ອີຍີບ: ສານລັດຖະທຳມະນູນປະຕິເສດ ຮ່າງກົດໝາຍວ່າດ້ວຍການເລືອກຕັ້ງ
(ພາບປະກອບ)
(vovworld) - ວັນທີ 18/02, ສານລັດຖະທຳມະນູນອີຍີບ ປະຕິເສດຮ່າງກົດໝາຍວ່າດ້ວຍການເລືອກຕັ້ງສະພາແຫ່ງຊາດ ໂດຍສະພາ Shura (ສະພາສູງອີຍີບ) ຮຽບຮຽງ, ໂດຍຖືວ່າມີບາງຂໍ້ມາດຕາໃນເອກະສານດັ່ງກ່າວລະເມີດລັດຖະທຳມະນູນ. ການກະທຳດັ່ງກ່າວອາດຈະເຮັດໃຫ້ການເລືອກຕັ້ງສະພາແຫ່ງຊາດ ອີຍີບ, ຄາດວ່າ ຈະຈັດຂຶ້ນໃນເດືອນ 04/2013 ຖືກໂຈະໄວ້. ຕາມຖະແຫຼງການຂອງສານລັດຖະທຳມະນູນແລ້ວ, ມີ 5 ມາດຕາໃນຮ່າງກົດໝາຍວ່າດ້ວຍການເລືອກຕັ້ງດັ່ງກ່າວລະເມີດລັດຖະທຳມະນູນ ແລະ ສານລັດຖະທຳມະນູນໄດ້ມອບຄືນເອກະສານນີ້ໃຫ້ສະພາ Sura ພິຈາລະຈາ, ປັບປຸງບັນດາຂໍ້ມາດຕາທີ່ຖືກປະຕິເສດ. ໃນຈຳນວນມາດຕາດັ່ງກ່າວມີມາດຕາໜື່ງອະນຸຍາດໃຫ້ບັນດາສະມາຊິກຂອງພັກຕ່າງໆລົງສະໝັກເລືອກຕັ້ງເຂົ້າທີ່ນັ່ງສະຫງວນໃຫ້ແກ່ຜູ້ອອກສະໝັກຮັບເລືອກຕັ້ງເອກະລາດ ແລະ ມາດຕາໜື່ງທີ່ກ່ຽວຂ້ອງເຖິງການຈັດແບ່ງບັນດາເຂດເລືອກຕັ້ງໃນທົ່ວປະເທດ. ກ່ອນໜ້ານັ້ນ, ທ່ານປະທານາທິບໍດີ Mohamed Morsi ຄາດວ່າ ຈະປະກາດກົດໝາຍວ່າດ້ວຍການເລືອກຕັ້ງໃນວັນທີ 25/02 ແລະ ກຳກົດເວລາດຳເນີນການເລືອກຕັ້ງ. ການເລືອກຕັ້ງນີ້ຄາດວ່າ ຖືກແບ່ງເປັນຫຼາຍຄັ້ງ ຢູ່ເຂດຕ່າງໆຍ້ອນຂາດຜູ້ສັງເກດການເລືອກຕັ້ງ.
ໃນເຫດການອື່ນອີກ, ທ່ານ Mamdouh Ramzi, ສະມາຊິກຄະນະກຳມາທິການລັດຖະທຳມະນູນ ແລະ ນິຕິບັນຍັດທີ່ຂຶ້ນກັບສະພາ Shura (ສະພາສູງອີຍີບ), ໃຫ້ຮູ້ວ່າ, ການເລືອກຕັ້ງສະພາແຫ່ງຊາດຄາດວ່າ ຈະດຳເນີນໃນອາທິດໜ້າໄປບໍ່ສາມາດປະຕິບັດໄດ້ ຈົນກວ່າເວລາທີ່ຮ່າງກົດໝາຍວ່າດ້ວຍການເລືອກຕັ້ງສະບັບປັບປຸງໄດ້ຮັບການໃຫ້ສັດຕະຍາບັນ.