(vovworld) – ຕອນເຊົ້າວັນທີ 29 ກັນຍາ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ແລະ ພັນລະຍາ ພ້ອມກັບຄະນະຜູ້ແທນຂຶ້ນສູງຫວຽດນາມ ໄດ້ກັບເມືອຮອດຮ່າໂນ້ຍ, ສິ້ນສຸດການຢ້ຽມຢາມສ.ຝລັ່ງ ຢ່າງເປັນທາງການ ແລະ ເຂົ້າຮ່ວມກອງປະຊຸມຂັ້ນສູງສະມັດຊາໃຫຍ່ສະຫະປະຊາຊາດ ຢູ່ອາເມລິກາ. ກ່ອນໜ້ານັ້ນ, ວັນທີ 28 ກັນຍາ, ທ່ານນາຍົກລັດຖະມົນຕີ ໄດ້ມີບົດກ່າວປາໄສທີ່ກອງປະຊຸມຂັ້ນສູງສະມັດຊາໃຫຍ່ສະຫະປະຊາຊາດ ແລະ ເຂົ້າຮ່ວມການເຄື່ອນໄຫວຕ່າງໆຢູ່ອາເມລິກາ. ບັນດາການເຄື່ອນໄຫວດັ່ງກ່າວ ໄດ້ສ້າງຄວາມປະທັບໃຈຕໍ່ວົງຄະນະຍາດສາກົນ.
ພາຍຫຼັງການເຮັດວຽກກັບທ່ານນາຍົກລັດຖະມົນຕີ ຫງວຽນເຕີນຢຸງ, ທ່ານນາງຜູ້ອຳນວຍການໃຫຍ່ກອງທຶນເງິນຕາສາກົນ Christine Lagade ໃຫ້ຮູ້ວ່າ, ທ່ານໄດ້ຕີລາຄາສູງຄຳໝັ້ນສັນຍາປະຕິຮູບເສດຖະກິດຂອງຫວຽດນາມຂອງທ່ານນາຍົກລັດຖະມົຕີ ຫງວຽນເຕີນຢຸງ ພ້ອມທັງສະແດງຄວາມປະເອີບໃຈກ່ຽວກັບເສດຖະກິດຂອງຫວຽດນາມ. ທ່ານນາງ Christine Lagade ກ່າວວ່າ.
“ຄວາມຕັດສິນໃຈຮັບປະກັນ ແລະ ເພີ່ມທະວີການເຕີບໂຕຮັກສາເສດຖະກິດມະຫາພາກເປັນປົກກະຕິຂອງທ່ານນາຍົກລັດຖະມົນຕີ ຫງວຽນເຕີນຢຸງ ຊີ້ໃຫ້ເຫັນວ່າ ທ່ານເຂົ້າໃຈກ່ຽວກັບທຸກໆສະພາບການ. ພວກຂ້າພະເຈົ້າກໍ່ປຶກສາຫາລືກ່ຽວກັບຄວາມຕັດສິນໃຈຂອງທ່ານນາຍົກລັດຖະມົນຕີ ໃນການຮັບປະກັນຊີວິດສັງຄົມ, ຫຼຸດຜ່ອນຄວາມທຸກຍາກ ແລະ ຮັບປະກັນພື້ນຖານເສດຖະກິດຜ່ານ 2 ປັດໃຈ, ທີ່ໜຶ່ງແມ່ນ ປັບປຸງດ້ານການເງິນ ແລະ ຮັບປະກັນແຜນນະໂຍບາຍເຂັ້ມແຂງ, ທີ່ 2 ແມ່ນສືບຕໍ່ປັບປຸງລະບົບທະນາຄານ ແລະ ກຸ່ມວິສາຫະກິດຂອງລັດ. ດ້ວຍຍຸດທະສາດປັບປຸງສັງລວມທີ່ພວມໄດ້ຮັບການປະຕິບັດດັ່ງກ່າວ, ແນ່ນອນວ່າ ຫວຽດນາມ ຈະບັນລຸໄດ້ຄວາມສະຖຽນລະພາບດ້ານເສດຖະກິດ ແລະ ຫວັງວ່າຈະສືບຕໍ່ໄດ້ຮັບການເຕີບໂຕຈາກລະດັບກວ່າ 5% ຄືປະຈຸບັນ.”
ສ່ວນທ່ານນາງ Joseeran, ປະທານສະມາຄົມອາຊີ, ຊຶ່ງແມ່ນອົງການຈັດຕັ້ງຂອງ ອາເມລິກາ ທີ່ຄົ້ນຄວ້າ ແລະ ສຶກສາສະເພາະກ່ຽວກັບອາຊີ ໃຫ້ຮູ້ວ່າ.
“ທ່ານນາຍົກລັດຖະມົນຕີ ຫວຽນເຕີນຢຸງ ໄດ້ຍົກອອກຂໍ້ມູນທີ່ຈະແຈ້ງ ສຳລັບປະຊາຄົມວິສາຫະກິດອາເມລິກາ: ຫວຽດນາມມີສິໄສທັດ, ມີຄວາມຫວັງທີ່ໃຫຍ່ຫຼວງໃນການພັດທະນາເສດຖະກິດ ແລະ ເຊື່ອມໂຍງເຂົ້າກັບເສດຖະກິດໂລກ. ຍິ່ງກວ່ານັ້ນ, ທ່ານນາຍົກລັດຖະມົນຕີໄດ້ຊີ້ແຈ້ງແຜນການເຄື່ອນໄຫວຂອງຫວຽດນາມ ໃນການແກ້ໄຂບັນດາສິ່ງທ້າທາຍພາຍໃນປະເທດ ແລະ ເພື່ອໃຫ້ວົງຄະນະຍາດສາກົນເຫັນແຈ້ງວ່າ ຫວຽດນາມ ຢາກປະກອບສ່ວນໃຫ້ແກ່ໂລກ ຢ່າງສຸດຈິດສຸດໃຈ. ທ່ານນາຍົກລັດຖະມົນຕີ ຫງວຽນເຕີນຢຸງ ກໍ່ເນັ້ນໜັກວ່າ ຫວຽດນາມ ຢາກເຂົ້າຮ່ວມສັນຍາການຄ້າຂ້າມປາຊີຝີກ ແລະ ບັນດາສັນຍາການຄ້າເສລີ ແລະ ຢາກສ້າງວຽກເຮັດງານທຳຕື່ມອີກໃຫ້ແກ່ປະຊາຊົນ. ບັນດາຂ້ໍມູນດັ່ງກາວໄດ້ສົ່ງເຖິງປະຊາຄົມວິສາຫະກິດອາເມລິກາ ຢ່າງກະຈ່າງແຈ້ງ.”