ຫາງສຽງສາກົນສືບຕໍ່ມີ ບັນດາປະຕິກິລິຍາ ກ່າວປະນາມຈີນ ກໍ່ຄວາມ ເຄັ່ງຕຶງຢູ່ທະເລຕາເວັນອອກ
ກອງປະຊຸມຂອງຄະນະກຳມະການບັນດາປະເທດ ອາຊຽນ ຢູ່ ອາບຟຣີກາໃຕ້
(ພາບ: Minh Đức/Vietnam+)
(vovworld) - ວັນທີ 13/5, ກ່າວຄຳເຫັນທີ່ການປະຊຸມຂ່າວປະຈຳວັນທີ່ສຳນັກງານກະຊວງການຕ່າງປະເທດ ອາເມລິກາ, ໂຄສົກກະຊວງການຕ່າງປະເທດ ອາເມລິກາ ທ່ານນາງ Jen Psaki ໄດ້ປະຕິເສດຕໍ່ຄຳກ່າວຫາຈາກຝ່າຍຈີນ ທີ່ວ່າ: ການເຂົ້າຮ່ວມຂອງ ອາເມລິກາ ໃນບັນດາການຜັນແປຫຼ້າສຸດຢູ່ທະເລຕາເວັນອອກໄດ້ມ້າງທຳລາຍສັນຕິພາບ ແລະ ສະຖຽນລະພາບຢູ່ພາກພື້ນ. ເມື່ອຕອບຄຳຖາມຂອງນັກຂ່າວ ຈີນ ທີ່ວ່າ ລັດຖະມົນຕີການຕ່າງປະເທດ ຈີນ ຕີລາຄາເຄັ່ງຕຶງທັງໝົດບໍ່ແມ່ນ ຈີນ ເປັນຜູ້ກໍ່ຂຶ້ນນັ້ນ, ທ່ານນາງໂຄສົກກະຊວງການຕ່າງປະເທດ ອາເມລິກາ Jen Psaki ໃຫ້ຮູ້ວ່າ: ເລື່ອງຢັ້ງຢືນ ຈີນ ເກາະຜິດ, ກໍ່ຄວາມເຄັ່ງຕຶງຢູ່ທະເລຕາເວັນອອກ ບໍ່ພຽງແຕ່ແມ່ນທັດສະນະຂອງ ອາເມລິກາ ເທົ່ານັ້ນ, ຫາກຍັງແມ່ນທັດສະນະຂອງຫຼາຍປະເທດອີກດ້ວຍ.
ແລະກໍ່ໃນຕອນບ່າຍວັນດຽວກັນ, ຢູ່ນະຄອນຫຼວງ Pretoria, ຄະນະກຳມະການບັນດາປະເທດ ອາຊຽນ ຢູ່ ອາບຟຣີກາໃຕ້ (APC) ໄດ້ຈັດຕັ້ງກອງປະຊຸມຂັ້ນເອກອັກຄະລັດຖະທູດເພື່ອແນໃສ່ແລກປ່ຽນກ່ຽວກັບສະພາບເຄັ່ງຕຶງຢູ່ທະເລຕາເວັນອອກພາຍໃຕ້ການເປັນປະທານຂອງທ່ານເອກອັກຄະລັດຖະທູດ ຫວຽດນາມ ເລຮູຍຮ່ວາງ, ປະທານ APC. ທີ່ກອງປະຊຸມ, ບັນດາເອກອັກຄະລັດຖະທູດ ອາຊຽນ ໄດ້ສະແດງຄວາມວິຕົກກັງວົນຕໍ່ການຜັນແປເຄັ່ງຕຶງໄລຍະມໍ່ໆມານີ້ຢູ່ທະເລຕາເວັນອອກ ແລະ ເຫັນດີເປັນເອກະສັນຖືວ່າ: ອາຊຽນ ຄວນເພີ່ມທະວີຄວາມສາມັກຄີ, ເປັນຈິດໜຶ່ງໃຈດຽວຕັດສິນໃຈຮັກສາ, ສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມສະຫງົບປອດໄພ, ຄວາມເສລີໃນການເດີນທະເລຢູ່ທະເລຕາເວັນອອກ, ຖືນີ້ແມ່ນໜຶ່ງໃນບັນດາຈຸດສຸມຂອງບັນດາປະເທດ ອາຊຽນເພື່ອມຸ່ງໄປເຖິງການສ້າງປະຊາຄົມ ອາຊຽນໃນປີ 2015. ທ່ານເອກອັກຄະລັດຖະທູດ ເລຮູຍຮ່ວາງ ໄດ້ປະກາດແຫຼ່ງຂ່າວລະອຽດໃຫ້ບັນດາເອກອັກຄະລັດຖະທູດ ອາຊຽນກ່ຽວກັບການຜັນແປຫຼ້າສຸດທີ່ກ່ຽວຂ້ອງເຖິງເລື່ອງ ຈີນ ຕັ້ງຮ້ານເຈາະນ້ຳມັນໄຮຢາງ 981 ຢູ່ເຂດເສດຖະກິດຈຳເພາະຂອງ ຫວຽດນາມ. ທ່ານເອກອັກຄະລັດຖະທູດຢືນຢັນວ່າ: ຫວຽດນາມ ປາດຖະໜາຢາກໃຫ້ບັນດາປະເທດ ອາຊຽນ ແລະ ປະຊາຄົມໂລກສືບຕໍ່ສາມັກຄີສະໜັບສະໜູນຄຳຮຽກຮ້ອງເປັນທຳຂອງ ຫວຽດນາມ, ອອກສຽງຄັດຄ້ານການກະທຳລະເມີດຂອງ ຈີນ, ປະກອບສ່ວນຮັບປະກັນສັນຕິພາບ, ສະຖຽນລະພາບຢູ່ພາກພື້ນ, ຄວາມສະຫງົບ, ປອດໄພ ແລະ ຄວາມເສລີໃນການເດີນທະເລຢູ່ທະເລຕາເວັນອອກ.