(vovworld) –ຕໍ່ໜ້າສະພາບຫາງສຽງພາຍໃນປະເທດ ແລະ ສາກົນ, ສະມາຊິກສະພາແຫ່ງຊາດຫຼາຍທ່ານໄດ້ສະແດງຄວາມເຄັ່ງຮ້ອນຕໍ່ເລື່ອງຈີນ ຕັ້ງຮ້ານເຈາະນ້ຳມັນໄຮ່ຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ທ່ານປະທານປະເທດຫວຽດນາມ ເຈືອງເຕີນຊາງ ໄດ້ຕອບສຳພາດຕໍ່ນັກຂ່າວສຳນັກຂ່າວສານຫວຽດນາມ ກ່ຽວກັບບັນຫານີ້:
ນັກຂ່າວ: ຂໍຮຽນທ່ານປະທານປະເທດ, ຂໍທ່ານໃຫ້ຮູ້ສະພາບການພົວພັນ ຫວຽດນາມ - ຈີນ ໃນປະຈຸບັນ, ເມື່ອ ຈີນຕັ້ງຮ້ານເຈາະນ້ຳມັນ ໄຮຢາງ - 981 ເຂົ້າເລິກໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ?.
ທ່ານປະທານປະເທດ ເຈືອງເຕີນຊາງ: ວັນທີ 2/5/2014, ຈີນ ໄດ້ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍເລິກໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ. ຈີນ ໄດ້ລະເມີດຂໍ້ຕົກລົງຂັ້ນສູງ 2 ປະເທດກ່ຽວກັບບັນດາຫຼັກການພື້ນຖານເພື່ອແກ້ໄຂບັນຫາໃນທະເລ, ລະເມີດກົດໝາຍສາກົນ, ໃນນັ້ນມີກົດບັດ ສປຊ ກໍ່ຄືສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982 ແລະ ບັນດາຂໍ້ຕົກລົງລະຫວ່າງ ອາຊຽນ ແລະ ຈີນ (DOC).
ຍາມໃດພັກ, ລັດ ແລະ ປະຊາຊົນຫວຽດນາມ ກໍ່ຖືເປັນສຳຄັນ ແລະ ຈະເຮັດຈົນສຸດຄວາມສາມາດຂອງຕົນເພື່ອເພີມທະວີການພົວພັນມິດຕະພາບ ລະຫວ່າງປະຊາຊົນຫວຽດນາມ - ຈີນ, ຮັກສາສັນຕິພາບ, ສະຖຽນລະພາບເພື່ອພັດທະນາປະເທດຊາດ, ພ້ອມທັງຮຽກຮ້ອງໃຫ້ຈີນ ກໍ່ຕ້ອງເຮັດຄືແນວນັ້ນ. ທ່ານປະທານປະເທດ ເຈືອງເຕີນຊາງ ຢືນຢັນວ່າ: ຫວຽດນາມ ມີຫຼັກຖານດ້ານປະຫວັດສາດ ແລະ ກົດໝາຍກ່ຽວກັບອະທິປະໄຕສຳລັບ 2 ໝູ່ເກາະຮ່ວາງຊາ, ເຈື່ອງຊາ ແລະ ເຂດເສດຖະກິດຈຳເພາະ, ໄຫຼ່ທະວີບຂອງຫວຽດນາມ ຢ່າງຄົບຖ້ວນ, ສອດຄ່ອງກັບກົດໝາຍສາກົນ. ພວກເຮົາເດັດດຽວບໍ່ປະໃຫ້ບໍ່ວ່າຜືນແຜ່ນດິນ, ເຂດນ້ຳດິນແດນໃດໆຂອງປະເທດຊາດຖືກລ່ວງລ້ຳ. ສຳລັບຊາວ ຫວຽດນາມ ແຕ່ລະຄົນແລ້ວ, ອະທິປະໄຕຜືນແຜ່ນດິນແມ່ນສັກກະລະບູຊາ ແລະ ບໍ່ອາດລ່ວງລ້ຳໄດ້.
