(vovworld) – ພາຍຫຼັງເຮັດວຽກມາເປັນເວລາ 4 ວັນ, ຕອນບ່າຍວັນທີ 7/5. ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ໄດ້ອັດລົງ. ບັນດາຜູ້ແທນໄດ້ລົງມະຕິບາງເນື້ອໃນກ່ຽວກັບທິດທາງວຽກງານບຸກຄະລາກອນຄະນະບໍລິຫານງານສູນກາງພັກ ຊຸດທີ 12 ແລະ ບາງຮູບແບບອຳນາດການປົກຄອງທ້ອງຖີ່ນ; ຮັບຮອງເອົາມະຕິກອງປະຊຸມຄັ້ງທີ 11 ຄະນະບໍລິຫານງານສູນກາງພັກຊຸດທີ 11.
ໂດຍເປັນປະທານວາລະອັດກອງປະຊຸມ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ມີບົດປາໄສສຳຄັນ. ກ່ຽວກັບຄວາມຮຽກຮ້ອງກໍ່ສ້າງຄະນະບໍລິຫາງງານສູນກາງພັກຊຸດທີ 12, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ:
“ໂດຍແມ່ນອົງການນຳພາສູງສຸດຂອງພັກ, ຄະນະບໍລິຫານງານສູນກາງຊຸດທີ 12 ຕ້ອງເປັນໝູ່ຄະນະທີ່ໝັ້ນຄົງເຂັ້ມແຂງຢ່າງແທ້ຈິງ, ມີຄວາມສາມັກຄີເປັນເອກະພາບຢ່າງແໜ້ນແຟ້ນ, ມີຄຸນນະທາດດ້ານການເມືອງຢ່າງໝັ້ນຄົງ. ມີຄຸນສົມບັດຢ່າງປອດໄສ, ເດັດດຽວປະຕິບັດຈຸດໝາຍເອກະລາດແຫ່ງຊາດ ແລະ ລັດທິສັງຄົມນິຍົມ, ມີວິໄສທັດຍຸດທະສາດ, ມີພູມປັນຍາ, ຈີນຕະນາການປ່ຽນໃໝ່, ມີຫົວຄິດປະດິດສ້າງ, ມີເຈດຈຳນົງສູ້ຮົບ, ສາມດເຕົ້າໂຮມຄວາມສາມັກຄີ, ຄວາມເປັນເອກະພາບໃນທົ່ວພັກ, ຕິດພັນກັບປະຊາຊົນຢ່າງແໜ້ນແຟ້ນ, ມີອິດທິພົນຊື່ສຽງ, ມີຄວາມສາມາດຊີ້ນຳນຳພາປະເທດຊາດໃນໄລຍະພັດທະນາໃໝ່“.
ກ່ຽວກັບໂຄງການສະໜາມບິນສາກົນລອງແທ່ງ. ສູນກາງສືບຕໍ່ຢືນຢັນເຖິງຄວາມຈຳເປັນ, ຖືກຕ້ອງຂອງແຜນນະໂຍບາຍລົງທຶນກໍ່ສ້າງສະໜາມບິນນີ້, ຖືວ່ານີ້ແມ່ນໂຄງການສຳຄັນພິເສດລະດັບຊາດ, ມີຄວາມໝາຍໃຫຍ່ຫຼວງຕໍ່ການພັດທະນາເສດຖະກິດສັງຄົມຂອງປະເທດຊາດ.
ກ່າວຄຳເຫັນສະຫຼຸບກອງປະຊຸມ. ທ່ານເລຂາທິການໃຫຍ່ ຫງວຽນຟູ໋ຈ້ອງ, ເນັ້ນໜັກວ່າ:
“ເພື່ອປະຕິບັດສຳເລັດຄາດໝາຍ, ໜ້າທີ່ປີ 2015, ກ້າວໄປເຖິງກອງປະຊຸມໃຫຍ່ຄັ້ງທີ 12 ຂອງພັກ, ພະນັກງານສູນກາງແຕ່ລະຄົນຈົ່ງຍົກສູງຄວາມຮັບຜິດຊອບຕໍ່ພັກ, ຕໍ່ປະຊາຊົນ ແລະ ປະເທດຊາດ, ສຸມໃສ່ຊີ້ນຳນຳພາການປະຕິບັດມະຕິກອງປະຊຸມໃຫຍ່ຄັ້ງທີ 11 ກໍ່ຄືມະຕິຕ່າງໆຂອງສູນກາງໃຫ້ດີ. ພິເສດແມ່ນເປັນເຈົ້າການ, ຕັ້ງໜ້າເຂົ້າຮ່ວມການກະກຽມບຸກຄະລາກອນຄະນະບໍລິຫານງານສູນກາງ, ກົມການເມືອງ, ຄະນະເລຂາ ແລະ ບັນດາຕຳແໜງການນຳຫຼັກແຫຼ່ງຊຸດທີ 12 ໃຫ້ດີ“.
ກ່ຽວກັບຮູບແບບຈັດຕັ້ງອຳນາດການປົກຄອງ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າຄວນສຸມໃສ່ເຮັດໃຫ້ກົງຈັກ, ບັນຈຸພະນັກງານໃຫ້ກະທັດລັດເພື່ອເໝາະສົມກັບບົດບາດໜ້າທີ່ຂອງແຕ່ລະອົງການ, ຫົວໜ່ວຍ, ກຳນົດການແບ່ງຂັ້ນ, ແບ່ງອຳນາດຢ່າງຈະແຈ້ງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ສະເໜີວ່າ, ເລື່ອງປ່ຽນໃໝ່ການຈັດຕັ້ງ ແລະ ການເຄື່ອນໄຫວຂອງສະພາປະຊາຊົນຕ້ອງຕິດພັນກັບການປ່ຽນໃໝ່ການຈັດຕັ້ງ ແລະການເຄື່ອນໄຫວຂອງຄະນະກຳມະການປະຊາຊົນ, ປ່ຽນໃໝ່ແບບວິທີນຳພາຂອງຄະນະພັກ, ຍົກສູງຄຸນນະພາບພະນັກງານ ແລະ ສະມາຊິກສະພາປະຊາຊົນ, ສ້າງທຸກເງື່ອນໄຂເພື່ອໃຫ້ສະພາປະຊາຊົນເຄື່ອນໄຫວ.