(vovworld) - ວັນທີ 6/8, ຢູ່ສຳນັກງານສະຫະປະຊາຊາດ ຢູ່ນະຄອນ ນິວຢອກ, ແຫ່ງປະເທດ ອາເມລິກາ, ໄດ້ດຳເນີນວາລະປຶກສາຫາລື ເປີດຂັ້ນສູງຂອງສະພາຄວາມໝັ້ນຄົງສະຫະປະຊາຊາດ ດ້ວຍຫົວຂໍ້ວ່າ: ການຮ່ວມມືລະຫວ່າງສະຫະປະຊາຊາດ ແລະ ບັນດາອົງການພາກພື້ນ ແລະ ອະນຸພາກພື້ນເພື່ອແນໃສ່ຮັກສາສັນຕິພາບ ແລະ ຄວາມໝັ້ນຄົງສາກົນ. ທ່ານເອກອັກຄະລັດຖະທູດ ເລຮ່ວາຍຈູງ, ຫົວໜ້າຄະນະຜູ້ຕາງໜ້າ ຫວຽດນາມ ປະຈຳສະຫະປະຊາຊາດ, ມີບົດກ່າວປາໄສທີ່ກອງປະຊຸມ. ຕາມທ່ານເອກອັກຄະລັດຖະທູດ ເລຮ່ວາຍຈູງ ແລ້ວ, ບັນດາປະເທດອາຊຽນ ຍາມໃດກໍ່ຖືເປັນສຳຄັນການຮ່ວມມືກັບສະຫະປະຊາຊາດໃນຫຼາຍຂົງເຂດ ແລະ ໄລຍະຜ່ານມາການພົວພັນນີ້ໄດ້ມີບາດກ້າວພັດທະນາໃໝ່ສຳຄັນທີ່ສຸດ. ທ່ານເອກອັກຄະລັດຖະທູດ ໃຫ້ຮູ້ວ່າ ອາຊຽນ ແລະ ສະຫະປະຊາຊາດ ໄດ້ສ້າງຂອບເຂດໃຫ້ແກ່ການພົວພັນລະຫວ່າງ 2 ຝ່າຍ, ຫັນຖະແຫຼງການຮ່ວມປີ 2011 ເປັນລະອຽດ... ບົນພື້ນຖານນັ້ນ, 2 ຝ່າຍໄດ້ຈັດຕັ້ງກອງປະຊຸມສຸດຍອດ ອາຊຽນ - ສະຫະປະຊາຊາດຄັ້ງຕ່າງໆ ກໍ່ຄືບັນດາກອງປະຊຸມຂັ້ນລັດຖະມົນຕີ. ທ່ານເອກອັກຄະລັດຖະທູດ ເລຮ່ວາຍຈູງ ຢືນຢັນວິວັດການຮ່ວມມືລະຫວ່າງ ອາຊຽນ ກັບ ສະຫະປະຊາຊາດ ໃນໄລຍະຜ່ານມາໄດ້ຊ່ວຍເພີ່ມທະວີກຳລັງຄວາມສາມາດຂອງແຕ່ລະຝ່າຍ ແລະ ຊຸກຍູ້ການຮ່ວມມືລວມຢ່າງບໍ່ຢຸດຢັ້ງ. ຕາມທ່ານເອກອັກຄະລັດຖະທູດ ແລ້ວ, ບັນດາຜົນສຳເລັດຂອງ ອາຊຽນ ຢູ່ພາກພື້ນໄດ້ສະແດງໃຫ້ເຫັນວ່າ: ເພື່ອເພີ່ມທະວີສັນຕິພາບ ແລະ ຄວາມໝັ້ນຄົງ, ຕ້ອງສຸມໃສ່ເປັນພິເສດເຖິງບັນດາບັນຫາພື້ນຖານຄືຊຸກຍູ້ການສົນທະນາ, ເຄົາລົບນັບຖືເຊິ່ງກັນ ແລະ ກັນ, ເຄົາລົບກົດໝາຍສາກົນ, ໃນນັ້ນມີຫຼັກການແກ້ໄຂທຸກໆການພິພາດໂດຍສັນຕິວິທີ.