(vovworld)- ວັນທີ 22/6, ອາຣັບບີ ຊາອຸດີ ໄດ້ຮັບຮູ້ມີ 6 ກໍລະນີຕືີ່ມອີກຖືກເສຍຊີວິດ ຍ້ອນຕິດເຊື້ອພະຍາດ MERS ພ້ອມກັບ 7 ກໍລະນີໃຫມ່ຖືກຕິດພະຍາດນີ້ ແຕ່ວັນທີ 14-20/6 ຜ່ານມາ. ກະຊວງສາທາລະນະສຸກ ອາຣັບບີ ຊາອຸດີ ໃຫ້ຮູ້ວ່າ: ບັນດາກໍລະນີດັ່ງກ່າວລ້ວນແຕ່ແມ່ນພົນລະເມືອງປະເທດນີ້ ແລະ ສ່ວນຫລາຍແມ່ນ ສຸມໃສ່ຢູ່ ທາງທິດຕາເວັນອອກ ນະຄອນ Hofoof ແລະ ນະຄອນຫລວງ Riyadh. ຕາມການສະຖິຕິຈາກກະຊວງສາທາລະນະສຸກ ອາຣັບບີ ຊາອຸດີ ແລ້ວ, ໄລ່ມາຮອດວັນທີ 20/6 ທີ່ປະເທດນີ້ ມີຜູ້ຕິດເຊື້ອພະຍາດ MERS ທັງໝົດ 1.038 ຄົນ, ໃນນັ້ນ 459 ຄົນ ຖືກເສຍຊີວິດ ແລະ 572 ຄົນໄດ້ຮັບການປິ່ນປົວຫາຍດີແລ້ວ.
ຕໍ່ຫນ້າສະພາບການດັ່ງກ່າວ, ອາຊຽນ ມີຄວາມວິຕົກກັງວົນຕໍ່ການແຜ່ລະບາດນັບມື້ນັບກວ້າງຂວາງຂອງເຊື້ອພະຍາດ MERS ແລະ ຫວັງວ່າ ຈະມີຂໍ້ລິເລີ່ມຫລາຍຢ່າງ ແລະ ມາດຕະການເພື່ອຮັບມືກັບ ໄວຣັດ ທີ່ອັນຕະລາຍນີ້. ປະຈຸບັນ ບັນດາປະເທດສະມາຊິກ ອາຊຽນ ທັງໝົດ ໄດ້ເພີ່ມທະວີການກະກຽມ, ປ້ອງກັນ, ພົບເຫັນ, ແບ່ງປັນ ແລະ ແຈ້ງຂໍ້ມູນຂ່າວກ່ຽວກັບບັນດາກົນໄກທີ່ໄດ້ຮັບການທົດລອງໃນໄລຍະເກີດ ໂລກ SARS ຫລືເມື່ອມີການນາບຂູ່ຈາກ ພະຍາດ Ebola. ນອກນັ້ນ ອາຊຽນ ກໍຍົກສູງສະຕິລະວັງຕົວ ແລະ ເພີ່ມທະວີການຕິດຕາມກວດກາການໄປມາໃນພາກພື້ນ.