ຫວຽດນາມແລະໂຮນລັງຮ່ວມມືພ້ອມກັບປະຊາຄົມໂລກຮັບມືກັບການປ່ຽນແປງຂອງດິນຟ້າອາກາດ
ກອງປະຊຸມຂັ້ນສູງກ່ຽວກັບການສົມທົບກັນພັດທະນາສັງລວມເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ
(vovworld) – ໃນຂອບເຂດການຢ້ຽມຢາມຫວຽດນາມ ຢ່າງເປັນທາງການ, ຕອນເຊົ້າວັນທີ 17/6, ຢູ່ຮ່າໂນ້ຍ, ທ່ານນາຍົກລັດຖະມົນຕີ ໂຮນລັງ Mark Rutte ພ້ອມກັບທ່ານນາຍົກລັດຖະມົນຕີ ຫງວຽນເຕີນຢູ້ງ ເປັນປະທານຮ່ວມກອງປະຊຸມຂັ້ນສູງກ່ຽວກັບການສົມທົບກັນພັດທະນາສັງລວມເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ໂດຍກະຊວງຊັບພະຍາກອນ ແລະ ສິ່ງແວດລ້ອມສົມທົບກັບສະຖານທູດ ໂຮນລັງ ປະຈຳຫວຽດນາມ ຈັດຕັ້ງ. ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ຊີ້ແຈ້ງທັດສະນະຂອງລັດຖະບານ ຫວຽດນາມ ໃນການຮັບມືກັບການປ່ຽນແປງຂອງດິນຟ້າອາກາດ ແລະ ການພັດທະນາເສດຖະກິດສັງຄົມຂອງເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ, ໃນນັ້ນສຸມໃສ່ລົງທຶນຢ່າງມີຈຸດສຸມເຂົ້າໃນບາງຂົງເຂດມີທ່າໄດ້ປຽບ. ທ່ານ ຫງວຽນເຕີນຢູ້ງ ເນັ້ນໜັກວ່າ:
“ຕາງໜ້າໃຫ້ລັດຖະບານ ຫວຽດນາມ, ຂ້າພະເຈົ້າຕີລາຄາສູງ ແລະ ຂໍຂອບອົກຂອບໃຈການຊ່ວຍເຫຼືອຂອງລັດຖະບານ ໂຮນລັງ, ຂອງທະນາຄານໂລກ ແລະ ບັນດາຄູ່ຮ່ວມມືພັດທະນາສະຫງວນໃຫ້ ຫວຽດນາມ ໃນໄລຍະຜ່ານມາ. ຫວຽດນາມ ຮຽກຮ້ອງໃຫ້ປະຊາຄົມໂລກ ສືບຕໍ່ໜູນຊ່ວຍໃນບັນດາຄວາມມານະພະຍາຍາມ ຮັບມືກັບການປ່ຽນແປງຂອງດິນຟ້າອາກາດໃຫ້ແກ່ ຫວຽດນາມ ເວົ້າລວມ ແລະ ເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ເວົ້າສະເພາະ. ລັດຖະບານ ຫວຽດນາມ ຍາມໃດກໍ່ເຄົາລົບ, ຄຸ້ມຄອງ ແລະ ນຳໃຊ້ທຶນ ODA ຢ່າງມີປະສິດທິຜົນ, ພ້ອມທັງໃຫ້ຄຳໝັ້ນສັນຍາສ້າງທຸກເງື່ອນໄຂສະດວກ, ປະກອບທຸກແຫຼ່ງກຳລັງເພື່ອເສີມຂະຫຍາຍບັນດາການໜູນຊ່ວຍຂອງນັກອຸປະຖຳໃຫ້ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ຢ່າງມີປະສິດທິຜົນ.”
ສ່ວນທ່ານນາຍົກລັດຖະມົນຕີ ໂຮນລັງ Mark Rutte, ເນັ້ນໜັກວ່າ:
“ປະຈຸບັນແມ່ນຈຸດເວລາຫັນຄຳເວົ້າເປັນການກະທຳ. ຂ້າພະເຈົ້າຢາກເນັ້ນໜັກວ່າ: ຄຳຮຽກຮ້ອງສ້າງຂອບເຂດການພັດທະນາຢ່າງແຮງຄືໄດ້ວາງອອກໃນຖະແຫຼງການຂອງບັນດາຝ່າຍຄູ່ຮ່ວມມື ຕິດພັນກັບວິໄສທັດການພັດທະນາໃນເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ. ພວກຂ້າພະເຈົ້າມີຄວາມປິຕິຊົມຊື່ນທີ່ໄດ້ແບ່ງປັນຄວາມເຂົ້າອົກເຂົ້າໃຈ ແລະ ຄວາມຮູ້ເລິກເຊິ່ງຂອງຕົນກັບບັນດາເຂດທົ່ງພຽງອື່ນໃນໂລກ, ໃນນັ້ນມີເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ. ພວກເຮົາພ້ອມກັນຮ່ວມມືເພື່ອອາດຈະຫັນທິດສະດີເປັນພຶດຕິກຳຕົວຈິງເພື່ອໃຫ້ເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມພັດທະນາແບບຍືນຍົງ.”