ບັນດານັກສຶກສາ, ຊາວໜຸ່ມໄດ້ຈັດງານໂຮມຊຸມນຸມມິດຕິງຄັດຄ້ານເລື່ອງຈີນຕັ້ງຮ້ານເຈາະນ້ຳມັນ ໄຮຢາງ 981 ໃນເຂດໄຫຼ່ທະວີບ ແລະ ເຂດເສດຖະກິດຈຳເພາະ ຂອງຫວຽດນາມ (ພາບ: baomoi)
|
(vovworld)- ວັນທີ 15/5, ມະຫາວິທະຍາໄລສ້າງຄູເຕັກນິກນະຄອນ ໂຮ່ຈິມິນ, ສະຫະພັນຊາວໜຸ່ມຫວຽດນາມແຂວງ ດົງນາຍ, ມະຫາວິທະຍາໄລ ຍາຈາງ, ສະຫະພັນບັນດາອົງການມິດຕະພາບ ແລະ ສະມາຄົມມິດຕະພາບຫວຽດນາມ - ຈີນແຂວງເທື່ອທຽນເຫ້ວ... ໄດ້ຈັດງານໂຮມຊຸມນຸມມິດຕິງຄັດຄ້ານເລື່ອງຈີນຕັ້ງຮ້ານເຈາະນ້ຳມັນ ໄຮຢາງ 981 ໃນເຂດໄຫຼ່ທະວີບ ແລະ ເຂດເສດຖະກິດຈຳເພາະ ຂອງຫວຽດນາມ, ພ້ອມທັງແຜ່ບໍລິຈາກເງິນສະໜັບສະໜູນບັນດານັກຮົບທີ່ພວມປະຕິບັດໜ້າທີ່ປົກປັກຮັກສາເຂດໝູ່ເກາະທະເລຂອງຫວຽດນາມ.
ຕອນຄ່ຳວັນທີ 15/5, ກ່າວຄຳເຫັນທີ່ພິທີສະເຫຼີມສະຫຼອງບັນດາວັນບຸນໃຫຍ່ຂອງຊາດຄື 124 ປີແຫ່ງວັນຄ້າຍວັນເກີດຂອງປະທານໂຮ່ຈິມິນ, 60 ປີ ແຫ່ງວັນໄຊຊະນະດ້ຽນບຽນຝູ ແລະ 39 ປີແຫ່ງວັນປົດປ່ອຍພາກໃຕ້, ທ່ານຫງວຽນແທງເຕີນ ເອກອັກຄະລັດຖະທູດຫວຽດນາມປະຈຳອີນເດຍ ສະເໜີໃຫ້ນັກຮຽນ, ນັກສຶກສາຫວຽດນາມພວມຮ່ຳຮຽນຢູ່ອິນເດຍຊຶ່ງມີໂອກາດພົບປະແລກປ່ຽນກັບນັກສຶກສາ, ສາດສະດາຈານ, ນັກຮຽນຮູ້ອິນເດຍ ແລະ ສາກົນ ຈົ່ງຖ່າຍທອດຂໍ້ມູນຂ່າວສານເພື່ອໃຫ້ເຂົາເຈົ້າສາມາດເຂົ້າໃຈກ່ຽວກັບການລະເມີດອະທິປະໄຕຫວຽດນາມຂອງຈີນ.
ວັນທີ 15/5, ຢູ່ມົດສະກູ, ຕອບສຳພາດນັກຂ່າວ VOV ປະຈຳລັດເຊຍກ່ຽວກັບເລື່ອງລັດເຊຍມີຄວາມສົນໃຈຄືແນວໃດຕໍ່ເລື່ອງຈີນລະເມີດກົດໝາຍສາກົນ, ຕັ້ງຮ້ານເຈາະນ້ຳມັນ ໄຮຢາງ 981 ໃນເຂດໄຫຼ່ທະວີບ ແລະ ເຂດເສດຖະກິດຈຳເພາະ ຢູ່ເຂດທະເລຕາເວັນອອກ ? ທ່ານ Alecxandr Lukashevich ຫົວໜ້າກົມການຂ່າວ, ກະຊວງການຕ່າງປະເທດລັດເຊຍຊີ້ແຈ້ງວ່າ :
“ ພວກຂ້າພະເຈົ້າຕິດຕາມຢ່າງໃກ້ຊິດກ່ຽວກັບບັນດາການຜັນແປທີ່ນັບມື້ ນັບສັບສົນຢູ່ທະເລ ຕາເວັນອອກ. ພວກຂ້າພະເຈົ້າປາດຖະໜາວ່າ ບັນດາທີ່ ກ່ຽວຂ້ອງຈະລະງັບໃຈ ແລະ ອາດຈະແກ້ໄຂ ບັນດາ ຄວາມບໍ່ລົງລອຍກັນ ຜ່ານການເຈລະຈາ ”
ແລະ ກໍໃນວັນທີ 15/5, ສະມາຄົມມິດຕະພາບຝະລັ່ງ-ຫວຽດນາມໄດ້ສົ່ງຈົດໝາຍເຖິງສະຖານທູດຫວຽດນາມປະຈຳຝະລັ່ງ ສະແດງການຄັດຄ້ານຈີນຢ່າງຮຸນແຮງ, ຮຽກຮ້ອງຈີນຈົ່ງຖອນຮ້ານເຈາະນ້ຳມັນ ໄຮຢາງ 981 ພ້ອມດ້ວຍບັນດາກຳປັ່ນຄຸ້ມກັນ ອອກຈາກເຂດໄຫຼ່ທະວີບ ແລະ ເຂດເສດຖະກິດຈຳເພາະ ຂອງຫວຽດນາມ, ເຄົາລົບຄຳໝັ້ນສັນຍາກ່ຽວກັບເລື່ອງກ້າວໄປເຖິງການບັນລຸປະມວນລະບຽບການປະພຶດຢູ່ທະເລຕາເວັນອອກ COC ໂດຍໄວ.