ນັກຂ່າວ: ຂໍທ່ານໃຫ້ຮູ້ ກອງປະຊຸມຄັ້ງທີ 9 ຂອງຄະນະບໍລິຫານງານສູນກາງພັກກອມມູນິດ ຫວຽດນາມຜ່ານມາໄດ້ສະແດງທ່າທີຄືແນວໃດຕໍ່ເຫດການດັ່ງກ່າວ?.
ທ່ານປະທານປະເທດ ເຈືອງເຕີນຊາງ: ກອງປະຊຸມຄັ້ງທີ 9 ຂອງຄະນະບໍລິຫານງານສູນກາງພັກ ກອມມູນິດ ຫວຽດນາມ ຊຸດທີ 11 ໄດ້ສະຫງວນເວລາເໝາະສົມເພື່ອປຶກສາຫາລືບັນຫານີ້. ສຳລັບຫຼັກໝັ້ນສະເໝີຕົ້ນສະເໝີປາຍ, ຄະນະບໍລິຫານງານສູນກາງພັກ ກອມມູນິດ ຫວຽດນາມ ແລະ ກົມການເມືອງຍາມໃດກໍ່ຢັ້ງຢືນວ່າ: ອະທິປະໄຕຜືນແຜ່ນດິນຂອງປະເທດຊາດ, ໃນນັ້ນມີເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ ແມ່ນສັກກະລະບູຊາ, ບໍ່ອາດຜ່ອນສັ້ນຜ່ອນຍາວໄດ້. ປະຊາຊົນ ຫວຽດນາມ, ພັກ ແລະ ລັດເຮົາ ມີຄຸນນະທາດຢ່າງພຽງພໍ, ເຈດຈຳນົງທີ່ອົງອາດກ້າແກ່ນ ແລະ ມີພື້ນຖານປະຫວັດສາດ ແລະ ນິຕິກຳຢ່າງຄົບຖ້ວນເພື່ອຕໍ່ສູ້ປົກປັກຮັກສາອະທິປະໄຕຂອງປະເທດຊາດ. ເຫດການທີ່ເກີດຂຶ້ນໃນໄລຍະຜ່ານມາໄດ້ຊີ້ໃຫ້ເຫັນວ່າ, ບໍ່ມີຫຼາຍປະເທດ ແລະ ອົງການຈັດຕັ້ງສາກົນໃດທີ່ອອກສຽງປົກປ້ອງຈີນ ກ່ຽວກັບເລື່ອງຕັ້ງຮ້ານເຈາະນ້ຳມັນໄຮ່ຢາງ 981 ໃນເຂດນ່ານທະເລຂອງຫວຽດນາມ ກໍ່ຄືການທວງເອົາເສັ້ນລີ້ນງົວ 9 ຕອນ ຢ່າງໄຮ້ເຫດຜົນ. ບັນດາຫຼັກຖານປະຫວັດສາດ ແລະ ກົດໝາຍຊີ້ໃຫ້ເຫັນວ່າຄວາມເປັນທຳຂຶ້ນກັບຫວຽດນາມ.
ນັກຂ່າວ: ທ່ານປະທານປະເທດຕີລາຄາແນວໃດກ່ຽວກັບນ້ຳໃຈຮັກຊາດ ແລະ ວິທີສະແດງນ້ຳໃຈຮັກຊາດຂອງປະຊາຊົນເຮົາຕໍ່ໜ້າເລື່ອງ ຈີນ ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍ ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ?.
