(vovworld) – ວັນທີ 5/5, ອີຢິບ ໄດ້ຕຳນິຕິຕຽນການບຸກໂຈມຕີທາງອາກາດຄັ້ງຕ່າງໆຂອງ ອິດສະຣາແອນ ເຂົ້າ ຊີຣີ, ໃນຂະນະນັ້ນ ສະຫະພັນ ອາຣັບ ກໍ່ໄດ້ຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດມີມາດຕະການເພື່ອແນໃສ່ຢຸດຕິອັນທີ່ເອີ້ນວ່າ “ການບຸກໂຈມຕີຕ່າງໆຂອງ ອິດສະຣາແອນ” ແນໃສ່ປະເທດຕາເວັນອອກກາງ ທີ່ພວມຖືກທຳລາຍຈາກເສີກກາງເມືອງນີ້. ສະຫະພັນ ອາຣັບ ຮຽກຮ້ອງໃຫ້ສະພາຄວາມໝັ້ນຄົງ ສະຫະປະຊາຊາດ ມີການກະທຳໃນທັນທີເພື່ອແນໃສ່ຢຸດຕິການບຸກໂຈມຕີຕ່າງໆຂອງ ອິດສະຣາແອນເລ່ັງໃສ່ ຊີຣີ. ລັດຖະບານ ຊີຣີ ໄດ້ຖະແຫຼງວ່າ: ການບຸກໂຈມຕີທາງອາກາດຄັ້ງຕ່າງໆຂອງ ອິດສະຣາແອນເຂົ້າຜືນແຜ່ນດິນຂອງປະເທດນີ້ ແມ່ນການກະທຳ “ລະເມີດກົດໝາຍສາກົນຢ່າງບັງອາດ”, ເຮັດໃຫ້ເຂດຕາເວັນອອກກາງ ເປັນອັນຕະລາຍກ່ວາ. ໃນວັນດຽວກັນ, ລັດຖະມົນຕີການຕ່າງປະເທດ ອັງກິດ ທ່ານ William Hague ໃຫ້ຂໍ້ສັງເກດວ່າ ການບຸກໂຈມຕີທາງອາກາດຂອງ ອິດສະຣາແອນ ເລັ່ງໃສ່ ຊີຣີ ນັ້ນສະແດງໃຫ້ເຫັນວ່າ: ສັນຕິພາບໃນທົ່ວເຂດນີ້ພວມຖືກຂົ່ມຂູ່.