ທ່ານປະທານາທິບໍດີ ອາເມລິກາ Barack Obama
(vovworld) – ວັນທີ 2/9, ທ່ານປະທານາທິບໍດີ ອາເມລິກາ Barack Obama ໄດ້ຮຽກຮ້ອງໃຫ້ ຈີນ ກາຍເປັນປະເທດມະຫາອຳນາດມີຄວາມຮັບຜິດຊອບ ແລະ ຫຼີກລ້ຽງບັນດາການກະທຳສະແດງກຳລັງແຮງເຮັດໃຫ້ຄວາມເຄັ່ງຕຶງຢູ່ທະເລຕາເວັນອອກເພີ່ມທະວີ. ຫຼັກໝັ້ນນີ້ໂດຍທ່ານ Obama ຍົກອອກມາໃນການຕອບສຳພາດຊ່ອງໂທລະພາບ CNN ກ່ອນທີ່ເດີນທາງໄປ ຈີນ ເພື່ອເຂົ້າຮ່ວມກອງປະຊຸມສຸດຍອດກຸ່ມບັນດາປະເທດພັດທະນາ ແລະ ຫາກໍ່ພົ້ນເດັ່ນຂຶ້ນ (ຈີ20). ໃນບົດຕອບສຳພາດ, ທ່ານປະທານາທິບໍດີ Obama ໃຫ້ຮູ້ວ່າ: ອາເມລິກາ ສະໜັບສະໜູນປະເທດ ຈີນ ບື່ນຕົວຂຶ້ນໂດຍສັນຕິພາບ, ແຕ່ຢັ້ງຢືນວ່າ ປັກກິ່ງ ຄວນຮັບຮູ້ຢ່າງຈະແຈ້ງວ່າ “ກຳລັງແຮງຍິ່ງໃຫຍ່ຫຼວງ, ຄວາມຮັບຜິດຊອບຍິ່ງສູງ” ແລະ ກົດໝາຍສາກົນຕ້ອງໄດ້ຮັບການປະຕິບັດ. ທ່ານຊີ້ແຈ້ງວ່າ: ຈີນ ໄດ້ເຊັນບັນດາສັນທິສັນຍາສາກົນກ່ຽວກັບກົດໝາຍທະເລ, ດັ່ງນັ້ນປະເທດນີ້ຕ້ອງເຄົາລົບຄຳຕັດສິນຂອງສາກົນກ່ຽວກັບບັນຫາທະເລ. ທ່ານປະທານາທິບໍດີ Obama ກໍ່ຮຽກຮ້ອງໃຫ້ ຈີນ ລະງັບໃຈຕໍ່ບັນດາການກະທຳຢູ່ທະເລຕາເວັນອອກ, ພິເສດແມ່ນການກະທຳສະແດງກຳລັງແຮງອາດຈະນາບຂູ່ເຖິງບັນດາປະເທດບ້ານໃກ້ເຮືອນຄຽງ ແລະ ເຮັດໃຫ້ຄວາມເຄັ່ງຕຶງຢູ່ພາກພື້ນເພີ່ມທະວີຂຶ້ນ.