ພາບປະກອບ
|
(vovworld) – ເນື່ອງໃນໂອກາດ ຫວຽດນາມ ຈັດຕັ້ງກອງປະຊຸມໃຫຍ່ຄັ້ງທີ 12 ຂອງພັກ, ໜັງສືພິມ, ສື່ສານສາກົນສືບຕໍ່ໃຫ້ຫຼາຍຂ່າວ, ບົດ, ໃຫ້ຂໍ້ສັງເກດກ່ຽວກັບຄວາມໝາຍອັນໃຫຍ່ຫຼວງ ແລະ ຄວາມສຳຄັນ, ເປັນຂີດໝາຍບາດກ້າວຢ່າງໃຫຍ່ຫຼວງໃນພາລະກິດສ້າງສາ ແລະ ພັດທະນາປະເທດຊາດຂອງ ຫວຽດນາມ.
ວັນທີ 20/1, ສຳນັກຂ່າວສານ ຊິນຮວາ ຂອງຈີນ ມີບົດຂຽນໂດຍໃຫ້ຮູ້ວ່າ: ຫວຽດນາມ ບັນລຸໄດ້ບັນດາຜົນງານພົ້ນເດັ່ນໃນຕະຫຼອດວິວັດແຫ່ງການປະຕິບັດພາລະກິດປະຕິຮູບດ້ານເສດຖະກິດດ້ວຍຫົວຂໍ້ “ປ່ຽນໃໝ່”. ດ້ວຍພື້ນຖານທີ່ໝັ້ນຄົງນີ້, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດ ຫວຽດນາມ ແນ່ນອນວ່າຈະສ້າງກຳລັງໜູນຢ່າງແຮງຊຸກຍູ້ການພັດທະນາຂອງປະເທດພໍສົມຄວນ. ກໍໃນວັນດຽວກັນ, ໜັງສືພິມລາຍວັນ ຊຽງໄຮ້ ມີບົດວິໄຈ “ກອງປະຊຸມໃຫຍ່ພັກກອມມູນິດ ຫວຽດນາມ ແນໃສ່ສ້າງກຳລັງໜູນໃຫ້ແກ່ການພັດທະນາ”. ໜັງສືພິມ South China Morning Post (ຮົງກົງ, ປະເທດຈີນ) ກໍຄັດສະເໜີຄຳເວົ້າຂອງນັກຊ່ຽວຊານ David Brown ຂອງ ອາເມລິກາ ໃຫ້ຂໍ້ສັງເກດວ່າ: ກອງປະຊຸມໃຫຍ່ຄັ້ງທີ 12 ຈະສ້າງຮູບຮ່າງອະນາຄົດຂອງ ຫວຽດນາມ. ສ່ວນໜັງສືພິມ Nikkei Asian Review ຂອງ ຍີ່ປຸ່ນ ກໍໃຫ້ຂໍ້ສັງເກດວ່າກອງປະຊຸມໃຫຍ່ໄດ້ຮັບຄວາມມຸ່ງຫວັງຈະເປີດສັງກະລາດພັດທະນາໃໝ່ໃຫ້ແກ່ ຫວຽດນາມ.
ໃນຂະນະນັ້ນ, ບົດຂຽນກ່ຽວກັບກອງປະຊຸມໃຫຍ່ຄັ້ງທີ 12 ຂອງພັກກອມມູນິດ ຫວຽດນາມ ໃນແວບໄຊ Bloomberg ຂອງ ອາເມລິກາ ກໍເຕື້ອງເຖິງການກະທົບຂອງກອງປະຊຸມໃຫຍ່ຄັ້ງນີ້ເຖິງການພັດທະນາເສດຖະກິດຂອງ ຫວຽດນາມ.
ຕາມ AFP ຂອງ ຝຣັ່ງ, ກອງປະຊຸມໃຫຍ່ຄັ້ງທີ 12 ຖືກດຳເນີນໄປໃນຈຸດເວລາທີ່ ຫວຽດນາມ ຫວນຄືນ, ຕີລາຄາ ແລະ ສືບຕໍ່ກ້າວຂຶ້ນພາຍຫຼັງ 30 ປີແຫ່ງການປ່ຽນໃໝ່. ສ່ວນໜັງສືພິມ New York Times ຂອງ ອາເມລິກາ ໄດ້ໃຫ້ຂໍ້ສັງເກດວ່າກອງປະຊຸມໃຫຍ່ຄັ້ງທີ 12 ຂອງພັກຈະມີການກະທົບຢ່າງໃຫຍ່ຫຼວງເຖິງແນວທາງການຕ່າງປະເທດຂອງ ຫວຽດນາມ ໃນສະພາບການ ຫວຽດນາມ ພວມຢືນຕໍ່ໜ້າກາລະໂອກາດ, ສິ່ງທ້າທາຍຫຼາຍຢ່າງໃນການເຊື່ອມໂຍງ, ພິເສດແມ່ນການທ້າທາຍກ່ຽວກັບອະທິປະໄຕເມື່ອສະພາບການຢູ່ທະເລຕາເວັນອອກມີການຜັນແປຢ່າງສັບສົນ.
ໜັງສືພິມ “ຂ່າວຄາວປະຊາຊົນ” ຂອງລັດເຊຍ ສະບັບອອກໃນວັນທີ 20/1 ໄດ້ລົງພິມບົດຂຽນພາດທີ່ຫົວຂໍ້ວ່າ “ຫວຽດນາມ ຢັ້ງຢືນນະໂຍບາຍປ່ຽນໃໝ່”. ສ່ວນໜັງສືພິມ “ປະເທດເຢຍລະມັນໃໝ່” (Neues Deutschland) ໃນວັນທີ 20/1 ກໍມີບົດຂຽນດ້ວຍຫົວຂໍ້ “ພັກກອມມູນິດ ຫວຽດນາມ ສືບຕໍ່ພາລະກິດປ່ຽນໃໝ່” ຂອງນັກຂ່າວ Detlef Pries.