ຜູ້ແທນກ່າວຄຳເຫັນທີ່ກອງປະຊຸມ
|
(vovworld) - ຕອນເຊົ້າວັນທີ 21/12, ທີ່ຮ່າໂນ້ຍ, ສະຫະສະມາຄົມອິນເຕີແນັດຫວຽດນາມໄດ້ຈັດຕັ້ງວັນອິນເຕີແນັດ 2016 ດ້ວຍຫົວຂໍ້ວ່າ “ການປະກອບສ່ວນຂອງເນື້ອໃນດີຈີຕອນໃຫ້ພື້ນຖານເສດຖະກິດອິນເຕີແນັດ” ທີ່ເວທີປາໄສ, ນັກບັນລະຍາຍຫຼາຍຄົນໄດ້ໃຫ້ຂໍ້ສັງເກດວ່າ ປະຈຸບັນຂະແໜງເນື້ອໃນດີຈີຕອນຂອງຫວຽດນາມ ຫາກໍ່ສຸມໃສ່ເຂົ້າໃນແງ່ມູມຕິດຕໍ່ພົວພັນ, ບັນເທີງ ແລະ ສື່ສານເທົ່ານັ້ນ, ສ່ວນຂົງເຂດຍັງມີຄວາມສຳຄັນອື່ນອີກຄື: ການສຶກສາ, ການຄ້າເອເລັກໂຕນິກຍັງມີສິ່ງທ້າທາຍຫຼາຍຢ່າງ. ກ່າວຄຳເຫັນທີ່ເວທີປາໄສ, ທ່ານ ຫງວຽນແທ່ງຮຶງ ຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານຫວຽດນາມ ໃຫ້ຮູ້ວ່າ ພື້ນຖານເສດຖະກິດດີຈີຕອນແມ່ນບາດກ້າວພັດທະນາທີ່ຈຳເປັນ, ເໝາະສົມກັບທ່າອ່ຽງ ເມື່ອພື້ນຖານເສດຖະກິດສື່ສານພວມຄ່ອຍໆອີ່ມຕົວ. ການໝູນໃຊ້ເຕັກໂນໂລຊີຂໍ້ມູນຂ່າວສານເຂົ້າໃນການເຄື່ອນໄຫວທັງໝົດຂອງພື້ນຖານເສດຖະກິດຕາມທິດມີປະສິດທິຜົນກວ່າ, ໄດ້ດີກວ່າ ແລະ ເລິກເຊິ່ງກວ້າງຂວາງກວ່າ ໄດ້ສ້າງເປັນພື້ນຖານເສດຖະກິດດີຈີຕອນບໍ່ມີພົມແດນ, ນຳມາເຊິ່ງຄຸນຄ່າກຳໄລສູງ. ສະນັ້ນ, ພື້ນຖານເສດຖະກິດດີຈີຕອນຈະສ້າງເງື່ອນໄຂສະດວກຫຼາຍຢ່າງ ເພື່ອຊຸກຍູ້ ແລະ ພັດທະນາຂະແໜງອຸດສາຫະກຳເນື້ອໃນດີຈີຕອນໃຫ້ກາຍເປັນປາຍແຫຼມຂອງຂະແໜງເຕັກໂນໂລຊີຂໍ້ມູນຂ່າວສານ. ທ່ານ ຫງວຽນແທ່ງຮຶງ ໃຫ້ຮູ້ວ່າ:
“ໃນໄລຍະຈະມາເຖິງ, ເພື່ອໝູນໃຊ້ບັນດາທ່າແຮງຂອງຫວຽດນາມໃນພື້ນຖານເສດຖະກິດດີຈີຕອນ, ສິ່ງຮີບດ່ວນສຳລັບບັນດາຜູ້ຮັບຜິດຊອບດ້ານເຄືອຂ່າຍອິນເຕີແນັດໃນປະຈຸບັນແມ່ນຕ້ອງປ່ຽນແປງຈີນຕະນາການ, ຍູ້ແຮງຄວາມຄືບໜ້າໃນການພັດທະນາ ແລະ ຍົກສູງຄຸນນະພາບພື້ນຖານໂຄງລ່າງ, ສຸມໃສ່ສ້າງລະບົບຊີວະພາບບົນພື້ນຖານໂຄງລ່າງ, ຜ່ານນັ້ນອານຸຍາດໃຫ້ບັນດາວິສາຫະກິດເນື້ອໃນດີຈີຕອນອື່ນມີຄວາມເສລີໃນການປະດິດສ້າງ”.