(ທ່ານພົນໂທ ໂດບ໋າຕີ້ ຕ້ອນຮັບທ່ານ Ray Mabus)
(vovworld) - ຕອນບ່າຍວັນທີ 8/4, ຢູ່ ຮ່າໂນ້ຍ, ທ່ານພົນໂທ ໂດບ໋າຕີ້, ຫົວໜ້າເສນາທິການໃຫຍ່ກອງທັບປະຊາຊົນຫວຽດນາມ, ລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບທ່ານ Ray Mabus, ລັດຖະມົນຕີວ່າການກະຊວງກອງທັບເຮືອອາເມລິກາ ເນື່ອງໃນໂອກາດມາຢ້ຽມຢາມ ແລະ ເຮັດວຽກຢູ່ ຫວຽດນາມ. ທີ່ການຕ້ອນຮັບ, ທ່ານພົນໂທ ໂດບ໋າຕີ້ ຢືນຢັນວ່າ: ການຮ່ວມມືປ້ອງກັນຊາດ ລະຫວ່າງ 2 ປະເທດໃນໄລຍະຜ່ານມາໄດ້ມີບັນດາບາດກ້າວໃໝ່, ໃນນັ້ນ, ມີການຮ່ວມມືກ່ຽວກັບກອງທັບເຮືອ. ກອງທັບເຮືອ ຫວຽດນາມ-ອາເມລິກາ ໄດ້ມີການຮ່ວມມືຢ່າງມີປະສິດທິຜົນ ໃນການເຝິກອົບຮົມ, ຊອກຫາກູ້ໄພກູ້ຊີບ, ຮັບປະກັນຄວາມສະຫງົບປອດໄພໃນການເດີນທະເລ. ການຢ້ຽມຢາມ ແລະ ເຮັດວຽກຂອງທ່ານ Ray Mabus, ເຈົ້າໜ້າທີ່ຂັ້ນສູງສຸດຂອງກອງທັບເຮືອ ອາເມລິກາ ຢູ່ ຫວຽດນາມ ຄັ້ງນີ້, ສືບຕໍ່ເປັນການຢືນຢັນເສີມຂະຫຍາຍການພົວພັນຮ່ວມມື ລະຫວ່າງກອງທັບ ແລະ ກອງທັບເຮືອ 2 ປະເທດ.
ທ່ານ Ray Mabus ປາດຖະໜາວ່າ: ກະຊວງປ້ອງກັນປະເທດຫວຽດນາມ ແລະ ອາເມລິກາ ສືບຕໍ່ສ້າງເງື່ອນໄຂສະດວກ ເພື່ອໃຫ້ກອງທັບເຮືອ 2 ປະເທດມີການຮ່ວມມືຢ່າງແທດຈິງ ແລະ ມີປະສິດທິຜົນກ່ວາໃນບັນດາຂົງເຂດ ເຊິ່ງ 2 ຝ່າຍໄດ້ເປັນເອກະພາບນຳກັນ, ປະກອບສ່ວນປັບປຸງການພົວພັນຮ່ວມມື ລະຫວ່າງກອງທັບ 2 ປະເທດ.