(vovworld) - ວັນທີ 30/07, ທ່ານລັດຖະມົນຕີກະຊວງການຕ່າງປະເທດອາເມລິກາ John Kerry ໄດ້ຖະແຫຼງວ່າ ອິດສຣາແອນ ແລະ ປາແລດສຕິນ ໄດ້ຕົກລົງພົບປະກັນ ເພື່ອເລີ່ມຕົ້ນການເຈລະຈາຢ່າງແທດຈິງ ດ້ວຍຈຸດໝາຍລົງນາມໃນສັນຍາສັນຕິພາບໃຫ້ໄດ້ໃນຮອບເວລາ 9 ເດືອນ.
ກ່າວຄຳເຫັນໃນການປະຊຸມຂ່າວຮ່ວມ ກັບຫົວໜ້າຄະນະເຈລະຈາ ອິດສຣາແອນ ແລະ ປາແລດສຕິນ, ທ່ານລັດຖະມົນຕີການຕ່າງປະເທດ John Kerry ໃຫ້ຮູ້ວ່າ ການເຈລະຈາຈະມາເຖິງ ອາດຈະດຳເນີນໄປຢູ່ອິສຣາແອນ ຫຼື ເຂດຕ່າງໆຂອງປາແລດສຕິນ. ເວລາທີ່ 2 ຝ່າຍພົບປະກັນ ຄາດວ່າໃນກາງເດືອນ ສິງຫາ. ຈຸດໝາຍຂອງຮອບເຈລະຈາຈະມາເຖິງແມ່ນ ປຶກສາຫາລືບັນດາບັນຫາຍັງມີຄວາມບໍ່ລົງລອຍກັນ ແນໃສ່່ຢຸດຕິການປະທະກັນລະຫວ່າງຊາວ ອິດສຣາແອນ ແລະ ປາແລດສຕິນ. ທ່ານ John Kerry ກໍ່ຍ້ອມຮັບວ່າ ເສັ້ນທາງສັນຕິພາບໃນຕໍ່ໜ້າບໍ່ແມ່ນງ່າຍ ແຕ່ຫວັງວ່າຈະບັນລຸໄດ້ຂໍ້ຕົກລົງໃນຮອບເວລາ 9 ເດືອນ.
ກຸ່ມ “4 ຝ່າຍ” ທີ່ອຸປະຖຳໃຫ້ວິວັດການສັນຕິພາບຢູ່ຕາເວັນອອກກາງ ເຊິ່ງລວມມີ ສະຫະປະຊາຊາດ, ສະຫະພາບເອີລົບ, ອາເມລິກາ ແລະ ລັດເຊຍ, ໄດ້ອອກຖະແຫຼງການຮ່ວມ ຊົມເຊີຍເລື່ອງ ອິດສຣາແອນ ແລະ ປາແລດສຕິນ ເຊື່ອມຕໍ່ການເຈລະຈາຄືນໃໝ່. ກຸ່ມ 4 ຝ່າຍຢືນຢັນວ່າ ຈະເຮັດຈົນສຸດຄວາມສາມາດຂອງຕົນເພື່ອສະໜັບສະໜູນໃຫ້ 2 ຝ່າຍບັນລຸໄດ້ຂໍ້ຕົກລົງກ່ຽວກັບມາດຕະການແກ້ໄຂ 2 ລັດ, ແນໃສ່ສ້າງພື້ນຖານສັນຕິພາບອັນຍາວນານ ແລະ ໝັ້ນຄົງຢູ່ພາກພື້ນນີ້.