ອິນໂດເນເຊຍ ດຳເນີນ ການເລືອກຕັ້ງປະທານາທິບໍດີ
ທ່ານ Prabowo Subianto ແລະ ທ່ານ Joko Widodo
(ພາບ: nasional.inilah.com)
(vovworld) – ໃນວັນທີ 09/07, ປະຊາຊົນ ອິນໂດເນເຊຍ ໄດ້ເລີ່ມໄປປ່ອນບັດເລືອກຕັ້ງເພື່ອເລືອກຕັ້ງປະທານາທິບໍດີຄົນໃໝ່. ໃນຈຳນວນພົນລະເມືອງຂອງປະເທດນີ້ກວ່າ 240 ລ້ານຄົນ ແລະ ຜູ້ມີສິດເລືອກຕັ້ງໃນເກນອາຍຸແຕ່ 17 ປີຂຶ້ນໄປ ກວ່າ 190 ລ້ານຄົນ ຈະປະຕິບັດພັນທະ ແລະ ສິດພົນລະເມືອງຂອງຕົນໃນການເລືອກຕັ້ງຄັ້ງນີ້. ຜູ້ຮັບສະໝັກເລືອກຕັ້ງ 2 ທ່ານ ແມ່ນທ່ານ Joko Widodo, ອະດີດຜູ້ວ່າການລັດ ຈາກາຕາ, ອາຍຸ 53 ປີ ແລະ ທ່ານ Prabowo Subianto, ອະດີດຜູ້ບັນຊາການບັນດາກຳລັງປະກອບອາວຸດ, ອາຍຸ 63 ປີ ໄດ້ຮັບສະໝັກເລືອກຕັ້ງເປັນການນຳສູງສຸດຂອງປະເທດນີ້. ຕາມໝາກຜົນການຢັ່ງຫາງສຽງກ່ອນການເລືອກຕັ້ງ, ຜູ້ຮັບສະໝັກເລືອກຕັ້ງ 2 ທ່ານນີ້ໄດ້ຮັບການສະໜັບສະໜູນທຽບເທົ່າກັນ. ນີ້ແມ່ນການເລືອກຕັ້ງປະທານາທິບໍດີໂດຍກົງຄັ້ງທີ 3 ໃນປະຫວັດສາດຂອງອິນໂດເນເຊຍ.
ຕາມແຜນການ, ໝາກຜົນການເລືອກຕັ້ງໂດຍຄະນະກຳມະການເລືອກຕັ້ງອິນໂດເນເຊຍ ປະກາດຢ່າງເປັນທາງການ ໃນວັນທີ 21 – 22/07, ຫຼັງຈາກນັ້ນ ຖ້າມີບັນດາການໂຕ້ຖຽງກັນກ່ຽວກັບຜົນຂອງການເລືອກຕັ້ງຈະໄດ້ຍື່ນຕໍ່ສານລັດຖະທຳມະນູນອິນໂດເນເຊຍ ໃນລະຫວ່າງວັນທີ 23 – 25/07. ຄາດວ່າ, ປະທານາທິບໍດີຄົນໃໝ່ຈະສາບານຕົວຮັບດຳລົງຕຳແໜ່ງໃນວັນທີ 20/10.