ອາຊຽນແລະລັດເຊຍເຫັນດີເປັນເອກະພາບສືບຕໍ່ເຮັດໃຫ້ການພົວພັນຄູ່ຮ່ວມມືຍຸດທະສາດເລິກເຊິ່ງກ່ວາອີກ
(VOVWORLD) -ວັນທີ 13 ມີນາ, ຢູ່ສຳນັກງານຄະນະເລຂາອາຊຽນຢູ່ນະຄອນຫຼວງຈາກາຕາປະເທດອິນໂດເນເຊຍ, ຄະນະກຳມະການຮ່ວມມືລວມອາຊຽນ - ລັດເຊຍ (ARJCC) ໄດ້ຈັດຕັ້ງກອງປະຊຸມປະຈຳປີຂັ້ນເອກອັກຄະລັດຖະທູດຄັ້ງທີ 18 ເພື່ອແນໃສ່ສຳຫຼວດກວດຄືນແລະແລກປ່ຽນບັນດາມາດຕະການຊຸກຍູ້ການຜັນຂະຫຍາຍບັນດາໂຄງການແລະການເຄື່ອນໄຫວຮ່ວມມືສອງຝ່າຍ
 ສະມາຊິກຄະນະກຳມະການຮ່ວມມືລວມ ອາຊຽນ - ລັດເຊຍ ແລະ ຜູ້ຕາງໜ້າຄະນະເລຂາ ອາຊຽນ ເຂົ້າຮ່ວມກອງປະຊຸມ (ພາບ: TTXVN) |
ທີ່ກອງປະຊຸມ, ສອງຝ່າຍໄດ້ຕີລາຄາສູງຕໍ່ບັນດາໝາກຜົນການຮ່ວມມືຢ່າງຕັ້ງໜ້າເຊິ່ງບັນລຸໄດ້ໃນບັນດາຂົງເຂດການເມືອງ - ຄວາມໝັ້ນຄົງ, ເສດຖະກິດແລະວັດທະນະທຳ - ສັງຄົມ. ໃນຊຸມປີມໍ່ໆມານີ້,ການຄ້າສອງສົ້ນລະຫວ່າງອາຊຽນແລະລັດເຊຍໄດ້ເພີ່ມຂຶ້ນຢ່າງວ່ອງໄວ. ໂດຍສະເພາະປີ 2018, ບັນລຸໄດ້ 19,8 ຕື້ USD, ເພີ່ມຂຶ້ນເກືອບ 8% ເມື່ອທຽບໃສ່ປີ 2017.
ລັດເຊຍຢັ້ງຢືນວ່າອາຊຽນແມ່ນໜຶ່ງໃນບັນດາບຸລິມະສິດແຖວໜ້າໃນນະໂຍບາຍການຕ່າງປະເທດຂອງລັດເຊຍ, ລັດເຊຍກໍ່ໃຫ້ຄຳໝັ້ນສັນຍາວ່າຈະສະໜັບສະໜູນບົດບາດເປັນໃຈກາງຂອງອາຊຽນໃນການປະກອບສ່ວນຮັກສາສັນຕິພາບແລະສະຖຽນລະພາບໃນພາກພື້ນ, ຕັ້ງໜ້າເຂົ້າຮ່ວມບັນດາກົນໄກພາກພື້ນໂດຍອາຊຽນນຳພາ.
ໃນໄລຍະຈະມາເຖິງ, ບັນດາປະເທດອາຊຽນແລະລັດເຊຍເປັນເອກະພາບສືບຕໍ່ເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງອາຊຽນ - ລັດເຊຍເລິກເຊິ່ງກ່ວາອີກ, ເອົາໃຈໃສ່ເປັນພິເສດເຖິງບັນດາຂົງເຂດທີ່ຕ່າງຝ່າຍຕ່າງມີຄວາມສົນໃຈ. ອາຊຽນແລະລັດເຊຍເຫັນດີເປັນເອກະພາບນຳກັນວ່າຈະຊຸກຍູ້ການລົງນາມບົດບັນທຶກຊ່ວຍຈຳກ່ຽວກັບການຮ່ວມມືໃນຂົງເຂດຄຸ້ມຄອງໄພທຳມະຊາດໃນປີ 2020.