ຫວຽດນາມ ໃຫ້ບຸລິມະສິດປົກປ້ອງແລະຊຸກຍູ້ສິດຂອງຄົນພິການ
(ພາບສຳນັກຂ່າວສານຫວຽດນາມ)
(vovworld) – ວັນທີ 14/06 ຢູ່ສຳນັກງານສະຫະປະຊາຊາດ ທີ່ນະຄອນ ນິວຢອກ ອາເມລິກາ, ໄດ້ດຳເນີນກອງປະຊຸມຄັ້ງທີ 9 ບັນດາຝ່າຍເຂົ້າຮ່ວມສົນທິສັນຍາສິດຂອງຄົນພິການ (CRPD) ດ້ວຍຫົວຂໍ້ວ່າ “ປະຕິບັດໂຄງການດຳເນີນງານ 2030 ໃຫ້ຄົນພິການ: ບໍ່ປະປ່ອຍຜູ້ໃດຢູ່ທາງຫລັງ”. ທ່ານນາງເອກອັກຄະລັດຖະທູດ ຫງວຽນເຟືອງງາ ຫົວໜ້າຄະນະປະຕິບັດງານ ຫວຽດນາມ ປະຈຳ ສປຊ, ຫົວໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມ, ເນັ້ນໜັກເຖິງໂຄງການດຳເນີນງານ 2030 ຂອງ ສປຊ ແລະ ບັນດາຈຸດໝາຍພັດທະນາແບບຍືນຍົງວ່າ ຄວນສ້າງບັນດາດັດຊະນີ, ຂໍ້ມູນສະຖິຕິກ່ຽວກັບຄົນພິການ ເພື່ອໜູນຊ່ວຍການກໍ່ສ້າງບັນດານະໂຍບາຍພັດທະນາທີ່ມີສ່ວນກ່ຽວຂ້ອງຄື ໜູນຊ່ວຍການປະຕິບັດ ແລະ ຕິດຕາມກວດກາ, ຕີລາຄາ ດ້ວຍການເຂົ້າຮ່ວມ, ປະກອບສ່ວນຂອງຄົນພິການ. ພ້ອມກັນນັ້ນ ທ່ານນາງເອກອັກຄະລັດຖະທູດ ຫງວຽນເຟືອງງາ ໃຫ້ຮູ້ວ່າ: ຫວຽດນາມ ມີຄົນພິການ 7,2 ລ້ານຄົນ. ຫວຽດນາມ ໄດ້ ແລະ ພວມມານະພະຍາຍາມຈົນສຸດຄວາມສາມາດ ຂອງຕົນເພື່ອໜູນຊ່ວຍຄົນພິການໃນບັນດາຂົງເຂດສົ່ງເສີມສຸຂະພາບ, ສຶກສາອົບຮົມເພື່ອເຊື່ອມຕົວເຂົ້າກັບສັງຄົມ, ສ້າງວຽກເຮັດງານທຳ…ທ່ານນາງເອກອັກຄະລັດຖະທູດ ເນັ້ນໜັກວ່າ: ລັດຖະບານ ຫວຽດນາມ ຍາມໃດກໍ່ສົ່ງເສີມ ແລະ ຊຸກຍູ້ການເຂົ້າຮ່ວມຈາກຫລາຍຝ່າຍໃນການໜູນຊ່ວຍຄົນພິການ; ບັນດາສະມາຄົມ, ອົງການຄົນພິການຢູ່ ຫວຽດນາມ ເຂົ້າຮ່ວມການກໍ່ສ້າງ ແລະ ປະຕິບັດບັນດານະໂຍບາຍກ່ຽວກັບຄົນພິການຢ່າງຕັ້ງໜ້າ.