(ພາບປະກອບ)
( vovworld ) – ທ່ານລັດຖະມົນຕີເສດຖະກິດ 10 ປະເທດສະຫະສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ແລະ 6 ປະເທດຄູ່ຮ່ວມມືໃນພາກພື້ນຄື: ຈີນ, ຍີ່ປຸ່ນ, ສເກົາຫຼີ, ອິດເດຍ, ອົດສະຕາລີ ແລະ ນີວຊີແລນ ໄດ້ຈັດການປະຊຸມຢູ່ຊຽມຣຽບ ປະເທດກຳປູເຈຍ ເມື່ອວັນທີ 30/8. ຖະແຫຼງການຮ່ວມຫຼັງການພົບປະໄດ້ຊີ້ແຈ້ງວ່າ: ບັນດາທ່ານລັດຖະມົນຕີລ້ວນແຕ່ເຫັນດີເປັນເອກະພາບສະເໜີການນຳບັນດາຫຼັກການແນະນຳ ແລະ ຈຸດໝາຍເຈລະຈາຄູ່ຮ່ວມມືເສດຖະກິດຮອບດ້ານໃນພາກພື້ນ (RCEP) ເຖິງບັນດາການນຳ ເພື່ອພິຈາລະນາ ແລະ ຮັບຮອງເອົາໃນເດືອນ 11/2012. ຄາດວ່າ, RCEP ອາດຈະຫັນປ່ຽນພາກພື້ນນີ້ກາຍເປັນຕະຫຼາດລວມຊື່ງລວມມີພົນລະເມືອງກ່ວາ 3 ຕື້ຄົນ ດ້ວຍຍອດຜະລິດຕະພັນພາຍໃນຂຶ້ນເຖິງ 17.200 ຕື້ໂດລາສະຫະລັດ. ຖະແຫຼງການກໍ່ໃຫ້ຮູ້ວ່າ, ການພົບປະດັ່ງກ່າວແມ່ນບາດກ້າວເດີນສຳຄັນທຳອິດ ເພື່ອມຸ້ງໄປເຖິງການສ້າງຂໍ້ຕົກລົງການຄ້າເສລີພາກພື້ນ ແລະ RCEP ຈະຊ່ວຍປັບປຸງອົງປະກອບເສດຖະກິດພາກພື້ນ. ບັນດາທ່ານລັດຖະມົນຕີໄດ້ໃຫ້ຄຳໝັນສັນຍາຈະຫັນ RCEP ເປັນຂໍ້ຕົກລົງແບບຢ່າງ, ຊ່ວຍຊຸກຍູ້ການເຕີບໂຕ, ການພັດທະນາ ແລະ ການເຊື່ອມໂຍງລະຫວ່າງບັນດາປະເທດເຂົ້າຮ່ວມ.