ທ່ານປະທານປະເທດ ເຈືອງເຕີນຊາງ: ຍາມໃດປະຊາຊົນຫວຽດນາມ ກໍ່ມີມູນເຊື້ອຮັກຊາດ, ເມື່ອເອກະລາດ, ອະທິປະໄຕຖືກນາບຂູ່ ຍາມໃດປະຊາຊົນພວກເຮົາກໍ່ສາມັກຄີເປັນຈິດໜຶ່ງໃຈດຽວໃນການປົກປັກຮັກສາປະເທດຊາດ. ຂ້າພະເຈົ້າມີຄວາມຕື້ນຕັນໃຈທີ່ສຸດ ແລະ ເຄົາລົບນ້ຳໃຈອັນສູງສົ່ງນັ້ນຂອງປະຊາຊົນພວກເຮົາ.ປະຊາຊົນຜູ້ຕິດພັນກັບທະເລໄດ້ມີນ້ຳໃຈອົງອາດກ້າແກ່ນຢູ່ແນວໜ້າເຖິງວ່າໄດ້ຖືກກຳປັ່ນຂອງຈີນນາບຂູ່, ຕຳຫຼາຍເທື່ອ ຊ້ຳບໍ່ໜຳມີກໍລະນີຖືກຕຳຈົນຈົ່ມນ້ຳ. ເຂົ້າເຈົ້າຍັງຄົງຕິດພັນກັບເຂດຫາປາທີ່ມີມາແຕ່ດົນນານຜ່ານຫຼາຍລຸ້ນຄົນ, ບໍ່ຍອມຈຳນົນ. ບັນດາກຳລັງປົກປ້ອງກົດໝາຍຂອງ ຫວຽດນາມ ບໍ່ທໍ້ຖອຍ, ມີຄວາມອົງອາດກະຫານຜ່ານຜ່າທຸກໆການທ້າທາຍເພື່ອປະຕິບັດໜ້າທີ່ປົກປັກຮັກສາອະທິປະໄຕທີ່ສັກກະລະບູຊາຂອງປະເທດຊາດ, ກ່າວປະນາມການກະທຳຜິດກົດໝາຍຂອງຝ່າຍ ຈີນ.
ນັກຂ່າວ: ປະຊາຊົນເອົາໃຈໃສ່ເຖິງການພົວພັນດ້ານເສດຖະກິດລະຫວ່າງ ຫວຽດນາມ - ຈີນ. ຫາງສຽງຖືວ່າ: ຫວຽດນາມ ອາດຈະຖືກຄອບງຳດ້ວຍເສດຖະກິດຂອງຈີນ. ສະເໜີໃຫ້ທ່ານປະທານປະເທດ ມີຄຳເຫັນກ່ຽວກັບບັນຫານີ້?.
ທ່ານປະທານປະເທດ ເຈືອງເຕີນຊາງ: ນັບແຕ່ເມື່ອປະຕິບັດແນວທາງປ່ຽນໃໝ່ມາຮອດປະຈຸບັນ, ເກືອບ 30 ປີແລ້ວ, ພວກເຮົາປະຕິບັດແຜນນະໂຍບາຍເຊື່ອມໂຍງເຂົ້າກັບເສດຖະກິດຢ່າງເລິກເຊິ່ງ, ກ້ວາງຂວາງກັບໂລກ, ພ້ອມທັງສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ. ຕາມນັ້ນແລ້ວ, ປະເທດເຮົາມີການພົວພັນຮ່ວມມືດ້ານການຄ້າ ແລະ ການລົງທຶນກັບກ່ວາ 200 ປະເທດ ແລະ ເຂດແຄ້ວນ. ພວກເຮົາປະຕິບັດວິທີການ ຫວຽດນາມ ແມ່ນເພື່ອນມິດ, ແມ່ນຄູ່ຮ່ວມມືມີຄວາມໄວ້ເນື້ອເຊື່ອໃຈ ແລະ ມີຄວາມຮັບຜິດຊອບກັບປະຊາຄົມໂລກ, ດຳລົງຊີວິດຢ່າງສັນຕິພາບກັບທຸກໆປະຊາຊາດໃນໂລກບົນພື້ນຖານເຄົາລົບເຊິ່ງກັນ ແລະ ກັນ, ສະເໝີພາບ. ສຳລັບ ຈີນແລ້ວ, ການພົວພັນດ້ານເສດຖະກິດ, ການຄ້າໃນຊຸມປີຜ່ານມາໄດ້ພັດທະນາໄວພໍສົມຄວນ, ແຕ່ສະພາບ ຫວຽດນາມ ນຳເຂົ້າເກີນດຸນນັບມື້ນັບຫຼາຍ. ຜະລິດຕະພັນສົ່ງອອກບາງປະເພດຂອງ ຫວຽດນາມ ສຸມໃສ່ເຂົ້າຕະຫຼາດ ຈີນ ຫຼາຍ. ຂົງເຂດການປະມູນ ແລະ ບັນດານັກລົງທຶນ ຈີນ ພວມກວມອັດຕາຫຼາຍໃນການສະໜອງອຸປະກອນຂອງບາງຂະແໜງສຳຄັນ... ສະພາບການດັ່ງກ່າວຈະໄດ້ປັບປຸງໃນໄວໆນີ້.
