ຫົວໜ້າຄະນະແຫ່ຂະບວນປະທ້ວງໄທ ຖະແຫຼງ ຍຸບເລີກການປິດລ້ອມ ບາງກອກ
(ພາບປະກອບ)
(vovworld) - ໃນບົດກ່າວປາໄສເມື່ອວັນທີ 28/02, ຫົວໜ້າຄະນະແຫ່ຂະບວນປະທ້ວງຕ້ານລັດຖະບານໄທ ສຸເທບ ເທືອກສຸບັນ ຖະແຫຼງວ່າ ການ “ປິດລ້ອມບາງກອກ”, ໂດຍຂະບວນການດັ່ງກ່າວປຸກລະດົມແຕ່ວັນທີ 13/01 ຜ່ານມາ ຈະຢຸດຕິໃນວັນທີ 03/03 ຈະມາເຖິງ.
ກ່າວຄຳເຫັນຕໍ່ໜ້າຄະນະແຫ່ຂະບວນປະທ້ວງ, ທ່ານສຸເທບ ໃຫ້ຮູ້ວ່າ, ຜູ້ແຫ່ຂະບວນປະທ້ວງທັງໝົດຈະຖອນອອກຈາກບັນດາສະຖານທີ່ເຕົ້າໂຮມຢູ່ນະຄອນຫຼວງບາງກອກ, ເວັ້ນເສຍແຕ່ສະຖານທີ່ແຫ່ຂະບວນປະທ້ວງຢູ່ສວນສາທາລະນະ ລຸມພິລີ ທີ່ໃຈກາງນະຄອນຫຼວງ ແລະ ທຸກການເຄື່ອນໄຫວຂອງຂະບວນການຕ້ານລັດຖະບານຈະດຳເນີນໄປຢູ່ສະຖານທີ່ດັ່ງກ່າວ.
ຕາມທ່ານສຸເທບ ແລ້ວ, ເລື່ອງຖອນອອກຈາກບັນດາສະຖານດັ່ງກ່າວບໍ່ໝາຍຄວາມວ່າຈະປະລະຈຸດປະສົງບັງຄັບລັດຖະບານຂອງທ່ານນາງນາຍົກລັດຖະມົນຕີ ຍິງຣັກ ຊິນະວັດ ຕ້ອງລາອອກຈາກຕຳແໜ່ງ. ໜັງສື່ພິມ Bangkok Post ໄດ້ຄັດຄຳເວົ້າຂອງທ່ານສຸເທບວ່າ ຂະບວນການແຫ່ຂະບວນປະທ້ວງຈະສືບຕໍ່ເຮັດໃຫ້ການເຄື່ອນໄຫວຂອງຫ້ອງວ່າການລັດຖະບານ ກໍ່ຄືບັນດາວິສາຫະກິດຂອງຄອບຄົວ ຊິນນະວັດ ຖືກຢຸດສະຫງັກ.
ແລະກໍ່ໃນວັນທີ 28/02, ທ່ານລັດຖະມົນຕີການຕ່າງປະເທດອາເມລິກາ John Kerry ໄດ້ຮຽກຮ້ອງໃຫ້ໄທ ສືບສວນບັນດາການບຸກໂຈມຕີ “ດ້ວຍລັກສະນະການເມືອງ”, ແລະ ຖືວ່າເລື່ອງມີເດັດນ້ອຍບາງຄົນຖືກເສຍຊີວິດແມ່ນຊົ່ວຮ້າຍທີ່ສຸດ.