(vovworld) - ກອງປະຊຸມຂັ້ນລັດຖະມົນຕີອາຊຽນ ກ່ຽວກັບບັນຫາຢາເສບຕິດ ຖືກດຳເນີນ ໃນວັນທີ 03 ກັນຍາ, ຢູ່ນະຄອນຫຼວງ Bandar Seri Begawan, ປະເທດ ບຣຸໄນ, ເພື່ອແນໃສ່ແກ້ໄຂບັນດາບັນຫາຢາເສບຕິດ, ມຸ່ງໄປເຖິງປະຊາຄົມພາກພື້ນ ບໍ່ມີຢາເສບຕິດໃນປີ 2015. ທີ່ກອງປະຊຸມ, ບັນດາລັດຖະມົນຕີໄດ້ປຶກສາຫາລືກ່ຽວກັບບັນຫາທີ່ກ່ຽວຂ້ອງເຖິງຢາເສບຕິດ, ຊຸກຍູ້ການຮ່ວມມື ແລະ ສົມທົບກັນຢ່າງແໜ້ນແຟ້ນລະຫວ່າງບັນດາປະເທດສະມາຊິກອາຊຽນ ໃນການບັນລຸວິໄສທັດລວມເພື່ອອາຊຽນ ມີຄວາມສະຖຽນລະພາບ, ວັດທະນາຖາວອນ ແລະ ບໍ່ມີຢາເສບຕິດໃນປີ 2015. ກອງປະຊຸມແມ່ນພື້ນຖານເພື່ອກະກຽມໃຫ້ແກ່ການຕີລາຄາສຸດທ້າຍແນໃສ່ປະຕິບັດອາຊຽນບໍ່ມີຢາເສບຕິດ, ນັບແຕ່ປີ 2014.
ກ່ອນໜ້ານັ້ນ, ວັນທີ 02 ກັນຍາ, ທີ່ກອງປະຊຸມກຽມບັນດາເຈົ້າໜ້າທີ່ຂັ້ນສູງກະກຽມໃຫ້ແກ່ກອງປະຊຸມລັດຖະມົນຕີອາຊຽນ ກ່ຽວກັບບັດດາບັນຫາຢາເສບຕິດ (Prep – SOM), ບັນດາຜູ້ແທນໄດ້ປຶກສາຫາລືຢ່າງຮອບດ້ານກ່ຽວກັບສະພາບຢາເສບຕິດໃນພາກພື້ນອາຊີຕາເວັນອອກສ່ຽງໃຕ້, ບັນດາຜົນງານ ແລະ ສິ່ງທ້າທາຍເພື່ອເຮັດໃຫ້ໄດ້ອາຊຽນ ທີ່ບໍ່ມີຢາເສບຕິດໃນປີ 2015. ກອງປະຊຸມກໍ່ໄດ້ແລກປ່ຽນຄຳເຫັນກ່ຽວກັບການປະຕິບັດແຜນການເຄື່ອນໄຫວອາຊຽນ ຕ້ານການຜະລິດ, ຄ້າຂາຍ ແລະ ນຳໃຊ້ຢາເສບຕິດຢ່າງຜິດກົດໝາຍໄລຍະ 2009 – 2015 ແລະ ເຫັນດີນຳກັນວ່າ ເລື່ອງເຮັດໃຫ້ອາຊຽນ ບໍ່ມີຢາເສບຕິດໃນປີ 2015 ແມ່ນໜ້າທີ່ຮັບຜິດຊອບລວມຂອງຝ່າຍຕ່າງໆທີ່ກ່ຽວຂ້ອງ.