(vovworld) – ວັນທີ 27/5, ອົງການຮ່ວມມືສາກົນ ສ.ເກົາຫຼີ ຢູ່ ຫວຽດນາມ (KOICA) ໄດ້ສົມທົບກັບຄະນະກຳມະການປະຊາຊົນແຂວງ ລາວກາຍ ຈັດຕັ້ງພິທີເປີດສະຫຼອງ “ຫ້ອງການໃຫ້ຄຳປຶກສາການຄຸ້ມຄອງໂຄງການແຫ່ງຄວາມສຸກແຂວງ ລາວກາຍ”. ຫ້ອງການລວມມີ 12 ສະມາຊິກ. ບັນດາສະມາຊິກຂອງອົງການມີໜ້າທີ່ໜູນຊ່ວຍ, ຜັນຂະຫຍາຍການປະຕິບັດ ແລະ ຕິດຕາມກວດກາການກໍ່ສ້າງທາງຄົມມະນາຄົມຊົນນະບົດ, ໜູນຊ່ວຍພັດທະນາເສດຖະກິດ, ລະບົບພື້ນຖານໂຄງລ່າງຮັບໃຊ້ການພັດທະນາວັດທະນະທຳ, ການສຶກສາ, ການແພດ; ຍົກສູງຄວາມສາມາດໃຫ້ພະນັກງານຂັ້ນຮາກຖານ ແລະ ຄຸ້ມຄອງລັດຂອງໂຄງການດັ່ງກ່າວ ເຊິ່ງໄດ້ຮັບການຜັນຂະຫຍາຍ ແລະ ປະຕິບັດໃນບໍລິເວນແຂວງ ລາວກາຍ.
ກ່າວຄຳເຫັນທີ່ພິທີ, ທ່ານ Chang Jae Yun , ຜູ້ອຳນວຍການແຫ່ງຊາດ KOICA ຢູ່ ຫວຽດນາມ ເນັ້ນໜັກວ່າ: ໂຄງການແຫ່ງຄວາມສຸກຢູ່ ລາວກາຍ ໄດ້ຮັບການປະຕິບັດ ເພື່ອແນໃສ່ໜູນຊ່ວຍແຂວງ ລາວກາຍ ລົບລ້າງຄວາມອຶດຫິວ, ຫລຸດຜ່ອນຄວາມທຸກຍາກຢ່າງໝັ້ນຄົງ, ຜ່ານການຊ່ວຍແຂວງ ລາວກາຍ ກໍ່ສ້າງຊົນນະບົດໃໝ່ຕາມຮູບແບບ Samuel Undong ຂອງ ສ.ເກົາຫຼີ. ສະນັ້ນ, ບັນດາສະມາຊິກໃຫ້ຄຳປຶກສາຂອງໂຄງການ ຄວນປະຕິບັດບົດບາດ, ໜ້າທີ່ຂອງຕົນເປັນຢ່າງດີ ເພື່ອໃຫ້ໂຄງການໄດ້ຮັບການປະຕິບັດຢ່າງມີປະສິດທິຜົນ.