ຫາງສຽງສືບຕໍ່ຊົມເຊີຍ ຂໍ້ຕົກລົງທຳລາຍ ອາວຸດເຄມີຢູ່ຊີຣີ
(ພາບ:vov.vn)
(vovworld)- ຫຼາຍປະເທດສະແດງຄວາມຊົມເຊີຍຕໍ່ຂໍ້ຕົກລົງລະຫວ່າງລັດເຊຍ-ອາເມລິກາ ກ່ຽວກັບເລື່ອງທຳລາຍສາງອາວຸດຂອງຊີຣີ. ທ່ານຫວາງອີ ລັດຖະມົນຕີການຕ່າງປະເທດຈີນ ຖືວ່າ: ຂໍ້ຕົກລົງໄດ້ຊ່ວຍສະກັດກັ້ນການບຸກໂຈມຕີຂອງອາເມລິກາແນ່ໃສ່ອຳນາດການປົກຄອງຂອງປະທານາທິບໍດີຊີຣີ Bashar al Assad. ຈີນ ຊົມເຊີຍຂໍ້ຕົກລົງລະຫວ່າງລັດເຊຍ-ອາເມລິກາ ຊື່ງໄດ້ຊ່ວຍຫລຸດຜ່ອນຄວາມເຄັ່ງຕຶງຢູ່ຊີຣີ. ສະຫະພັນອາຣັບ ຖືວ່າ: ຂໍ້ຕົກລົງລະຫວ່າງລັດເຊຍ-ອາເມລິກາ ຈະຊ່ວຍຊອກຫາມາດຕະການດ້ານການເມືອງໃຫ້ແກ່ສົງຄາມຢູ່ຊີຣີ. ທ່ານ Fumio Kishida ລັດຖະມົນຕີການຕ່າງປະເທດຍີ່ປຸ່ນ ປະກາດວ່າ ໂຕກຽວ ຊົມເຊີຍຂໍ້ຕົກລົງກ່ຽວກັບການຄວບຄຸມ ແລະ ປັດເຂ່ຍອາວຸດເຄມີຂອງຊີຣີ ໂດຍພາຍໃຕ້ການຕິດຕາມກວດກາຂອງສາກົນ. ວົງການນັກການເມືອງຊີຣີ ກໍ່ມີປະຕິກິລິຍາອັນຕັ້ງໜ້າກ່ຽວກັບຂໍ້ຕົກລົງລະຫວ່າງລັດເຊຍ-ອາເມລິກາ. ທ່ານ Ali Haidar ຖືວ່າ: ຂໍ້ຕົກລົງດັ່ງກ່າວໄດ້ສະກັດກັ້ນສົງຄາມ ແລະ ແມ່ນ “ໄຊຊະນະໃຫ້ແກ່ຊີຣີ“.