ທ່ານ Jean Noel Poirier ເອກອັກຄະລັດຖະທູດຝຣັ່ງ ປະຈຳ ຫວຽດນາມ ແລະ ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ
(ພາບ: VGP/Quang Hiếu)
(vovworld)- ຕອນບ່າຍ ວັນທີ 25/8, ທີ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ໃຫ້ການຕ້ອນຮັບ ທ່ານ Jean Noel Poirier ເອກອັກຄະລັດຖະທູດຝຣັ່ງ ປະຈຳ ຫວຽດນາມ. ທີ່ການຕ້ອນຮັບ, ທ່ານ ນາຍົກລັດຖະມົນຕີ ຫງວຽນຊວນຟຸກ ໄດ້ສະແດງຄວາມປິຕິຊົມຊື່ນທີ່ໄດ້ຕ້ອນຮັບ ທ່ານ Jean Noel Poirier ເອກອັກຄະລັດຖະທູດຝຣັ່ງ ປະຈຳ ຫວຽດນາມ, ພ້ອມທັງຢືນຢັນວ່າ: ໃນໄລຍະຜ່ານມາ ຝຣັ່ງ ແລະ ຫວຽດນາມ ມີການພົວພັນທີ່ເປັນມູນເຊື້ອອັນດີງາມ, ໄດ້ມີບັນດາລາຍການ, ໂຄງການຮ່ວມມືແທດຈິງ ແລະ ນຳມາເຊິ່ງປະສິດທິຜົນ ໃນຫຼາຍຂົງເຂດ ເສດຖະກິດ, ການຄ້າ, ວັດທະນະທຳ. ທ່ານ ນາຍົກລັດຖະມົນຕີ ຖືວ່າ: ການຢ້ຽມຢາມຫວຽດນາມ ຂອງ ທ່ານ Francois Hollande ປະທານາທິບໍດີຝຣັ່ງ ທີ່ຈະມາເຖິງ ຈະປະກອບສ່ວນປັບປຸງການພົວພັນສອງຝ່າຍກວ່າອີກ, ເປັນຕົ້ນແມ່ນ ໃນສະພາບການສອງປະເທດ ພວມສູ້ຊົນສ້າງການພົວພັນຄູ່ຮ່ວມມືຍຸດທະສາດ ໃຫ້ເລິກເຊິ່ງ ແລະ ຮອບດ້ານ. ທ່ານ ນາຍົກລັດຖະມົນຕີ ກໍ່ໄດ້ສະແດງຄວາມເຫັນດີ ຕໍ່ບັນດາການຕີລາຄາ ຂອງ ທ່ານ ເອກອັກຄະລັດຖະທູດ, ນັ້ນແມ່ນການຮ່ວມມືດ້ານເສດຖະກິດ ເປັນເສົ້າຄ້ຳບຸລິມະສິດ ຂອງຄູ່ຮ່ວມມືຍຸດທະສາດ ຫວຽດນາມ-ຝຣັ່ງ. ໃນນັ້ນ, ກອງປະຊຸມເຈລະຈາ ຄັ້ງທີ 4 ໃນເດືອນ 7 ຜ່ານມາ ຢູ່ Paris ສະແດງໃຫ້ເຫັນວ່າ: ສອງຝ່າຍຄວນສືບຕໍ່ສ້າງບັນດາທິດທາງການຮ່ວມມືເປັນຈຸດສຸມ, ຕອບສະໜອງບັນດາຄວາມຕ້ອງການພັດທະນາ ຂອງສອງປະເທດ. ບົນຈິດໃຈນັ້ນ, ທ່ານ ນາຍົກລັດຖະມົນຕີ ສະໜັບສະໜູນບັນດາເນື້ອໃນການຮ່ວມມື ເຊິ່ງທ່ານ ເອກອັກຄະລັດຖະທູດ ຍົກອອກມາ, ໃນນັ້ນມີຂົງເຂດເຕັກໂນໂລຢີດາວທຽມ, ການເດີນອາກາດ, ໂຄງການທາງລົດໄຟ ຢູ່ຮ່າໂນ້ຍ ກໍ່ຄືການຮ່ວມມືໃນບັນດາຂົງເຂດການສຶກສາ, ວັດທະນະທຳ.
ສ່ວນ ທ່ານ Jean Noel Poirier ເອກອັກຄະລັດຖະທູດຝຣັ່ງ ປະຈຳ ຫວຽດນາມ ຖືວ່າການຢ້ຽມຢາມ ຂອງ ທ່ານ Francois Hollande ປະທານາທິບໍດີຝຣັ່ງ ທີ່ຈະມາເຖິງ ເປັນການຢືນຢັນວ່າ ຝຣັ່ງສືບຕໍ່ປາດຖະໜາຢາກຮ່ວມເດີນທາງພ້ອມກັບຫວຽດນາມ ໃນວິວັດແຫ່ງການພັດທະນາ, ຄືດັ່ງຝຣັ່ງໄດ້ເດີນທາງພ້ອມກັບການພັດທະນາ ຂອງຫວຽດນາມ ໃນ 20 ປີທີ່ຜ່ານມາ.