(vovworld) - ຫວຽດນາມແລະສະຫະພັນລັດເຊຍ ເຫັນດີຊຸກຍູ້ການຮ່ວມມືດ້ານເສດຖະກິດ, ການຄ້າ2ຝ່າຍໃນໄລຍະຈະມາເຖິງ. ນີ້ແມ່ນໜຶ່ງໃນບັນດາເນື້ອໃນທີ່ໄດ້ນຳມາປຶກສາຫາລືໃນການເຈລະຈາໃນວັນທີ 16/12, ຢູ່ຮ່າໂນ້ຍ, ລະຫວ່າງທ່ານຮອງນາຍົກລັດຖະມົນຕີຫວຽດນາມ ຮ່ວາງຈຸງຫາຍ ແລະ ທ່ານຮອງນາຍົກລັດຖະມົນຕີຜູ້ທີໜຶ່ງສະຫະພັນລັດເຊຍ Igor Shvalov, ປະທານຮ່ວມຄະນະກຳມາທິການລະຫວ່າງລັດຖະບານຫວຽດນາມ - ສະຫະພັນລັດເຊຍ ກ່ຽວກັບການຮ່ວມມືດ້ານເສດຖະກິດ, ການຄ້າ ແລະ ວິທະຍາສາດ, ເຕັກນິກ. ເມື່ອແລກປ່ຽນກ່ຽວກັບຂົງເຂດການຄ້າ, 2 ຝ່າຍໄດ້ເປັນເອກະພາບນຳກັນຍູ້ແຮງການຮັບຮອງເອົາສັນຍາການຄ້າເສລີ (FTA) ລະຫວ່າງຫວຽດນາມ ແລະ ສະຫະພັນເສດຖະກິດອາຊີ - ເອີລົບ. ກ່ຽວກັບການຮ່ວມມືໃນຂົງເຂດພະລັງງານ, 2 ຝ່າຍ ສຸມໃສ່ປຶກສາຫາລືບັນດາບັນຫາກ່ຽວຂ້ອງເຖິງການຜັນຂະຫຍາຍໂຄງການໂຮງງານໄຟຟ້ານິວເຄຼຍ ນິງທ້ວນ ເລກ 1, ບັນດາໂຄງການໃນຂົງເຂດນ້ຳມັນອາຍແກັດ ແລະ ໄຟຟ້າ. ນາຍົກລັດຖະມົນຕີ 2 ທ່ານ ປາດຖະໜາຢາກສີບຕໍ່ເສີມຂະຫຍາຍ ແລະ ເປີດກວ້າງສູ່ບັນດາໂຄງການໃໝ່ຢູ່ໄຫຼ່ທະວີບຂອງຫວຽດນາມ, ເຂດດິນແດນສະຫະພັນລັດເຊຍ ແລະ ປະເທດທີ 3…
ສິ້ນສຸດການເຈລະຈາ, ຮອງນາຍົກລັດຖະມົນຕີ 2 ທ່ານ ໄດ້ລົງນາມໃນບົດບັນທຶກກອງປະຊຸມ ເພື່ອແນໃສ່ຮັບຮູ້ບັນດາຜົນງານທີ່ບັນລຸໄດ້ ກໍຄືໃຫ້ຄຳໝັ້ນສັນຍາຊຸກຍູ້ການຮ່ວມມືໃນໄລຍະຈະມາເຖິງ.