ອາທິດເຮັດວຽກທີ 3 ຂອງສະພາແຫ່ງຊາດ
(ພາບ:vov)
(vovworld) – ກ້າວເຂົ້າສູ່ອາທິດເຮັດວຽກທີ 3 ຂອງກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ຕອນເຊົ້າວັນທີ 3/11, ສະພາແຫ່ງຊາດຈັດວາລະປະຊຸມຄົບຄະນະທີ່ຫໍປະຊຸມ. ເລີ່ມຕົ້ນວາລະປະຊຸມ, ສະພາແຫ່ງຊາດຮັບຟັງທ່ານດິງຕຽນຢຸງ, ລັດຖະມົນຕີວ່າການກະຊວງການເງິນ ອ່ານໃບຍື່ນສະເໜີກ່ຽວກັບຮ່າງກົດໝາຍສະບັບປັບປຸງ ແລະ ເພີ່ມເຕີມບາງຂໍ້ມາດຕາຂອງບັນດາກົດໝາຍ ກຳນົດກ່ຽວກັບພາສີອາກອນ; ຮັບຟັງທ່ານຟຸ່ງກວກຫຽນ ຫົວໜ້າກຳມາທິການການເງິນ, ງົບປະມານຂອງສະພາແຫ່ງຊາດ ສະເໜີບົດລາຍງານກວດກາຮ່າງກົດໝາຍສະບັບນີ້. ຕາມນັ້ນແລ້ວ, ການປັບປຸງ, ເພີ່ມເຕີມບາງຂໍ້ມາດຕາຂອງບັນດາກົດໝາຍ ກຳນົດກ່ຽວກັບພາສີອາກອນປະກາດໃຊ້ໃນປະຈຸບັນແມ່ນຈຳເປັນ, ເພື່ອແນໃສ່ສ້າງເງື່ອນໄຂອຳນວຍຄວາມສະດວກໃຫ້ແກ່ວິສາຫະກິດຫວຽດນາມ ໃນການເຊື່ອມໂຍງເຂົ້າກັບເສດຖະກິດໂລກ ແລະ ການປະຕິຮູບດ້ານບໍລິຫານໃນຂົງເຂດຄຸ້ມຄອງພາສີ, ອາກອນ.
ກ່ອນໜ້ານັ້ນ ສະພາແຫ່ງຊາດປຶກສາຫາລືກ່ຽວກັບຮ່າງກົດໝາຍປັບປຸງ, ເພີ່ມເຕີ່ມບາງມາດຕາຂອງກົດໝາຍວ່າດ້ວຍການປະຕິບັດຄຳຕັດສິນຂອງສານ ແພ່ງ. ຄຳເຫັນຂອງສະມາຊິກສະພາແຫ່ງຊາດ (ສສຊ) ສ່ວນຫຼາຍຕີລາຄາວ່າ, ພາຍຫຼັງຮັບຄຳເຫັນປະກອບທີ່ກອງປະຊຸມສະໄໝສາມັນເທື່ອທີ 7, ຮ່າງກົດໝາຍໄດ້ຮັບການປັບປຸງບາດກ້າວໜຶ່ງ, ສາມາດແກ້ໄຂຄວາມຕິດຄັດໃນກົດໝາຍທີ່ພວມປະກາດໃຊ້ຕາມທິດປະຕິຮູບ ດ້ານກົດໝາຍໂດຍພື້ນຖານ. ສສຊ ບາງທ່ານສະເໜີວ່າ, ເພື່ອຮັບປະກັນຜົນສັກສິດ, ລັກສະນະເຄັ່ງຄັດຂອງກົດໝາຍ, ເມື່ອຄຳຕັດສິນລົງໂທດ, ຂໍ້ຕົກລົງຂອງສານມີຜົນບັງຄັບໃຊ້. ບັນດາອົງການຈັດຕັ້ງ, ສ່ວນບຸກຄົນທີ່ກ່ຽວຂ້ອງຕ້ອງປະຕິບັດຢ່າງເຂັ້ມງວດ. ໃນກໍລະນີຜູ້ຕ້ອງປະຕິບັດຄຳຕັດສິນຂອງສານບໍ່ຍອມປະຕິບັດ, ອົງການລັດທີ່ມີສິດອຳນາດຕ້ອງເປັນເຈົ້າການນຳໃຊ້ສິດອຳນາດຂອງລັດ ເພື່ອຈັດຕັ້ງການປະຕິບັດຄຳຕັດສິນຂອງສານ. ເຮັດໄດ້ຄືແນວນັ້ນຈຶ່ງຮັບປະກັນຜົນສັກສິດ ແລະ ລັກສະນະເຄັ່ງຄັດຂອງຄຳສັ່ງຕັດສິນຂອງສານ.
ຕອນບ່າຍວັນທີ 3/11, ສະພາແຫ່ງຊາດຈັດການປະຊຸມຄົບຄະນະຢູ່ຫໍປະຊຸມ, ຮັບຟັງໃບສະເໜີ, ບົດລາຍງານກວດກາບັນດາຮ່າງກົດໝາຍວ່າດ້ວຍການຈັດຕັ້ງລັດຖະບານ (ສະບັບປັບປຸງ); ກົດໝາຍວ່າດ້ວຍການຈັດຕັ້ງອຳນາດການປົກຄອງທ້ອງຖີ່ນ; ຮ່າງກົດໝາຍວ່າດ້ວຍພັນທະການທະຫານ (ສະບັບປັບປຸງ); ຮ່າງກົດໝາຍວ່າດ້ວຍສັດຕະວະແພດ.