮ່ວມມື, ພັດທະນາແບບຍືນຍົງ ແລະ ມຸ່ງໄປສູ່ອະນາຄົດ”.