(vovworld) – ຕອນຄໍ່າວັນທີ 22/02, ບັນດາຜູ້ຕາງໜ້າຂອງອີຣານ ແລະ ກຸ່ມ P5+1 (ເຊິ່ງລວມມີ 5 ປະເທດກຳມະການປະຈຳສະພາຄວາມໝັ້ນຄົງ ສປຊ ແມ່ນ: ອາເມລິກາ, ອັງກິດ, ຝຣັ່ງ, ລັດເຊຍ, ຈີນ ແລະ ເຢຍລະມັນ ) ໄດ້ດຳເນີນການເຈລະຈາຢູ່ເຊີແນວ, ປະເທດສະວິດ, ໃນຄວາມມານະພະຍາຍາມບັນລຸຂໍ້ຕົກລົງຮອບດ້ານ ເພື່ອແນໃສ່ຢຸດຕິການໂຕະຖຽງກັບທີ່ແກ່ຍາວກ່ຽວກັບໂຄງການນິວເຄຼຍ ຂອງອີຣານ ແລະ ກໍ່ໃນວັນດຽວກັນ, ທ່ານລັດຖະມົນຕີວ່າການກະຊວງການຕ່າງປະເທດອາເມລິກາ John Kerry ແລະ ທ່ານລັດຖະມົນຕີວ່າການກະຊວງການຕ່າງປະເທດອີຣານ Mohammad Javad Zarif ກໍ່ເລີ່ມດຳເນີນການເຈລະຈາຮອບໃໝ່ຢູ່ເຊີແນວ. ກ່າວຄຳເຫັນພາຍຫຼັງການເຈລະຈາລະຫວ່າງອີຣານ ແລະ ກຸ່ມ P5+1, ຫົວໜ້າຄະນະເຈລະຈາຈີນ ໃຫ້ຮູ້ວ່າ, ບັນດາຝ່າຍໄດ້ປຶກສາຫາລືບັນຫາຕົ້ນຕໍ່ ແລະ ເຫັນດີຈະຈັດຕັ້ງຮອບເຈລະຈາຕໍ່ໄປໃນທ້າຍເດືອນ 02.
ວົງການນັກສັງເກດການໃຫ້ຮູ້ວ່າ, ເປັນຄັ້ງທຳອິດທີ່ລັດຖະມົນຕີວ່າການກະຊວງພະລັງງານອາເມລິກາ ແລະ ຫົວໜ້າອົງການພະລັງງານປະລະມານູອີຣານ ເຂົ້າຮ່ວມການເຈລະຈາ ນີ້ແມ່ນສັນຍານຊີ້ໃຫ້ເຫັນຄວາມປາດຖະໜາຂອງຝ່າຍຕ່າງໆທີ່ຢາກບັນລຸໄດ້ຂໍ້ຕົກລົງຮອບດ້ານ.