(vovworld) - ສະພາບຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ອີຢີບ ພວມຊົ່ວຮ້າຍລົງ, ການດຳລົງຊີວິດ ແລະ ອອກແຮງງານຢູ່ປະເທດອາຟະລິກາເໜືອ ນີ້ພວມປະສົບກັບຄວາມຫຍຸ້ງຍາກ ແລະ ອັນຕະລາຍ. ຕໍ່ໜ້າສະພາບການຄືແນວນັ້ນ, ບັນດາປະເທດລ້ວນແຕ່ມີແຜນການອົບພະຍົບພົນລະເມືອງຂອງຕົນອອກຈາກອີຢີບ. ວັນທີ 20 ສິງຫາ, ກະຊວງການຕ່າງປະເທດ ຟີລິບປີນ ໄດ້ຍົກລະດັບເຕືອນໄພວິກິດການຢູ່ອີຢີບ ຂຶ້ນລະດັບ 4, ເຊິ່ງແມ່ນລະດັບສູງສຸດໃນລະບົບເຕືອນໄພດ່ວນຂອງປະເທດນີ້, ໝາຍຄວາມວ່າ ພົນລະເມືອງຟີລິບປີນ ຢູ່ອີຢີບ ຈະໄດ້ຮັບການຊ່ວຍເຫຼືອຄ່າກັບຄືນເມືອປະເທດ. ຕອນຄໍ່າວັນດຽວກັນ, ບັນດານັກສຶກສາຂອງມາເລເຊຍ ທີ່ພວມຮໍ່າຮຽນຢູ່ອີຢີບ ເລີ່ມອົບພະຍົບໄປຍັງບັນດາປະເທດບ້ານໃກ້ເຮືອນຄຽງຂອງອີຢີບ ກ່ອນທີ່ກັບເມືອປະເທດ.
ໃນຂະນະນັ້ນ, ສະພາບການຢູ່ອີຢີບ ມີບັນດາການຜັນແປ່ໃໝ່. ສຳນັກຂ່າວສານ MENA ຂອງປະເທດນີ້ໄດ້ໃຫ້ຂ່າວວ່າ, ອົງການອ້າຍນ້ອງຊາວມຸດສະລິມ (MB) ໄດ້ເລືອກຮອງຜູ້ນຳ Mahmoud Ezzat ແມ່ນຜູ້ນຳຊົ່ວຄາວ, ພາຍຫຼັງຜູ້ນຳຂອງ MB ແມ່ນ Mohamed Badie ຖືກຈັບຕົວ.
ຕໍ່ໜ້າສະພາບຂາດສະຖຽນລະພາບຢູ່ ອີຢິບ, ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ອີຢິບ ດ່າວແທ່ງຈູງ ໃຫ້ຮູ້ວ່າ: ມາຮອດຈຸດເວລານີ້, ພົນລະເມືອງ ຫວຽດນາມ ຢູ່ ອີຢິບ ທັງໝົດ, ຍັງຄົງໄດ້ຮັບປະກັນຄວາມປອດໄພ. ທ່ານເອກອັກຄະລັດຖະທູດ ດ່າວແທ່ງຈູງ ໃຫ້ຮູ້ວ່າ:
“ລັດຖະບານ ຫວຽດນາມ ກໍ່ຄືກະຊວງການຕ່າງປະເທດໄດ້ເອົາໃຈໃສ່ເຖິງຄວາມປອດໄພຂອງຊາວ ຫວຽດນາມ ປະຈຳ ອີຢິບ. ໂດຍໄດ້ຮັບການຊີ້ນຳຢູ່ພາຍໃນປະເທດ, ພວກຂ້າພະເຈົ້າໄດ້ຕິດຕໍ່ພົວພັນກັບພໍ່ແມ່ ປະຊາຊົນ, ປະຊາຄົມຊາວ ຫວຽດນາມ ພວມທຳມາຫາກິນ ຢູ່ ອີຢິບ ເປັນປະຈຳ, ສົມທົບກັບພາຍໃນປະເທດສ້າງບັນດາວິທີການລະອຽດໃນກໍລະນີທີ່ຈຳເປັນເພື່ອແນໃສ່ອົບພະຍົບ, ຮັບປະກັນຄວາມປອດໄພໃຫ້ປະຊາຄົມ ຫວຽດນາມ ອາໄສຢູ່ ອີຢິບ.”