(vovworld) – ວັນທີ 4/8, ຢູ່ຮ່າໂນ້ຍ, ທ່ານຮອງລັດຖະມົນຕີກະຊວງປ້ອງກັນປະເທດ, ພົນໂທ ເຈືອງກວາງແຄ໋ງ ໄດ້ໃຫ້ການຕ້ອນຮັບສະມາຊິກສະພາສູງ ອາເມລິກາ Bod Corker, ສະມາຊິກຂັ້ນສູງກຳມາທິການການຕ່າງປະເທດສະພາສູງ ອາເມລິກາ, ເນື່ອງໃນໂອກາດຄະນະມາຢ້ຽມຢາມ ແລະ ເຮັດວຽກຢູ່ ຫວຽດນາມ. ພົນໂທ ເຈືອງກວາງແຄ໋ງ ຢືນຢັນວ່າ: ໃນສະພາບແວດລ້ອມສັນຕິພາບ, ລັດ, ກອງທັບປະຊາຊົນ ຫວຽດນາມ ຍາມໃດກໍ່ໄດ້ເອົາໃຈໃສ່ເຖິງການພັດທະນາສາຍພົວພັນຮ່ວມມືປ້ອງກັນຊາດກັບປະເທດຕ່າງໆ, ໃນນັ້ນມີອາເມລິກາ. ກ່ຽວຂ້ອງເຖິງບັນຫາທະເລຕາເວັນອອກ, ທ່ານຮອງລັດຖະມົນຕີກະຊວງປ້ອງກັນປະເທດ ຫວຽດນາມ ໃຫ້ຮູ້ວ່າ: ແຜນນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ແມ່ນແກ້ໄຂບັນດາການຂັດແຍ້ງກັນດ້ວຍມາດຕະການສັນຕິພາບ, ເຄົາລົບກົດໝາຍສາກົນ. ສ່ວນທ່ານສະມາຊິກສະພາສູງ Bod Corker ໃຫ້ຮູ້ວ່າ: ອາເມລິກາ ພວມຄົ້ນຄ້ວາ, ມຸ່ງໄປເຖິງການລົບລ້າງຄຳສັ່ງຫ້າມຂາຍອາວຸດກັບ ຫວຽດນາມ. ຕາມທ່ານ Bod Corker ແລ້ວ, ເລື່ອງຊຸກຍູ້ການພົວພັນລະຫວ່າງ ຫວຽດນາມ - ອາເມລິກາ ໃນຫຼາຍຂົງເຂດຢ່າງແຮງຈະປະກອບສ່ວນຊຸກຍູ້ສະຖຽນລະພາບ, ສັນຕິພາບໃນພາກພື້ນ ແລະ ໃນໂລກ.
ທີ່ການຕ້ອນຮັບ, 2 ຝ່າຍກໍ່ໄດ້ແລກປ່ຽນ, ມຸ່ງໄປເຖິງເນື້ອໃນຮ່ວມມືຈຳນວນໜຶ່ງພາຍຫຼັງ ອາເມລິກາ ລົບລ້າງຄຳສັ່ງຫ້າມຂາຍອາວຸດກັບ ຫວຽດນາມ ແລະ ເພີ່ມທະວີການຮ່ວມມືໃນຫຼາຍຂົງເຂດ, ປະກອບສ່ວນປັບປຸງສັນຕິພາບໃນພາກພື້ນ ອາຊີ ປາຊີຟິກ.