(vovworld) - ຕອນຄໍ່າວັນທີ 19/05, ກົງກັບໂອກາດສະເຫຼີມສະຫຼອງ 123 ປີແຫ່ງວັນຄ້າຍວັນເກີດປະທານໂຮ່ຈິມິນ, ຢູ່ຮ່າໂນ້ຍ, ຄະນະພັກທະຫານສູນກາງ, ກະຊວງປ້ອງກັນປະເທດຫວຽດນາມ ໄດ້ສະເໜີຕໍ່ຜູ້ຊົມຊ່ອງໂທລະພາບປ້ອງກັນຊາດຫວຽດນາມ ຢ່າງເປັນທາງການ, ເຊິ່ງຈະຮັບໃຊ້ຜູ້ຊົມໃນທົ່ວປະເທດ. ນີ້ແມ່ນຊ່ອງໂທລະພາບສະເພາະຂອງກຳລັງການທະຫານ, ປ້ອງກັນຊາດ ເພື່ອແນໃສ່ຕອບສະໜອງຄວາມຮຽກຮ້ອງຕ້ອງການກ່ຽວກັບການໂຄສະໜາເຜີຍແຜ່ຢ່າງເລີກເຊິ່ງກວ້າງຂວາງກ່ຽວກັບກອງທັບປະຊາຊົນຫວຽດນາມ, ສ້າງພື້ນຖານປ້ອງກັນຊາດທົ່ວປວງຊົນ ແລະ ປ້ອງກັນປະເທດໃນໄລຍະໃໝ່. ກ່າວຄຳເຫັນທີ່ພິທີ່, ທ່ານ ພົນເອກ ຟຸງກວາງແທງ, ລັດຖະມົນຕີກະຊວງປ້ອງກັນປະເທດ, ຮຽກຮ້ອງໃຫ້ຊ່ອງໂທລະພາບປ້ອງກັນຊາດຫວຽດນາມ ຊ່ວຍໃຫ້ປະຊາຊົນສາມາດເຂົ້າໃຈ ແລະ ເຊື່ອມຕໍ່ຄວາມສາມາດປ້ອງກັນປະເທດຊາດຢ່າງໝັ້ນຄົງ, ປົກປັກຮັກສາລະບອບສັງຄົມນິຍົມຂອງກຳລັງກອງທັບປະຊາຊົນຫວຽດນາມ. ທ່ານ ລັດຖະມົນຕີ ຟຸ່ງກວາງແທງ ເນັ້ນໜັກວ່າ.
“ຊ່ອງໂທລະພາບປ້ອງກັນຊາດຫວຽດນາມ ໄດ້ຮັບຮູ້ຢ່າງເລີກເຊິ່ງກ່ຽວກັບຄວາມເປັນກຽດ ແລະ ໜ້າທີ່ຮັບຜິດຊອບຂອງຕົນ, ຍາມໃດກໍ່ສາມັກຄີກັນ, ເປັນເອກະພາບ, ຄຸນສົມບັດດ້ານການເມືອງຢ່າງໝັ້ນຄົງ, ເພີ່ມທະວີກ່ຽວກັບຈັນຍາບັນວິຊາຊີບຢ່າງບໍ່ຢຸດຢັ້ງ; ຕັ້ງໜ້າຮໍ່າຮຽນ ແລະ ຍົກສູງລະດັບຄວາມຮູ້ດ້ານວິຊາສະເພາະ. ເພີ່ມທະວີການສົມທົບກັບບັນດາຊ່ອງໂທລະພາບ, ອົງການສື່ສານຕ່າງໆໃນທົ່ວປະເທດ, ບັນດາອົງການ, ຫົວໜ່ວຍ, ທ້ອງຖິ່ນທັງຢູ່ພາຍໃນ ແລະ ນອກກອງທັບ; ເປີດກວ້າງການຮ່ວມມືກັບສາກົນເພື່ອສ່ອງແສງຂໍ້ມູນຂ່າວຢ່າງທັນການ, ມີບັນດາເນື້ອໃນແທ້ຈິງ, ເພື່ອຮັບໃຊ້ພະນັກງານ, ນັກຮົບ ແລະ ປະຊາຊົນ”.
ຊ່ອງໂທລະພາບປ້ອງກັນຊາດຫວຽດນາມ ອອກອາການັບແຕ່ເວລາ 5 ໂມງ 30 ນາທີຫາ 24 ໂມງປະຈຳວັນ.