ນັກຂ່າວ: ຂໍຮຽນທ່ານປະທານປະເທດ, ປະຊາຊົນເຮົາເອົາໃຈໃສ່ຕໍ່ ເລື່ອງພັກ ແລະ ລັດ ໄດ້ ແລະ ພວມມີບັນດາແຜນນະໂຍບາຍ, ມາດຕະການໃດຕໍ່ໜ້າເລື່ອງຮ້ານເຈາະນ້ຳມັນໄຮຢາງ 981 ຂອງຈີນ ຍັງເຄື່ອນໄຫວຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ?.
ທ່ານປະທານປະເທດ ເຈືອງເຕີນຊາງ: ເມື່ອຈີນ ຕັ້ງຮ້ານເຈາະນ້ຳມັນໄຮ່ຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ຄະນະບໍລິຫານງານສູນກາງພັກກອມມູນິດ ຫວຽດນາມ, ກົມການເມືອງ ໄດ້ວາງອອກແຜນນະໂຍບາຍເພື່ອແກ້ໄຂສະພາບການ. ດ້ານໜຶ່ງ, ເດັດດ່ຽວຮຽກຮ້ອງ ຈີນ ຖອນຮ້ານເຈາະນ້ຳມັນອອກຈາກເຂດນ່ານທະເລ ຫວຽດນາມ, ດ້ານໜຶ່ງຢືດໝັ້ນຮັກສາສະພາບແວດລ້ອມສັນຕິພາບເພື່ອສ້າງສາປະເທດຊາດ, ຮັກສາການພົວພັນກັບປະເທດບ້ານໃກ້ເຮືອນຄຽງມິດຕະພາບ ແລະ ປະຊາຊົນ ຈີນ ບົນພື້ນຖານສະເໝີພາບ, ເຄົາລົບກັນ ແລະ ຕ່າງຝ່າຍຕ່າງມີຜົນປະໂຫຍດ. ຍາມໃດຫວຽດນາມ ກໍ່ນຳໃຊ້ບັນດາມາດຕະການສັນຕິພາບ, ພ້ອມທັງຮຽກຮ້ອງຈີນ ສະແດງເຈດນຳນົງເພື່ອແກ້ໄຂບັນຫາໂດຍສັນຕິວິທີອີງໃສ່ກົດໝາຍ ສາກົນ ແລະ ບັນດາຂໍ້ຕົກລົງລະຫວ່າງຈີນ - ອາຊຽນ, ຈີນ - ຫວຽດນາມ. ມາດຕະການດ້ານກົດໝາຍກໍ່ໄດ້ນຳໃຊ້ເມື່ອຈຳເປັນເພື່ອປົກປັກຮັກສາ ອະທິປະໄຕ, ຜືນແຜ່ນດິນຂອງປະເທດຊາດ.
ນັກຂ່າວ: ຂໍຂອບໃຈທ່ານປະທານປະເທດ./.