ອັດກອງປະຊຸມການທູດ ຄັ້ງທີ 28
ກອງປະຊຸມການທູດຄັ້ງທີ 28
(ພາບ: chinhphu.vn)
(vovworld) –ຕອນບ່າຍວັນທີ 20/12, ກອງປະຊຸມການທູດຄັ້ງທີ 28 ດ້ວຍຫົວຂໍ້ວ່າ ”ການທູດເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນ” ໄດ້ອັດລົງຢູ່ຮ່າໂນ້ຍ ພາຍໃຕ້ການເປັນປະທານຂອງທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດ ຟ້າມບິ່ນມິນ. ກອງປະຊຸມໄດ້ສະຫຼຸບບັນດາຜົນງານທີ່ບັນລຸໄດ້ໃນໄລຍະຜ່ານມາ, ຖອດຖອນບົດຮຽນ, ຈາກນັ້ນວາງມາດຕະການຜັນຂະຫຍາຍບັນດາໜ້າທີ່ການຕ່າງປະເທດໃນໄລຍະຈະມາເຖິງ. ກອງປະຊຸມກຳນົດໜ້າທີ່ຂອງຂະແໜງການທູດໃນໄລຍະຈະມາເຖິງແມ່ນ: ສືບຕໍ່ເສີມຂະຫຍາຍກຳລັງແຮງຂອງແນວທາງການຕ່າງປະເທດເອກະລາດ, ເປັນເຈົ້າ, ປະກອບສ່ວນຮັກສາສະພາບແວດລ້ອມສັນຕິພາບ, ສະຖຽນລະພາບ, ຮັບໃຊ້ການພັດທະນາເສດຖະກິດ ຕິດພັນກັບການຍູ້ແຮງການເຊື່ອມໂຍງກັບສາກົນ ດ້ວຍການປັບປຸງ, ເພີ່ມທະວີແນວຮົບການຕ່າງປະເທດ - ປ້ອງກັນຊາດ - ປ້ອງກັນຄວາມສະຫງົບ, ປະກອບສ່ວນປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ບັນດາຜົນປະໂຫຍດຍຸດທະສາດຂອງປະເທດຢ່າງໝັ້ນຄົງ. ຄຽງຂ້າງນັ້ນ, ສືບຕໍ່ມານະພະຍາຍາມນຳການພົວພັນກ້າວເຂົ້າສູ່ລວງເລິກ. ຕັ້ງໜ້າເຂົ້າຮ່ວມບັນດາເວທີປາໄສຫຼາຍຝ່າຍໃນພາກພື້ນ ແລະ ສາກົນຢ່າງມີປະສິດທິຜົນ. ນອກນັ້ນ, ຍູ້ແຮງການຜັນຂະຫຍາຍການເຄື່ອນໄຫວຕ່າງປະເທດຢ່າງຄົບຊຸດ ແລະ ຮອບດ້ານ, ເພີ່ມທະວີການພົວພັນລະຫວ່າງການທູດດ້ານການເມືອງ ກັບການທູດເສດຖະກິດ, ການທູດວັດທະນະທຳ, ວຽກງານກ່ຽວກັບຊາວຫວຽດນາມຢູ່ຕ່າງປະເທດ, ສະໜັບສະໜູນ, ປົກປ້ອງປະຊາຊົນ, ສື່ສານ - ໂຄສະນາກ່ຽວກັບການຕ່າງປະເທດ, ຄົ້ນຄ້ວາ, ເປັນເສນາທິການດ້ານຍຸດທະສາດ; ຍູ້ແຮງການສົມທົບກັນຢ່າງແໜ້ນແຟ້ນກັບບັນດາກະຊວງ, ຂະແໜງການ ແລະ ໜູນຊ່ວຍທ້ອງຖີ່ນຕ່າງໆ. ເພື່ອປະຕິບັດບັນດາຄາດໝາຍທີ່ໄດ້ວາງອອກ, ຂະແໜງການທູດ ຈະສືບຕໍ່ຜັນຂະຫຍາຍວຽກງານກໍ່ສ້າງຂະແໜງ, ຍົກສູງປະສິດທິຜົນການຈັດຕັ້ງກົງຈັກ ແລະ ຄຸນນະພາບແຫຼ່ງຊັບພະຍາກອນມະນຸດ.