(vovworld) - ພັນທະພາບເອີລົບ (ອີຢູ) ແລະ ຫວຽດນາມ ມານະພະຍາຍາມເຈລະຈາເພື່ອສາມາດລົງນາມ FTA ໃນກາງປີນີ້. ນີ້ແມ່ນເນື້ອໃນໂດຍທ່ານສະມາຊິກລັດຖະສະພາ Bernd Lange, ປະທານກຳມາທິການການຄ້າສາກົນ, ສັງກັດລັດຖະສະພາເອີລົບ, ຍົກອອກທີ່ການພົບປະກັບສື່ມວນຊົນ ເພື່ອແບ່ງປັນບັນດາຂໍ້ມູນກ່ຽວກັບຮອບເຈລະຈາຂອງສັນຍາການຄ້າເສລີລະຫວ່າງສະຫະພາບເອີລົບ - ຫວຽດນາມ ທີ່ຈັດຂຶ້ນໃນຕອນບ່າຍວັນທີ 8/4 ຢູ່ຮ່າໂນ້ຍ. ທ່ານໃຫ້ຮູ້ວ່າ, ພາຍຫຼັງຮອບເຈລະຈາຕ່າງໆ ສະຫະພາບເອີລົບ - ຫວຽດນາມ ໄດ້ເປັນເອກະພາບ ແລະ ຮັບຮອງເອົາຫຼາຍບັນຫາສຳຄັນ. ທ່ານສະມາຊິກລັດຖະສະພາ Bernd Lange ສະແດງຄວາມເຊື່ອໝັ້ນວ່າ:
“ເມື່ອ FTA ໄດ້ຮັບການຮັບຮອງເອົາ, ຂົງເຂດທີ່ມີປະໂຫຍດໃຫ້ແກ່ຫວຽດນາມ ນັ້ນແມ່ນເຄື່ອງຕັດຫຍິບ ແລະ ເກີບໜັງ. ພິເສດເມື່ອສົ່ງອອກຜະລິດຕະພັນກະເສດໄປຍັງຕະຫຼາດເອີລົບແມ່ນມີປະໂຫຍດທີ່ສຸດ. ສ່ວນເຄື່ອງຈັກ, ລົດຈັກ, ໂອໂຕແມ່ນມີປະໂຫຍດໃຫ້ເອີລົບເມື່ອສົ່ງອອກເຂົ້າຕະຫຼາດຫວຽດນາມ. ສຳລັບທັງສອງຝ່າຍ, ການລົງທຶນແມ່ນຂົງເຂດສຳຄັນທີ່ສຸດ, ແມ່ນກຳລັງໜູນຊຸກຍູ້ການພັດທະນາໃຫ້ທັງຫວຽດນາມ ແລະ ອີຢູ. ແລະ ບັນຫາກ່ຽວຂ້ອງເຖິງການປ່ຽນແປງຂອງດິນຟ້າອາກາດ, ກໍ່ແມ່ນບັນຫາທີ່ສອງປະເທດເອົາໃຈໃສ່ທີ່ສຸດ, ດັ່ງນັ້ນເມື່ອ FTA ໄດ້ຮັບການຮັບຮອງເອົາມັນຈະປະກອບສ່ວນແກ້ໄຂບັນຫານີ້ໄດ້“.