(vovworld) – ວາລະອັດກອງປະຊຸມ ສະໄໝສາມັນຄັ້ງທີ 2 ສະພາແຫ່ງຊາດຊຸດທີ 14 ໄດ້ດຳເນີນຢ່າງສົມກຽດໃນຕອນເຊົ້າວັນທີ 23/11, ພາຍຫຼັງເຮັດວຽກຢ່າງຮີບດ່ວນ, ເຂັ້ມງວດ ເປັນເວລາກ່ວາ 1 ເດືອນ. ກ່າວຄຳເຫັນອັດກອງປະຊຸມ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ສັງລວມບັນດາໝາກຜົນສຳຄັນຂອງກອງປະຊຸມ.
ກອງປະຊຸມ ສະໄໝສາມັນຄັ້ງທີ 2 ສະພາແຫ່ງຊາດຊຸດທີ 14
|
ຕາມນັ້ນແລ້ວ, ສະພາແຫ່ງຊາດໄດ້ພິຈາລະນາ, ຕີລາຄາໝາກຜົນແຫ່ງການຜັນຂະຫຍາຍການປະຕິບັດແຜນການພັດທະນາເສດຖະກິດ - ສັງຄົມ, ງົບປະມານແຫ່ງລັດປີ 2016, ໝາກຜົນແຫ່ງການສ້າງໂຄງປະກອບພື້ນຖານເສດຖະກິດໄລຍະ 2011 – 2015 ຄືນໃໝ່ ແລະ ເຫັນດີເປັນເອກະພາບໃຫ້ສັງເກດວ່າທົ່ວພັກ, ທົ່ວກອງທັບ, ທົ່ວປວງຊົນ, ບັນດາຂະແໜງການ, ຂັ້ນຕ່າງໆໄດ້ມານະພະຍາຍາມສູ້ຊົນ ແລະ ບັນລຸໄດ້ໝາກຜົນສຳຄັນຫຼາຍຢ່າງໃນການຜັນຂະຫຍາຍການປະຕິບັດບັນດາແຜນການທີ່ໄດ້ວາງອອກ:
“ບັນດາສະມາຊິກສະພາແຫ່ງຊາດ (ສສຊ) ໄດ້ຕັ້ງໜ້າປຶກສາຫາລື, ຊີ້ອອກບັນດາຂໍ້ຈຳກັດ, ສິ່ງຄ້າງຄາຂອງປະເທດຊາດຢ່າງກົງໄປກົງມາ ແລະ ສະເໜີຫຼາຍມາດຕະການແທດຈິງ ຮຽກຮ້ອງໃຫ້ລັດຖະບານ, ບັນດາຂະແໜງການ, ທຸກຂັ້ນຕ້ອງມານະພະຍາຍາມກ່ວາອີກເພື່ອແກ້ໄຂສິ່ງທີ່ຍັງຄົງຄ້າງ, ຂໍ້ຈຳກັດເພື່ອແນໃສ່ພັດທະນາເສດຖະກິດແບບຍືນຍົງ, ຮັບປະກັນຊີວິດສັງຄົມ, ປັບປຸງຊີວິດການເປັນຢູ່ຂອງປະຊາຊົນ, ຮັກສາຄວາມໝັ້ນຄົງດ້ານການເມືອງໃນປີ 2017 ແລະ ໃນຊຸມປີຕໍ່ໄປ. ທີ່ກອງປະຊຸມຄັ້ງນີ້, ດ້ວຍການພິຈາລະນາຢ່າງລະມັດລະວັງ, ຄິດໄລ່ຊັ່ງຊາຢ່າງເຖິງຖອງ, ສະພາແຫ່ງຊາດໄດ້ຕົກລົງຢຸດຕິການປະຕິບັດໂຄງການກໍ່ສ້າງໂຮງງານໄຟຟ້ານິວເຄຼຍ ນີງທ້ວນ”
ໃນການສ້າງກົດໝາຍ, ສະພາແຫ່ງຊາດໄດ້ສະຫງວນເວລາສ່ວນຫຼາຍເພື່ອພິຈາລະນາ, ຮັບຮອງເອົາກົດໝາຍ 3 ສະບັບ, ມະຕິ 11 ສະບັບ ແລະ ປະກອບຄຳເຫັນໃສ່ຮ່າງກົດໝາຍອື່ນ 14 ສະບັບ, ປະກອບສ່ວນປັບປຸງກົດໝາຍວ່າດ້ວຍສິດທິມະນຸດ, ສິດ ແລະ ພັນທະພື້ນຖານຂອງພົນລະເມືອງປັບປຸງກົນໄກເສດຖະກິດການຕະຫຼາດໃຫ້ສົມບູນແບບ, ປັບປຸງສະພາບແວດລ້ອມແຫ່ງການດຳເນີນທຸລະກິດ, ຊຸກຍູ້ການຫັນປະເທດຊາດເປັນປະເທດອຸດສາຫະກຳ, ທັນສະໄໝ.
