ທ່ານໂຄສົກກະຊວງການຕ່າງປະເທດ ອີຣານ Esmail Baghaei  (ພາບເອກະສານ: IRNA/TTXVN)

ວັນທີ 23 ທັນວາ, ທ່ານໂຄສົກກະຊວງການຕ່າງປະເທດ ອີຣານ Esmail Baghaei ຢັ້ງຢືນວ່າ ເຕເຮຣານ ສະໜັບສະໜູນພາລະກິດປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ ຊີຣີ. ໃນຖະແຫຼງການ, ທ່ານ Baqaei ຊີ້ແຈ້ງວ່າ ຫຼັກໝັ້ນຫຼັກການຂອງປະເທດນີ້ຕໍ່ກັບບັນຫາ ຊີຣີ ແມ່ນປົກປັກຮັກສາອະທິປະໄຕ, ຜືນແຜ່ນດິນອັນຄົບຖ້ວນ ແລະ ໃຫ້ປະຊາຊົນ ຊີຣີ ຕັດສິນອະນາຄົດຂອງເຂົາເຈົ້າ. ທ່ານໂຄສົກກະຊວງການຕ່າງປະເທດ ອີຣານ ກໍເນັ້ນໜັກວ່າ ຊີຣີ ບໍ່ຄວນ “ກາຍເປັນບ່ອນລີ້ຊ່ອນຂອງລັດທິກໍ່ການຮ້າຍ”.

        ໃນຂະນະນັ້ນ, ທ່ານ Ahmed al – Sharaa, ການນຳກຸ່ມອິດສະລາມ Hayat Tahrir al – Sham (HTS) ນຳພາກຳລັງທີ່ພວມກຳອຳນາດຢູ່ ຊີຣີ, ໄດ້ແຈ້ງໃຫ້ຊາບວ່າ ກາຕາ ໄດ້ສະແດງຄວາມພ້ອມລົງທຶນເຂົ້າ ຊີຣີ ໃນບັນດາຂົງເຂດພະລັງງານ ແລະ ທ່າກ່ຳປັ່ນທະເລ. ກ່ອນໜ້ານັ້ນ, ວັນທີ 21 ທັນວາ, ກາຕາ ໄດ້ເປີດສະຖານທູດ ປະຈຳນະຄອນຫຼວງ Damascus ຄືນໃໝ່ຢ່າງເປັນທາງການ, ພາຍຫຼັງທີ່ປິດປະຕູມາເປັນເວລາ 13 ປີ ຍ້ອນເກີດການປະທະກັນຢູ່ ຊີຣີ.