(vovworld) – ເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ - 981 ເຂົ້າເລິກໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ ສືບຕໍ່ປະເຊີນໜ້າກັບການຄັດຄ້ານຢ່າງແຮງຂອງປະຊາຄົມໂລກ. ວົງການສື່ມວນຊົນສາກົນກໍ່ອອກສຽງຕຳນິຕິຕຽນບັນດາການກະທຳສົ່ງຜົນສະທ້ອນຢ່າງຮ້າຍແຮງເຖິງຊີວິດອິນຊີ, ຊັບສິນຂອງຊາວປະມົງ ຫວຽດນາມ ຂອງບັນດາກຳລັງກ່ຽວຂ້ອງຂອງ ຈີນ, ພິເສດແມ່ນເຫດການ ກຳ່ປັ່ນຂອງ ຈີນ ຕຳ່ໃສ່ກຳ່ປັ່ນຂອງ ຫວຽດນາມ ຈົນຖືກຈົມນ້ຳ ເມື່ອວັນທີ 26/5 ທີ່ຜ່ານມາ.
ກ່າວຄຳເຫັນທີ່ການປະຊຸມຂ່າວປະຈຳໃນວັນທີ 27/5, ໂຄສົກກະຊວງການຕ່າງປະເທດ ອາເມລິກາ ທ່ານນາງ Jen Psaki ຢັ້ງຢືນ: ພຽງແຕ່ ຈີນ ແມ່ນຝ່າຍເກາະພິດທີ່ກໍ່ຄວາມເຄັ່ງຕຶງໃນປະຈຸບັນຢູ່ທະເລຕາເວັນອອກ.
ແລະກໍ່ໃນວັນດຽວກັນ, ລັດຖະບານ ຍີ່ປຸ່ນ ໄດ້ກະຕຸກຊຸກຍູ້ ຈີນ ລະງັບໃຈກໍ່ໜ້າສະພາບການເຄັ່ງຕຶງຢູ່ທະເລຕາເວັນອອກ, ພາຍຫຼັງມີແຫຼ່ງຂ່າວໃຫ້ຮູ້ວ່າ: ກຳ່ປັ່ນຫາປາຂອງ ຫວຽດນາມ ຖືກກຳ່ປັ່ນຫາປາຂອງ ຈີນ ຕຳ່ໃຫ້ຈົມນ້ຳໃນເຂດທະເລນີ້ເມື່ອວັນທີ 26/5.
ໃນຂະນະນັ້ນ, ວົງການນັກວິຈານສາກົນຢືນຢັນວ່າ: ການກະທຳພຽງລຳພັງຝ່າຍດຽວຂອງ ຈີນ ຢູ່ທະເລຕາເວັນອອກ ແມ່ນບາດກ້າວຜິດພາດ, ກໍ່ຜົນເສຍຫາຍເຖິງອິດທິພົນຊື່ສຽງຂອງປະເທດນີ້ໃນເວທີສາກົນ. ວິທະຍຸກະຈາຍສຽງ ອາເມລິກາ ຂອງ ອາເມລິກາ ຕີລາຄາວ່າ ດ້ວຍເລື່ອງຕັ້ງຮ້ານເຈາະນ້ຳມັນຢູ່ເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ ຢູ່ທະເລຕາເວັນອອກນັ້ນ ອິດທິພົນຊື່ສຽງ ແລະ ກຽດສັກສີຂອງຈີນ ຈະຖືກຊຸດໂຊມ ຢ້ອນບໍ່ຫົວຊາຕໍ່ຄວາມເປັນລະບຽບຮຽບຮ້ອຍ ແລະ ກົດໝາຍສາກົນ. ຮ່ວມທັດສະນະດຽວກັນ, ໃນບົດຂຽນລົງພິມໃນໜັງສືພິມ “ຜົນປະໂຫຍດຂອງລັດ” (The National Interest) ຂອງອາເມລິກາ, ນັກວິຈານ Brad Glosserman ຖືວ່າ: ອິດທິພົນຊື່ສຽງຂອງ ຈີນ ຖືກຊຸດໂຊມຢ່າງແຮງເມື່ອໄດ້ຮັບຖືວ່າແມ່ນປະເທດເກາະຜິດ, ກໍ່ຄວາມຂາດສະຖຽນລະພາບໃນພາກພື້ນ.
ບັນດາສຳນັກຂ່າວສານໂດ່ງດັງໃນໂລກຄື: Bloomberg ຂອງ ອາເມລິກາ, ABC ຂອງ ອົດສະຕາລີ, Reuters ຂອງ ອັງກິດ, ກໍ່ໄດ້ໃຫ້ຂ່າວຕຳນິຕິຕຽນກ່ຽວກັບເຫດການດັ່ງກ່າວ.