ໄປຄຽງຄູ່ກັບການເຄື່ອນໄຫວຕ່າງໆຂອງກອງປະຊຸມ, ສະພາແຫ່ງຊາດຍັງຜັນຂະຫຍາຍການເຄື່ອນໄຫວບາງຢ່າງໃນຕົ້ນອາຍຸການສະພາແຫ່ງຊາດຊຸດທີ 14 ທີ່ມີຄວາມໝາຍສຳຄັນຄື: ສະເໜີຕົວກຸ່ມ ສສຊ ຍິງ ຫວຽດນາມ, ກຸ່ມ ສສຊ ໜຸ່ມ, ກຸ່ມ ສສຊ ມິດຕະພາບກັບບັນດາປະເທດ ແລະ ການເຄື່ອນໄຫວພົວພັນຕ່າງປະເທດສຳຄັນອື່ນໆອີກ. ບັນດາການເຄື່ອນໄຫວນີ້ຈະປະກອບສ່ວນຊຸກຍູ້ການເຄື່ອນໄຫວຢ່າງມີປະສິດທິຜົນຂອງສະພາແຫ່ງຊາດໃນຫຼາຍຂົງເຂດໃນໄລຍະຈະມາເຖິງ.
ເມື່ອເຕື້ອງເຖິງໜ້າທີ່ພາຍຫຼັງກອງປະຊຸມສະໄໝສາມັນ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄດ້ຊີ້ແຈ້ງວ່າ:
“ສະເໜີໃຫ້ບັນດາ ສສຊ ສືບຕໍ່ຈິດໃຈ “ປ່ຽນໃໝ່, ສາມັກຄີ, ປະດິດສ້າງ, ມີການກະທຳ”, ລາຍງານໝາກຜົນຂອງກອງປະຊຸມ ຕໍ່ບັນດາຜູ້ມີສິດເລືອກຕັ້ງຢ່າງທັນການ, ຕັ້ງໜ້າ ເປັນເຈົ້າການໃນວຽກງານສ້າງກົດໝາຍ, ຕິດຕາມກວດກາກ່ວາອີກ, ຈັດຕັ້ງການເຄື່ອນໄຫວພົບປະກັບຜູ້ມີສິດເລືອກຕັ້ງເປັນຢ່າງດີ, ຮັບຟັງແນວຄິດຈິດໃຈຄວາມມຸ່ງມາດປາດຖະໜາຂອງ ຜູ້ມີສິດເລືອກຕັ້ງ ແລະ ປະຊາຊົນ, ຄົ້ນຄ້ວາ, ຊອກຮູ້, ກຳແໜ້ນສະພາບການຊີວິດສັງຄົມເພື່ອສ່ອງແສງ, ສະເໜີຕໍ່ສະພາແຫ່ງຊາດ, ລັດຖະບານ ແລະ ບັນດາອົງການກ່ຽວຂ້ອງຢ່າງທັນການ”