ທ່ານນາງ Hilary Clinton ລັດຖະມົນຕີການຕ່າງປະເທດ ອາເມລິກາ |
(vovworld) - ທ່ານນາງ Hilary Clinton ລັດຖະມົນຕີການຕ່າງປະເທດ ອາເມລິກາ ໃຫ້ຮູ້ວ່າ: ອາເມລິກາ ພວມຜັນຂະຫຍາຍບັນດາມາດຕະການແຂງກະດ້າງກວ່າເພື່ອປ້ອງກັນບັນດາສຳນັກງານສະຖານທູດໃນທົ່ວໂລກ ພ້ອມທັງປະຕິເສດຂ່າວຄາວທີ່ວ່າ ອາເມລິກາໄດ້ຮັບຄຳເຕືອນໄພໃນເຫດການບຸກໂຈມຕີໃສ່ສະຖານກົງສູນອາເມລິກາ ຢູ່ ລີບີ. ກ່າວຄຳເຫັນກັບວົງການນັກຂ່າວພາຍຫລັງການເຈລະຈາກັບທ່ານ Patricia Espinosa ລັດຖະມົນຕີການຕ່າງປະເທດ ເມຊີໂກ, ທ່ານນາງ ລັດຖະມົນຕີການຕ່າງປະເທດ ອາເມລິກາ Hilary Clinton ໃຫ້ຮູ້ວ່າ: ອາເມລິກາບໍ່ໄດ້ຮັບຂ່າວຄາວທາງລາຊະການລັບໃດໆກ່ຽວກັບເຫດການບຸກໂຈມຕີໃສ່ຄະນະຜູ້ຕາງຫນ້າການທູດຢູ່ Benghazi ກ່ອນທີ່ຈະເກີດຂຶ້ນ. ທ່ານນາງ Hilary Clinton ເນັ້ນຫນັກວ່າ: ອາເມລິກາ ຈະນຳໃຊ້ບັນດາມາດຕະການແຂງກະດ້າງກວ່າເພື່ອປ້ອງກັນພາລະກອນຢູ່ບັນດາສະຖານທູດ ແລະ ສະຖານກົງສູນໃນທົ່ວໂລກ ພ້ອມທັງຈະພິຈາລະນາຄືນສະພາບຄວາມປອດໄພຢູ່ບັນດາຄະນະຜູ້ຕາງຫນ້າການທູດ ແລະ ຈະເພີ່ມທະວີການປ້ອງກັນຄວາມສະຫງົບໃຫ້ແກ່ສະຖານທີ່ີທີ່ຈຳເປັນ. ອາເມລິກາຈະດຳເນີນການສືບສວນຈົນເຖິງເວລາທີ່ເມື່ອພົບເຫັນ ແລະ ລົງໂທດບັນດາຜູ້ຈັດວາງເຫດບຸກໂຈມຕີດັ່ງກ່າວຢູ່ Benghazi. ຕາມທ່ານນາງ Hilary Clinton ແລ້ວ, ກົມສືບສວນຂອງສະຫະລັດ ອາເມລິກາ FBI ໄດ້ດຳເນີນການສືບສວນພາຍໃນເຂດດິນແດນ ລີບີ ແລະ ພວມສົມທົບກັບລັດຖະບານ ລີບີ ເພື່ອຊອກຈັບຜູ້ທີ່ໄດ້ເຂັ່ນຂ້າພາລະກອນການທູດອາເມລິກາ 4 ທ່ານ.