ອີຢູເພີ່ມທະວີການພົວພັນ ດ້ານການຄ້າກັບອາຊຽນ
ທ່ານ Karel Da Gucht
(ພາບ: ukipdaily.com)
(vovworld)- ທ່ານ Karel Da Gucht ກຳມະການເອີລົບຮັບຜິດຊອບດ້ານການຄ້າ ຈະໄປຢ້ຽມຢາມປະເທດອາຊຽນ ຈຳນວນໜຶ່ງຄື: ຫວຽດນາມ, ກຳປູເຈຍ, ມຽນມາ ເພື່ອເພີ່ມທະວີການພົວພັນດ້ານການຄ້າລະຫວ່າງສະຫະພາບເອີລົບ (ອີຢູ) ແລະ ອາຊຽນ. ຂ່າວຈາກຄະນະກຳມະການເອີລົບ (ອີຊີ) ໃຫ້ຮູ້ວ່າ: ທ່ານ Karel Da Gucht ຈະໄປຢ້ຽມຢາມຫວຽດນາມ, ກຳປູເຈຍ, ມຽນມາ ແຕ່ວັນທີ 17-20/3 ແລະ ຈະພົບປະເຈລະຈາກັບຄູ່ຕຳແໜ່ງຂອງສາມປະເທດເຫຼົ່ານັ້ນ. ການມາ ຢ້ຽມຢາມຮ່າໂນ້ຍ ຂອງທ່ານກົງກັບໂອກາດຈັດຮອບເຈລະຈາຄັ້ງທີ 7 ສັນຍາການຄ້າເສລີລະຫວ່າງຫວຽດນາມ-ອີຢູ (FTA). ທ່ານ Karel Da Gucht ຈະພົບປະກັບທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ແລະ ທ່ານລັດຖະມົນຕີກະຊວງອຸດສາຫະກຳການຄ້າ ຫວູ້ຮຸຍຮ່ວາງ. ຮອບເຈລະຈາຄັ້ງທີ 7 ສັນຍາການຄ້າເສລີລະຫວ່າງຫວຽດນາມ-ອີຢູ (FTA) ຈະດຳເນີນຢູ່ຮ່າໂນ້ຍ ແຕ່ວັນທີ 17-21/3. ສອງຝ່າຍຫວັງວ່າ ເມື່ອສັນຍາດັ່ງກ່າວມີຜົນສັກສິດ, ການພົວພັນດ້ານການຄ້າ ແລະການລົງທຶນລະຫວ່າງຫວຽດນາມ-ອີຢູ ຈະເປີດແງ່ຫວັງຫຼາຍຢ່າງໃຫ້ແກ່ວິສາຫະກິດສອງຝ່າຍ./.