ບັນດາຜູ້ແທນເຂົ້າຮ່ວມກອງປະຊຸມໃຫຍ່ແມ່ຍິງທົ່ວປະເທດຊຸດທີ 11
ພາບປະກອບ:internet |
(vovworld) - ຕອນເຊົ້າວັນທີ 14/3 ຢູ່ ຮ່າໂນ້ຍ, ກອງປະຊຸມໃຫຍ່ຜູ້ແທນແມ່ຍິງທົ່ວປະເທດຊຸດທີ 11 ຈັດວາລະອັດກອງປະຊຸມ. ເຂົ້າຮ່ວມພິທີ ມີທ່ານ ເຈືອງເຕີນຊາງ ປະທານປະເທດຫວຽດນາມ, ທ່ານ ຫງວຽນຊິງຮຸ່ງ ປະທານສະພາແຫ່ງຊາດ, ທ່ານ ຮູ່ນດ໋າມ ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ພ້ອມດ້ວຍຜູ້ຕາງຫນ້າແມ່ຍິງທີ່ດີເດັ່ນໃນທົ່ວປະເທດ. ພາຍຫລັງເຮັດວຽກມາເປັນເວລາ 3 ວັນ, ບັນດາຜູ້ແທນໄດ້ຮັບຮອງເອົາບັນດາເອກະສານສຳຄັນຂອງກອງປະຊຸມໃຫຍ່ຄື: ຮ່າງກົດລະບຽບຂອງສະຫະພັນແມ່ຍິງຫວຽດນາມສະບັບປັບປຸງ ແລະ ເພີ່ມເຕີມ, ຮ່າງມະຕິກອງປະຊຸມໃຫຍ່ຊຸດທີ 11. ແລະ ກໍຢູ່ທີ່ກອງປະຊຸມໃຫຍ່, ບັນດາຜູ້ແທນຕາງຫນ້າໃຫ້ແມ່ຍິງໃນທົ່ວປະເທດໄດ້ເລືອກຕັ້ງຄະນະປະທານໃຫມ່ຂອງສະຫະພັນແມ່ຍິງຫວຽດນາມ ຊຸດທີ 11 ດ້ວຍກຳມະການຄະນະບໍລິຫານ 163 ທ່ານນາງ ທີ່ຕາງຫນ້າໃຫ້ແມ່ຍິງດີເດັ່ນທຸກຊັ້ນຄົນໃນທົ່ວປະເທດ.ໃນອາຍຸການ 2012 - 2017, ທ່ານນາງ ຫງວຽນທິແທນຮ່ວາ ກຳມະການຄະນະບໍລິຫານງານສູນກາງສະຫະພັນແມ່ຍິງຫວຽດນາມ ຊຸດທີ 10 ສືບຕໍ່ໄດ້ຮັບເລືອກຕັ້ງເປັນປະທານສະຫະພັນແມ່ຍິງຫວຽດນາມຊຸດທີ 11. ຕາງຫນ້າໃຫ້ຄະນະບໍລິຫານງານຊຸດໃຫມ່, ທ່ານນາງ ຫງວຽນທິແທນຮ່ວາ ໄດ້ເນັ້ນຫນັກວ່າ:
“ເພື່ອສົມກັບຄວາມໄວ້ເນື້ອເຊ່ືອໃຈຂອງກອງປະຊຸມໃຫຍ່, ຄະນະບໍລິຫານງານສູນກາງສະຫະພັນແມ່ຍິງຫວຽດນາມຊຸດທີ 11 ຈະສາມັກຄີ, ເສີມຂະຫຍາຍກຳລັງຄວາມສາມາດ, ພູມປັນຍາ, ຮ່ຳຮຽນ ແລະ ຝຶກຝົນຫລໍ່ຫລອມຄຸນສົມບັດຕາມແບບຢ່າງປະທານໂຮ່ຈິມີນ, ສຸດຈິດສຸດໃຈ, ສູ້ຊົນສຳເລັດຫນ້າທີ່ ແລະ ຄວາມຮັບຜິດຊອບຊຶ່ງພັກ, ລັດ ແລະ ເອື້ອຍນ້ອງແມ່ຍິງໃນທົ່ວປະເທດໄດ້ມອບໝາຍໃຫ້.”
ໃນອາຍຸການຊຸດໃຫມ່, ບັນດາຜູ້ແທນສະຫະພັນແມ່ຍິງຫວຽດນາມ ເຫັນດີຈະສືບຕໍ່ປະຕິບັດວຽກງານໂຄສະນາສຶກສາເປັນຢ່າງດີ, ສືບຕໍ່ຈັດຕັ້ງ ແລະ ຍົກສູງຄຸນ ນະພາບຂອງບັນດາຂະບວນການແຂ່ງຂັນ, ປ່ຽນໃຫມ່ເນື້ອໃນ ວິທິການເຄື່ອນໄຫວ, ເອົາໃຈໃສ່ເຖິງບັນຫາສ້າງຄອບຄົວ, ຍົກສູງຄຸນນະພາບພະນັກງານສະຫະພັນເພື່ອປະຕິບັດບົດບາດເປັນຂົວເຊື່ອມຕໍ່ລະຫວ່າງພັກ, ລັດ ກັບປະຊາຊົນເປັນຢ່າງດີ, ຕັ້ງຫນ້າເຂົ້າຮ່ວມການກໍ່ສ້າງພັກ, ລັດ ໃຫ້ປອດໃສໝັ້ນຄົງເຂັ້ມແຂງ. ພ້ອມທັງເສີມຂະຫຍາຍມູນເຊື້ອອັນດີງາມຂອງແມ່ຍິງຫວຽດນາມ, ຕັ້ງຫນ້າຮ່ຳຮຽນ, ມີຫົວຄິດປະສິດສ້າງໃນການອອກແຮງານ, ມານະພະຍາຍາມສູ້ຊົນປະຕິບັດເນື້ອໃນຈິດໃຈຂອງກອງປະຊຸມໃຫຍ່ຜູ້ແທນຄັ້ງທີ 10 ຢ່າງມີໄຊ,ປະກອບສ່ວນເຂົ້າໃນວຽກງານສ້າງສາ ແລະ ປົກປັກຮັກສາປະເທດຊາດຢ່າງມີປະສິດທິຜົນ.