ຕາມນັ້ນແລ້ວ, ບັນດາລັດຖະມົນຕີກະຊວງການຕ່າງປະເທດ ອາຊຽນ ຈະເຂົ້າຮ່ວມ ແລະ ປຶກສາຫາລື ຢູ່: ກອງປະຊຸມລັດຖະມົນຕີກະຊວງການຕ່າງປະເທດ ອາຊຽນ - ອາເມລິກາ, ກອງປະຊຸມລັດຖະມົນຕີກະຊວງການຕ່າງປະເທດ ອາຊຽນ - ການາດາ, ກອງປະຊຸມລັດຖະມົນຕີກະຊວງການຕ່າງປະເທດ ອາຊຽນ - ອົດສະຕາລີ, ກອງປະຊຸມລັດຖະມົນຕີກະຊວງການຕ່າງປະເທດ ອາຊຽນ - ນິວຊີແລນ, ການໂອ້ລົມສົນທະນາ ລະຫວ່າງ ລັດຖະມົນຕີກະຊວງການຕ່າງປະເທດອາຊຽນກັບບັນດາຜູ້ຕາງໜ້າຄະນະກຳມະການ ລະຫວ່າງ ລັດຖະບານ ບັນດາປະເທດອາຊຽນກ່ຽວກັບສິດທິມະນຸດ (AICHR), ການໂອ້ລົມສົນທະນາ ຂັ້ນລັດຖະມົນຕີອາຊຽນ ກ່ຽວກັບການເພີ່ມທະວີບົດບາດຂອງແມ່ຍິງຕໍ່ສັນຕິພາບ ແລະ ຄວາມໝັ້ນຄົງແບບຍືນຍົງ.

ການໂອ້ລົມສົນທະນາຂັ້ນລັດຖະມົນຕີ ອາຊຽນກ່ຽວກັບການເພີ່ມທະວີບົດບາດຂອງແມ່ຍິງຕໍ່ສັນຕິພາບ ແລະ ຄວາມໝັ້ນຄົງແບບຍືນຍົງໄດ້ສືບທອດຜົນສຳເລັດຂອງກອງປະຊຸມສຸດຍອດອາຊຽນພິເສດຄັ້ງທີ 36 ກ່ຽວກັບແມ່ຍິງ. ນີ້ແມ່ນຄວາມມານະພະຍາຍາມຂອງຫວຽດນາມ ໃນບົດບາດເປັນປະທານອາຊຽນ ແນໃສ່ຊຸກຍູ້ການຮ່ວມມືເພື່ອຍົກສູງບົດບາດຂອງແມ່ຍິງ, ສັນຕິພາບ ແລະ ຄວາມໝັ້ນຄົງ ໃນອາຊຽນກັບບັນດາຄູ່່ຮ່ວມມື, ຜັນຂະຫຍາຍມະຕິຕົກລົງເລກທີ 1325 ວ່າດ້ວຍແມ່ຍິງ, ສັນຕິພາບ ແລະ ຄວາມໝັ້ນຄົງ ຂອງ ສະພາຄວາມໝັ້ນຄົງ ສປຊ ຢ່າງແທດຈິງ ເນື່ອງໃນໂອກາດສະເຫຼີມຫຼອງ 20 ປີແຫ່ງວັນຮັບຮອງເອົາມະຕິຕົກລົງນີ້.