(vovworld) -ກອງປະຊຸມສຸດຍອດ ອົງການຮ່ວມມື ຊຽງໄຮ້ (ຫຼື SCO) ຄັ້ງທີ 12 ໄດ້ອັດລົງໃນວັນທີ 7/6 ຢູ່ ນະຄອນຫລວງ ປັກກີ່ງ ປະເທດຈີນ ພາຍຫລັງເຮັດວຽກມາເປັນເວລາ 2 ວັນ. ປະມຸກລັດບັນດາປະເທດ SCO ໄດ້ລົງນາມໃນເອກະສານ 10 ສະບັບ ແລະ ຮັບຮອງເອົາຖະແຫລງການຮ່ວມ. ປະມຸກລັດບັນດາປະເທດສະມາຊິກ SCO ໄດ້ຮັບຮອງເອົາຂໍ້ຕົກລົງກ່ຽວກັບເລື່ອງມອບຂໍ້ກຳນົດກ່ຽວກັບນັກສັງເກດການຂອງSCO ໃຫ້ແກ່ ອາບການິສະຖານ ແລະ ມອບຂໍ້ກຳນົດຄູ່ຮ່ວມມືເຈລະຈາ ໃຫ້ແກ່ ຕວກກີ, ຮັບຮອງເອົາຂໍ້ຕົກລົງແຕ່ງຕັ້ງທ່ານ Dmitri Mezentsev ຊາວ ລັດເຊຍ ເປັນເລຂາທິການ SCO. ໃນຖະແຫລງການຮ່ວມ ປະມຸກລັດບັນດາປະເທດສະມາຊິກ SCO ຄັດຄ້ານການແຊກແຊງທາງການທະຫານເຂົ້າວຽກງານຢູ່ ອາຊີຕາເວັນອອກໃກ້ ແລະ ອາຟຼິກາເຫນືອ, ຮຽກຮ້ອງໃຫ້ປະຊາຄົມສາກົນຈົ່ງເຄົາລົບບັນດາຫລັກການພື້ນຖານຂອງກົດບັດສະຫະປະຊາຊາດ ແລະ ມາດຕະຖານຂອງກົດໝາຍສາກົນ.
ກ່ອນຫນ້ານັ້ນ, ຕອນບ່າຍວັນທີ 6/6, ທ່ານປະທານປະເທດຈີນ ຫູຈີນເທົ່າ ແລະ ປະທານາທິບໍດີ 5 ປະເທດສະມາຊິກຂອງອົງການຮ່ວມມື ຊຽງໄຮ້ (ຫຼື SCO) ແມ່ນ ລັດເຊຍ, Kazakhstan, Kyrgyzstan, Tagikixtan ແລະ Uzbekistan ໄດ້ດຳເນີນວາລະປະຊຸມລັບ ໃນຂອບເຂດກອງປະຊຸມສຸດຍອດ SCO ຄັ້ງທີ 12 ທີ່ແກ່ຍາວເປັນເວລາ 2 ວັນ. ວາລະປະຊຸມໄດ້ດຳເນີນທີ່ຫໍປະຊຸມສະພາຜູ້ແທນປະຊາຊົນແຫ່ງຊາດຈີນ ຢູ່ນະຄອນຫຼວງ ປັກກິ່ງ ພາຍໃຕ້ການເປັນປະທານຂອງທ່ານປະທານປະເທດ ຈີນ ຫູຈີນເທົ່າ. ກ່າວຄຳເຫັນທີ່ວາລະປະຊຸມ, ທ່ານປະທານປະເທດ ຫູຈີນເທົ່າ ຖືວ່າ: ທີ່ກອງປະຊຸມ SCO ຄັ້ງນີ້, ບັນດາປະເທດສະມາຊິກ ຄວນກຳນົດທິດ ກໍຄືວາງຈຸດໝາຍພັດທະນາຂອງອົງການ ໃນ 10 ປີຈະມາເຖິງ ຢ່າງຈະແຈ້ງ. ບັນດາປະເທດຄວນເພີ່ມທະວີການຮັບຮູ້ລວມ, ຊອກຫາທິດພັດທະນາໃໝ່ໃຫ້ແກ່ອົງການຕາມທິດນຳມາເຊິ່ງປະສິດທິຜົນໃຫ້ແກ່ບັນດາປະເທດສະມາຊິກ, ພ້ອມທັງປະກອບສ່ວນປົກປັກຮັກສາສັນຕິພາບ, ສະຖຽນລະພາບຂອງພາກພື້ນ ແລະ ໂລກ. ການນຳ ຈີນ ໄດ້ຍົກອອກຂໍ້ສະເໜີ 4 ຂໍ້ ເພື່ອແນໃສ່ຊຸກຍູ້ການຮ່ວມມືລະຫວ່າງບັນດາປະເທດສະມາຊິກ SCO ໃນໄລຍະຈະມາເຖິງ, ໃນນັ້ນເນັ້ນໜັກເຖິງຄວາມຕ້ອງການພັດທະນາສັນຕິພາບ ແລະ ສະຖຽນລະພາບໃນພາກພື້ນ, ເພີ່ມທະວີຄວາມໄວ້ເນື້ອເຊື່ອໃຈ, ຄວາມສາມັກຄີ... ປະມຸກລັດບັນດາປະເທດສະມາຊິກ SCO ລ້ວນແຕ່ເຫັນດີເປັນເອກະສັນກັນຖືວ່າ: ທາງອົງການໄດ້ເສີມຂະຫຍາຍບົດບາດສຳຄັນໃນການຊຸກຍູ້ການຮ່ວມມືພາຍໃນກຸ່ມ, ພ້ອມກັນຮັບມືກັບວິກິດການ ແລະ ການທ້າທາຍ, ຮັກສາຄວາມໝັ້ນຄົງ, ຄວາມສະຖຽນລະພາບໃນພາກພື້ນ.