(vovworld)- ພາຍຫລັງໄດ້ຮັບຂ່າວວ່າ ພົນເອກ ຫວໍ້ງວຽນຢາບ ໄດ້ເຖິງແກ່ມໍລະນະກຳໃນວັນທີ 4/10, ບັນດາພາຫະນະສື່ມວນຊົນໃນທົ່ວໂລກໄດ້ອອກຂ່າວຄາວດັ່ງກ່າວພ້ອມກັບບັນດາຂ່າວ, ບົດ, ຮູບພາບຍ້ອງຍໍສັນລະເສີນຊີວິດ ແລະ ພາລະກິດຂອງທ່ານພົນເອກ ຫວໍ້ງວຽນຢາບ.
ດ້ວຍຫົວຂໍ້: ພົນເອກ ຫວໍ້ງວຽນຢາບ ຜູ້ປີຊາສາມາດໄດ້ເຖິງແກ່ມໍລະນະກຳ”, ສຳນັກຂ່າວສານ AP ຂອງອາເມລິກາ ໄດ້ຂຽນວ່າ: ພົນເອກ ຫວໍ້ງວຽນຢາບ ແມ່ນນັກບັນຊາການທະຫານທີ່ປີຊາສາມາດ, ນັກວິລະຊົນຂອງຊາດ, ແມ່ນ“ Napoleon ແດງ” ໄດ້ຕີເອົາຊະນະພວກລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ. ສະມາຊິກສະພາສູງ ອາເມລິກາ John McCain ຂຽນໃນຫນ້າເວັບສ່ວນຕົວວ່າ: ພົນເອກ ຫວໍ້ງວຽນຢາບ ໄດ້ເຖິງແກ່ມໍລະນະກຳ. ເພີ່ນແມ່ນນັກຍຸດທະສາດການທະຫານທີ່ປີຊາສາມາດ ໄດ້ເວົ້າກັບຂ້າພະເຈົ້າວ່າ ພວກເຮົາແມ່ນບັນດາສັດຕູກິຕິມະສັກ.
ຫນັງສືພີມ Financial Times ຂອງອັງກິດ ໄດ້ວິຈານວ່າ: ພົນເອກ ຫວໍ້ງວຽນຢາບແມ່ນຫນຶ່ງໃນບັນດານັກບັນຊາການທະຫານທີ່ດີເລີດກວ່າໝູ່ຂອງສັດຕະວັດທີ 20.
ສ່ວນຫນັງສືພີມ Le Monde ຂອງຝລັ່ງ ສະບັບອອກວັນທີ 4/10 ໄດ້ລົງພີມບົດຂຽນຍ້ອງຍໍພົນເອກ ຫວໍ້ງວຽນຢາບ ແມ່ນນັກວິລະຊົນຂອງຄວາມເປັນເອກະລາດຫວຽດນາມ. ຫນັງສືພິມ AFP ຂອງຝລັ່ງ ໄດ້ໃຫ້ຂໍ້ສັງເກດວ່າ: ພົນເອກ ຫວໍ້ງວຽນຢາບ ແມ່ນ“ນັກສະຖາປະນີກທຸກໄຊຊະນະຂອງຫວຽດນາມໃນການຕໍ່ສູ້ກັບກອງທັບຝລັ່ງ ແລະ ອາເມລິກາ”. ໃນຂະນະນັ້ນ, ຢູ່ ລາຮາວານ, ສື່ເອເລັກໂຕນິກ cubadebate, ສຳນັກຂ່າວສານ Prensa Latina ແລະ ໂທລະພາບ ກູບາ ໄດ້ໃຫ້ຂ່າວກ່ຽວກັບເລື່ອງພົນເອກ ຫວໍ້ງວຽນຢາບ ເຖິງແກ່ມໍລະນະກຳຢູ່ ຮ່າໂນ້ຍ.
ຢູ່ອາຊີ, ຫນັງສືພີມ Hindu ຂອງອິນເດຍ ສະບັບອອກວັນທີ 5/10 ໄດ້ລົງພິມໃນຫນ້າທຳອິດຂ່າວກ່ຽວກັບເລື່ອງພົນເອກ ຫວໍ້ງວຽນຢາບ ເຖິງແກ່ມໍລະນະກຳ. ສ່ວນຫນັງສືພີມ ລຽນເຮບາວຂອງໄຕ້ຫວັນປະເທດຈີນ ໄດ້ຢືນຢັນວ່າ: ພົນເອກ ຫວໍ້ງວຽນຢາບ ແມ່ນຫນຶ່ງໃນບັນດາຜູ້ທີ່ມີຊື່ສຽງກວ່າໝູ່ຢູ່ຫວຽດນາມໃນສັດຕະວັດທີ 20.