ຫວຽດນາມໃຫ້ສັດຕະຍາບັນສົນທິສັນຍາຂອງສປຊກ່ຽວກັບ ສິດຂອງຄົນພິການ
(ພາບປະກອບຈາກ dantri.com.vn)
(vovworld) – ຕອນເຊົ້າວັນທີ 3/12, ຢູ່ຮ່າໂນ້ຍ, ກະຊວງແຮງງານ - ທະຫານເສຍອົງຄະ ແລະ ສັງຄົມຫວຽດນາມ ໄດ້ຈັດຕັ້ງພິທີສະເຫຼີມສະຫຼອງວັນສາກົນເພື່ອຄົນພິການ ແລະ ເຫດການຫວຽດນາມ ໃຫ້ສັດຕະຍາບັນສົນທິສັນຍາຂອງ ສປຊ ກ່ຽວກັບສິດຂອງຄົນພິການ. ກ່າວຄຳເຫັນທີ່ພິທີ, ທ່ານນາງລັດຖະມົນຕີວ່າການກະຊວງແຮງງານ - ທະຫານເສຍອົງຄະ ແລະ ສັງຄົມ ຟ້າມທິຫາຍຈ່ວຽນ ຢືນຢັນວ່າ: ເລື່ອງ ຫວຽດນາມ ໃຫ້ສັດຕະຍາບັນສົນທິສັນຍາແມ່ນຄຳໝັ້ນສັນຍາດ້ານການເມືອງຢ່າງແຮງໃນວຽກງານປົກປ້ອງ, ຊຸກຍູ້ເພື່ອການພັດທະນາ, ເພື່ອຜົນປະໂຫຍດສະຫງວນໃຫ້ຄົນພິການ. ນີ້ແມ່ນພື້ນຖານດ້ານກົດໝາຍເພື່ອໃຫ້ ຫວຽດນາມ ສະແດງທັດສະນະສະເໝີຕົ້ນສະເໝີປາຍຂອງຕົນທີ່ມີຕໍ່ຂົງເຂດສິດທິມະນຸດເວົ້າລວມ ແລະ ຄົນພິການເວົ້າສະເພາະ:
“ກະຊວງແຮງງານ - ທະຫານເສຍອົງຄະ ແລະ ສັງຄົມ ຈະຍື່ນສະເໜີຕໍ່ນາຍົກລັດຖະມົນຕີອະນຸດມັດຜ່ານແຜນການ, ການຈັດແບ່ງຄວາມຮັບຜິດຊອບຂອງບັນດາກະຊວງ, ຂະແໜງການ, ທ້ອງຖິ່ນ ແລະ ລະດົມການເຂົ້າຮ່ວມຂອງບັນດາອົງການເພື່ອຜັນຂະຫຍາຍສົນທິສັນຍາຢ່າງມີປະສິດທິຜົນ. ບັນດາກະຊວງ, ຂະແໜງການ, ອົງການກ່ຽວຂ້ອງ, ບຸກຄົນທັງຢູ່ພາຍໃນ ແລະ ຕ່າງປະເທດຈະພ້ອມກັນຮ່ວມແຮງຮ່ວມໃຈເພື່ອຜັນຂະຫຍາຍ, ປະຕິບັດສົນທິສັນຍາຂອງ ສປຊ ກ່ຽວກັບສິດຂອງຄົນພິການຢ່າງມີປະສິດທິຜົນ, ສ້າງສຳເລັດນະໂຍບາຍ, ກົດໝາຍສຳລັບຄົນພິການເພື່ອແນໃສ່ຮັບປະກັນ, ປົກປ້ອງສິດ ແລະ ຜົນປະໂຫຍດອັນຖືກຕ້ອງຂອງຄົນພິການໃນທຸກໆຂົງເຂດ.”