(ພາບປະກອບ:laodong.com.vn)
(VOV)- ໄຊຊະນະ “ດ້ຽນບຽນຝູທາງອາກາດ“ ປີ 1972 ແມ່ນວິລະກຳດີເດັ່ນທີ່ສຸດຂອງສົງຄາມປະຊາຊົນຢູ່ພາກເໜືອຫວຽດນາມ, ຕີເອົາຊະນະສົງຄາມທຳລາຍດ້ວຍກຳລັງອາກາດຂອງຈັກກະພັດອາເມລິກາ. ຫາງສຽງໂລກໄດ້ຕີລາຄາສູງຄວາມໝາຍຂອງໄຊຊະນະ ກໍ່ຄືຍຸດທະວິທີຂອງກອງທັບຫວຽດນາມ ພ້ອມທັງກ່າວປະນາມການຖີ້ມລະເບີດໃສ່ຮ່າໂນ້ຍ ຂອງກອງທັບອາກາດອາເມລິກາ.
ທ່ານພົນໂທ Anotoli Khiupenen ອະດີດຫົວໜ້າຄະນະທີ່ປຶກສາການທະຫານໂຊວຽດເກົ່າ ຢູ່ຫວຽດນາມ ໄດ້ໃຫ້ຂໍ້ສັງເກດວ່າ: ບັ້ນຮົບ ດ້ຽນບຽນຝູທາງອາກາດ ຂອງຫວຽດນາມ ເໝືອນກັບບັ້ນຮົບ Staligrad ຂອງໂຊວຽດ. ສ່ວນທ່ານພົນຕີ Victor Ivanovich Filippnov ອະດີດຜູ້ຊ່ຽວຊານການທະຫານລັດເຊຍ ເຄີຍປະຕິບັດງານຢູ່ຮ່າໂນ້ຍເມື່ອປີ 1972 ຢັ້ງຢືນວ່າ: ປັດໄຈຕັດສິນຊີ້ຂາດຂອງໄຊຊະນະນີ້ແມ່ນປະຊາຊົນຫວຽດນາມ:
“ຊາດຫວຽດນາມ ແມ່ນຊາດວິລະຊົນ ແລະ ກອງທັບອາເມລິກາ ບໍ່ທັນຖອດຖອນບົດຮຽນໄດ້ ຂະນະທີ່ຍັງມີກົນອຸບາຍຢາກເອົາຊະນະເຈດບໍ່ຍອມຈຳນົນຂອງຊາດຫວຽດນາມດ້ວຍລູກລະເບີດ. ປະຊາຊົນຫວຽດນາມ ໄດ້ທຳການຕໍ່ສູ້ເພື່ອປົກປັກຮັກສາປະເທດຊາດຂອງຕົນ ແລະ ພາລະກິດອັນຊອບທຳນັ້ນໄດ້ຮັບການສະໜັບສະໜູນຈາກມະນຸດຜູ້ກ້າວໜ້າໃນໂລກກໍ່ຄືຢູ່ປະເທດອາເມລິກາ. ຫວຽດນາມ ໄດ້ກາຍເປັນສັນຍາລັກແຫ່ງການຕໍ່ສູ້ຍາດເອົາເອກະລາດ“
ທ່ານດຣ John Prados ນັກປະຫວັດສາດອາເມລິກາ ຖືວ່າ: ມີຫຼາຍສາຍເຫດທີ່ເຮັດໃຫ້ກອງທັບອາເມລິກາ ຖືກປະລາໄຊໃນບັ້ນຮົບຖີ້ມລະເບີດຖະຫຼົ່ມພາກເໜືອຫວຽດນາມ:
“ທາງພາກເໜືອຫວຽດນາມ ໄດ້ກະກຽມການປ້ອງກັນນະຄອນຮ່າໂນ້ຍ ແລະ ຍົກຍ້າຍປະຊາຊົນເພື່ອຈຳກັດການບາດເຈັບລົ້ມຕາຍ. ກຳລັງປ້ອງກັນອາກາດພາກເໜືອຫວຽດນາມ ໄດ້ຝຶກຊ້ອມຢ່າງລະອຽດທີ່ສຸດຕໍ່ກໍລະນີອາເມລິກາ ອາດຈະບຸກໂຈມຕີຮ່າໂນ້ຍ, ຫາຍຟ່ອງ. ສ່ວນອາເມລິກາ ບໍ່ໄດ້ສ້າງແຜນການລະອຽດ, ບໍ່ຄິດໄລ່ເຖິງຄວາມສາມາດປ້ອງກັນຢ່າງແຂງແຮງຄືແນວນັ້ນຂອງພາກເໜືອຫວຽດນາມ“.
ຫາງສຽງຝ່າຍຕາເວັນຕົກໃນເວລານັ້ນກໍ່ໄດ້ຕີລາຄາວ່າ: ໄລຊະນະ ດ້ຽນບຽນຝູທາງອາກາດ ໄດ້ທຳລາຍກົນອຸບາຍເຈລະຈາໃນທ່າໄດ້ປຽບຂອງອຳນາດການປົກຄອງ Nixon ບັງຄັບໃຫ້ອາເມລິກາ ຕ້ອງກັບຄືນສູ່ໂຕະເຈລະຈາ, ກ້າວໄປເຖິງການເຊັນສັນຍາປາຣີ ກ່ຽວກັບການຖອນທະຫານອອກຈາກຫວຽດນາມ, ສ້າງປະຖົມປັດໄຈເພື່ອໃຫ້ກອງທັບ ແລະ ປະຊາຊົນຫວຽດນາມ ປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບເມື່ອວັນທີ 30/4/1975.