ບັນດາຜູ້ແທນເຂົ້າຮ່ວມກອງປະຊຸມສຳມະນາຖ່າຍຮູບທີ່ລະນຶກ
|
(vovworld) - ໃນຂອບເຂດການຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການຂອງຄະນະຜູ້ແທນຂັ້ນສູງ ສະພາແຫ່ງຊາດລາວ, ຕອນເຊົ້າວັນທີ 7/3, ຢູ່ຮ່າໂນ້ຍ, ໄດ້ດຳເນີນກອງປະຊຸມສຳມະນາ “ແບ່ງຂັ້ນຄຸ້ມຄອງຢູ່ລາວ ແລະ ຫວຽດນາມ, ບັນດາບົດຮຽນຂອງສະພາແຫ່ງຊາດ ໃນການແບ່ງຂັ້ນຄຸ້ມຄອງຢູ່ບັນດາແຂວງ, ນະຄອນ ແລະ ຂອງລັດຖະບານຢູ່ສູນກາງ, ແຂວງ, ເມືອງ, ຕາແສງ”. ກ່າວຄຳເຫັນໄຂກອງປະຊຸມສຳມະນາ, ທ່ານນາງປະທານສະພາແຫ່ງຊາດ ລາວ ປານີ ຢ່າທໍ່ຕູ້ ຖືວ່າ ນີ້ແມ່ນຫົວຂໍ້ໂດຍ ສະພາແຫ່ງຊາດ 2 ປະເທດ ພ້ອມກັນເອົາໃຈໃສ່, ຕອບສະໜອງຄວາມຮຽກຮ້ອງຕ້ອງການຕົວຈິງໃນການຄຸ້ມຄອງບໍລິຫານລັດ ຂອງແຕ່ລະປະເທດໃນໄລຍະໃໝ່. ພ້ອມກັນນັ້ນກໍ່ແມ່ນໂອກາດເພື່ອໃຫ້ 2 ຝ່າຍໄດ້ແບ່ງປັນບົດຮຽນ, ຂໍ້ມູນຂ່າວ ແລະ ສິ່ງທ້າທາຍຕໍ່ການແບ່ງຂັ້ນຄຸ້ມຄອງບໍລິຫານລັດຢູ່ແຕ່ລະປະເທດ. ທ່ານນາງປະທານສະພາແຫ່ງຊາດລາວ ປານີ ຢ່າທໍ່ຕູ້ ຫວັງວ່າ, ຜ່ານກອງປະຊຸມສຳມະນາຄັ້ງນີ້, ສະພາແຫ່ງຊາດລາວ ພ້ອມກັນແລກປ່ຽນບົດຮຽນໃນຂົງເຂດນີ້ກັບບັນດາເພື່ອນຮ່ວມງານ ຫວຽດນາມ ເພື່ອເປັນບ່ອນອີງໃນກການຄົ້ນຄ້ວາ, ປັບປຸງ ຫຼື ສ້າງສຳເລັດ ເອກະສານ, ນະໂຍບາຍໃຫ້ສົມບູນແບບ. ກ່າວຄຳເຫັນສະຫລຸບກອງປະຊຸມສຳມະນາ, ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ຖືວ່າ:
“ເລື່ອງ ຫວຽດນາມ ແລະ ລາວ ສົມທົບກັນຈັດຕັ້ງບັນດາກອງປະຊຸມສຳມະນາຫົວເລື່ອງສະເພາະໄດ້ ແລະ ພວມມຸ່ງໄປເຖິງການສ້າງກົນໄກປະຈຳ, ເໝາະສົມກັບເນື້ອໃນຈິດໃຈຂອງກົມການເມືອງ 2 ປະເທດ, ກໍ່ຄືຕາມການກຳນົດທິດຮ່ວມມືລະຫວ່າງ 2 ສະພາແຫ່ງຊາດ ກ່ຽວກັບການຍົກສູງປະສິດທິຜົນ ຮ່ວມມືລະຫວ່າງ 2 ປະເທດ, ພິເສດແມ່ນໃນວຽກງານສ້າງກົດໝາຍ. ບົນຈິດໃຈນັ້ນ, ຂ້າພະເຈົ້າຊົມເຊີຍ, ສະໜັບສະໜູນ ແລະ ສະເໜີໃຫ້ສະພາແຫ່ງຊາດ 2 ປະເທດ ກໍ່ຄືບັນດາອົງການຂອງ ສະພາແຫ່ງຊາດ 2 ປະເທດສືບຕໍ່ສົມທົບນຳກັນຈັດຕັ້ງບັນດາກອງປະຊຸມ, ກອງປະຊຸມສຳມະນາຫົວເລື່ອງສະເພາະອື່ນໆໃນໄລຍະຈະມາເຖິງ.”